ސަރުކާރުގެ ޚަރަދުގައި މީހުން ހައްޖަށް ގެންދާ އުސޫލް އާއްމުކޮށްފި
ސަރުކާރުގެ ޚަރަދުގައި 1000 ނިކަމެތިން ހައްޖަށް ފޮވުނުމަށް ރައީސުލް ޖުމުހުރިއްޔާ ޑޜ. މުޙައްމަދު މުއިއްޒު ވެވަޑައިގެންނެވި ވަޢުދުފުޅާއި އެއްގޮތަށް ސަރުކާރުން ހައްޖަށް ފޮނުވާނެ މީހުން ކަނޑައަޅާނެ އުސޫލް އާއްމު ކުރައްވައިފި އެވެ.
އިސްލާމިކް މިނިސްޓްރީން އިއްޔެ ގެޒެޓް ކޮށްފައިވާ "ދައުލަތުގެ ބެލުމުގެ ދަށުން ހިލޭ ފަރުޟު ޙައްޖަށް މީހުން ގެންދާނެ ގޮތުގެ އުސޫލު" ގައިވާ ގޮތުން ހައްޖަށް ފޮނުވާ މީހުން ކަނޑައަޅާނީ ފަގީރުންނާއި މިސްކީނުންގެ ދަފުތަރުގައި ރަޖިސްޓްރީކޮށްފައިވާ މީހުންގެ މެދުގައި ގުރުއަތު ލައިގެންނެވެ.
މި އުސޫލުގެ ދަށުން ދައުލަތުގެ ޚަރަދުގައި ހައްޖަށް ގެންދެވޭނީ އެމީހެއްގެ ގައިގައި ފަސް ޝަރުތެއް ފުރިހަމަވެގެންނެވެ. އެ ފަސް ޝަރުތަކީ:
1. ފަގީރުންނާއި މިސްކީނުންގެ ދަފުތަރުގައި ރަޖިސްޓްރީކޮށްފައިވުން.
2. ހައްޖުގެ އަޅުކަން ކުރިން އަދާކޮށްފައި ނުވާ މީހަކަށް ވުން.
3. އެ އަހަރަކު އިއުލާންކުރާ އުމުރުފުރާގެ މީހަކަށް ވުން.
4. ހައްޖުގެ އަޅުކަން އާދަކުރެވޭނެ ސިއްހީ ހާލެއްގައި ހުރުން.
5. އެ އަހަރަކު ހައްޖަށް ގެންދާ މީހުން ހޮވުމުގެ ކުރިން މީލާދީ ގޮތުން 69 އަހަރު ފުރިފައި ނުވާ މީހަކަށް ވުން.
އިސްލާމިކު މިނިސްޓްރީން މިއަދު އާއްމުކުރި އުސޫލުގައި ބުނެފައިވާ ގޮތުން ކޮންމެ އަހަރަކު ދައުލަތުގެ ފަރާތުން ހިލޭ ފަރުޟު ޙައްޖަށް ގެންދާނެ ފަރާތްތަކުގެ އަދަދު ކަނޑައަޅާނީ، ރައީސުލްޖުމްހޫރިއްޔާގެ ލަފާގެ މަތީން އިސްލާމީ ކަންތައްތަކާބެހޭ ވަޒީރެވެ. އަދި ހައްޖަށް ދިއުމަށްޓަކައި ކޮންމެ މީހަކަށްވެސް ދެވިގެންދާނީ ހަމަ އެންމެ ޖާގައެކެވެ.
ސަރުކާރުގެ ފަރާތުން މިއަދު މި އުސޫލް ނެރެ އާއްމުކޮށްފައިވާއިރު، އިސްލާމިކް މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ ދަޢުލަތުގެ ފަރާތުން މިއަހަރު ފަގީރުންނާއި މިސްކީނުންގެ ދަފުތަރުގައި ހިމެނޭ 50 މީހަކު ހައްޖަށް ފޮނުވާނެ ކަމަށެވެ.
"މި އުސޫލުގެ ދަށުން ހައްޖަށް ފޮނުވާނެ މީހުން ކަނޑައަޅާނީ މި ވުޒާރާއިން އެކުލަވާލާފައިވާ ފަގީރުންނާއި މިސްކީނުންގެ ދަފުތަރުގެ ތެރެއިން ޝަރުތު ހަމަވާ ފަރާތްތަކުގެ މެދުގައި އާންމުކޮށް ހުޅުވައިލައިގެން ބާއްވާ ގުރުއަތުލުމަކުންނެވެ." އިސްލާމިކް މިނިސްޓްރީގެ ބަޔާނުގައި ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
