"ފްލެޓް ދިނުމުގައި، އަންނަ ސަރުކާރުން ފިޔަވަޅު އަޅަަން ޖެހޭނެ ކަމެއް ކޮށްފައެއް ނޯންނާނެ"

ގެދޮރުވެރިޔާ އަދި ބިންވެރިޔާ ސްކީމުގެ ދަށުން ފުލެޓާއި ގޯތި ދޫކުރުމުގައި، ކަންކަން ކޮށްފައިވާނީ އަންނަން އޮތް ސަރުކާރުވެސް ވަރަށް ހިތްހަމަޖެހޭނެ ގޮތަށް ކަމަށް ހައުސިންގް މިނިސްޓްރީން ބުނެފިއެވެ.

އިންތިހާބީ ރައީސްގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި އިންތިގާލީ ތަރުޖަމާނު މުހައްމަދު ފިރުޒުލް ވަނީ، މި ސަރުކާރުގެ ގެދޮރުވެރިޔާ ސްކީމްގެ ދަށުން، ނާއިންސާފުން ފްލެޓު ހޯދާފައިވާނަމަ އާ ސަރުކާރުގައި ފިޔަވަޅު އަޅާނެ ކަމަށް ވިދާޅުވެފައެވެ.

"އެ [ގެދޮވެރިކަމުގެ] ލިސްޓުތަކަށް ޖުމްލަ ގޮތެއްގައި އޮނާ ކުރެވިގެން ދިޔަކަމުގައިވީ ނަމަވެސް މިހެން ނުގަވާއިދުން، އިންސާފުން ބޭރުން، އުސޫލުން ބޭރުން ކަންތައްތަކެއް ހިނގާފައިވާ ކަމަށް ވާނަމަ އެކަންކަމަށް ބަލައި، އެކަންކަމުގެ ތެރޭގައި ހަމަ ހަގީގަތުގަ ވެސް އުސޫލުން ބޭރުން ކަންތައްތަކެއް ހިނގާފައިވާ ކަމަށް ފާހަގަވާނަމަ އެފަރާތްތަކާމެދު ފިޔަވަޅު އެޅުމުގެ ފުރުސަތު އޮންނާނެ." ފިރުޒުލް ވިދާޅުވި އެވެ.

"އެހެންކަމުން އެ އުސޫލުން، ނާއިންސާފުން ކަންތައްތަކެއް ހާސިލްކޮށްފައިހުރިނަމަ ޝަރުތު ހަމަނުވާ ފަރާތްތަކަކަށް ދެވިފައިހުރި ކަމަށް ވާނަމަ ނުވަތަ އެނޫންވެސް އެފަދަ އެހެން ކަންތައްތަކެއް ހުރިނަމަ އެކަންކަމާ މެދު ފިޔަވަޅު އެޅުމުގެ ފުރުސަތު އޮންނާނެކަން ފާހަގަކޮށްލަން."

އިންތިގާލީ ތަރުޖަމާނު މުހައްމަދު ފިރުޒުލް

ފިރުޒުލް މިހެން ވިދާޅުވުމާއި ގުޅިގެން، މިއަދު ޕްލޭނިންގ މިނިސްޓްރީން ބޭއްވު ނޫސްވެރިންގެ ބައްދަލުވުމުގައި ނޫސްވެރިއަކު ވަނީ އެކަމާއި ގުޅޭ ސުވާލެއް ކޮށްފައެވެ.

އެ ސުވާލަށް ޖަވާބު ދެއްވަމުން ޕްލޭނިން މިނިސްޓްރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް ވިދާޅުވީ، ފުލެޓް އަދި ގޯތި ބެހުމުގެ ކަންކަން ކުރިއަށް ގެންގޮސްފައިވާ ގޮތުގެ މައުލޫމާތު ޓްރާންސިޝަން ކޮމިޓީގެ މެންބަރުންނަށް ދައްކާފައިވާ ކަމަށެވެ. އަދި އެކަންކަމުގެ އިދާރީ ކަންކަން ބަލަހައްޓަމުންދަނީ ސިޔާސީ ބޭފުޅުން ނޫން ކަމަށާށ އެއީ ސިވިލް ސާވިސްގެ މުވައްޒަފުން ކުރާ މަސައްކަތް ކަމަށް އޭނާ ވިދާޅުވި އެވެ.

ކުރީ ސަރުކާރު ތަކާއި ޚިލާފަށް މީގެ (ގޯތި އަދި ފްލެޓްގެ) ހުރިހާ ކަމެއް ސިވިލްސާވިސް މުވައްޒަފުންގެ އަތް މަތީގައި އޮންނާނީ. މީގެ އެއްވެސް އެއްޗެއް ނުގެއްލޭނެ. ހަމަ އެއްވެސް އެއްޗެއް ނުގެއްލޭނެ އެނގޭތޯ. އެއާ ޚިލާފަށް ކުރީ ސަރުކާރުގެ ހައުސިންގް ސްކީމްތަކާ ބެހޭ އެއްވެސް އެއްޗެއް އެނގޭ އެއްވެސް ބޭފުޅެއް ނެތް. އަދި ސިވިލް ސާވިސް ބޭފުޅުންގެ ތެރޭގައިވެސް މިކަން އެނގިލައްވާ ބޭފުޅަކު ނެތް. އެބޭފުޅުން (ކުރީ ސަރުކާރުން) ކަން ކުރައްވާފައި ހުރީ ވަގުތީ ބޭފުޅުން ނަންގަވައިގެން. އެބޭފުޅުންގެ ޓާމު ނިމުނީމާ އެހިސާބުން އެވެސް އެދިޔައީ. އެއާ ޚިލާފަށް އަޅުގަނޑުމެންނަށް މި އެއްޗެހި އެނގޭ ވަރަށް، ސިވިލް ސާވިސް މުވައްޒަފުން (ޓްރާންސިޝަނަލް ކޮމިޓީއަށް) ކިޔައިދީފައި ހުންނާނީ. މިކަން ކުރަނީ މިހެންނޭ، މީގައި މިހާ މައުލޫމާތު ހުންނާނެއޭ. މިގޮތަށޭ މި ހިންގަނީ.

ޕްލޭނިން މިނިސްޓްރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް

"އެހެންވީމާ އެއްވެސް ޖެހިލުމެއް އަޅުގަނޑުމެންގެ ނެތް. އަޅުގަނޑުމެން އުއްމީދު ކުރަނީ މިކަން ކޮށްފައި އޮތްލެއް ފުރިހަމަކަން އެ ބޭފުޅުން އަދި ކޮންމެވެސް ދުވަހަކު ބުނާނެ ކަމަށް." ފުލެޓް ދީފައިވާ ގޮތާއިމެދު ފިޔަވަޅު އަޅާނެ ކަމެއް ނޯންނާނެކަން ހާމަކުރައްވައި އާރިފް ވިދާޅުވި އެވެ.