މިފްކޯގެ އެމްޑީ ވިދާޅުވި ވާހަކަ މިފްކޯއިން ބަޔާން ނެރެ ދޮގު ކޮށްފި!

މިފްކޯއަށް ގަންނަމުންދާ މަހުގެ އަގު ރިވިއު ކުރުމަށް ނިންމާފައިވާ ކަމަށް ބުނެ އެ ކުންފުނީގެ މެނޭޖިންގް ޑިރެކްޓަރ އިސްމާއިލް ފައުޒީ ދެއްކެވި ވާހަކަތައް ދޮގުކޮށް އެ ކުންފުނިން ބަޔާންނެެރެފިއެވެ.

މަހަށް ހަމަ އަގު ހޯދައިދެއްވާނެ ކަމަށް ވިދާޅުވެ 2018 ވަނަ އަހަރު ވެރިކަމަށް ވަޑައިގެންނެވުމަށްފަހު، އެކަން ނުކުރެވި ދައުރު ނިމިދާން ކައިވެެފައި ވަނިކޮށް މި އަހަރުގެ ރިޔާސީ އިންތިޚާބުގެ ކެންޕެއިންގެ ތެރެއިން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، ވަނީ މަހުގެ އަގު -/25 އަށް ބޮޑުކޮށްދެއްވާފައެވެ.

އެހެން ނަމަވެސް، އެކަމާއި ގުޅިގެން ވާހަކަދައްކަވަމުން މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ އޮންލައިން ނޫހެއް ކަމަށްވާ "މިހާރު" އަށް ދެއްވި ޚާއްސަ ބަސްދީގަތުމެއްގައި ވަނީ، މާކެޓުގެ އަގު ހުރި ގޮތުން މި ވަގުތު މަހުގެ އަގު ހުންނަން ޖެހޭނީ 20ރ. އަށް ވުރެ ވެސް ދަށްކޮށް ކަމަށް ވިދާޅުވެފައެވެ. އެހެން ނޫން ނަމަ އެކުންފުނީގެ ހަރަދުތައް ހަމަޖައްސަން ވަރަށް ބޮޑަށް ދަތިވާނެ ކަމަށް ވިދާޅުވި އެވެ.

އެހެންކަމުން މަހުގެ އަގު ރިވިއު ކުރުމަށް ފިނޭންސް މިނިސްޓްރީ އާއި ސަރުކާރުގެ އިދާރާތަކާ އެކު މަޝްވަރާ ކުރަމުން އަންނަ ކަމަށްވެސް އޭނާ ވިދާޅުވެފައިވާ ކަމަށް އެ ނޫހުން ބުނެފައިވެއެވެ.

"ހަރަދުތައް ހަމަޖައްސަން ވަރަށް އުނދަގޫވެފައި މި އޮތީ. ބިލްތައް ޕެންޑިންގައި ގިނައީ ވެސް އަގަށް ގެނައި ބަދަލުގެ ސަބަބުން. މާކެޓު ރޭޓަށް ބަލާއިރު 20ރ. އަށް ވުރެ ދަށްކޮށް އަގު ބަހައްޓައިގެން ކުރިއަށް ދެވޭނީ. މިފްކޯގެ އޮޕަރޭޝަން ވަރަށް ބޮޑުކޮށް މިދަނީ،" ފައުޒީ ވިދާޅުވި އެވެ.

ފައުޒީގެ އެވާހަކަތަކާއި ގުޅިގެން ގިނަ ބައެއްގެ ފާޑުކިޔުންތައް އަދުގެ ސަރުކާރަށާއި މިފްކޯއަށް އަމާޒުވެގެން ދިޔުމާއި ގުޅިގެން މިއަދު މިފްކޯއިން ނެރުނު ބަޔާނެއްގައި ވަނީ މަހުގެ އަގު ރިވިއު ކުރަން ސީދާ މަޝްވަރާތައް ކުރިއަށް ނުގެންދާ ކަމަށް ބުނެފައެވެ.

އެގޮތުން އެ ބަޔާނުގައި ބުނެފައިވަނީ ޔޫރަޕްގެ މާކެޓަށް ވިއްކާ މަހުން ނަގާ 22 ޕަސެންޓް ޑިއުޓީ ކަނޑާލަން ސަރުކާރާއި ޔޫރަޕިއަން ޔޫނިއަން އާއެކު ކުރެވުނު ގިނަ މަޝްވަރާތައް ޕޮޒިޓިވްކޮށް ކުރިޔަށް ގެންދެވިފައިވާތީ މިދިޔަ ސެޕްޓެމްބަރުމަހުގައި މަސްކިލޯއެއްގެ އަގު 17 ރުފިޔާއިން 25 ރުފިޔާއަށް ބޮޑު ކުރެވިފައިވާކަމަށެވެ.

އެގޮތުން މަހުގެ އަގު ބޮޑުކުރި ދުވަހުން ފެށިގެން މިފްކޯއިން އަންނަނީ މަސްވެރިން އަތުން ސަރުކާރުން ނިންމެވި އަގުކަމަށްވާ ކިލޯއެއް 25 ރުފިޔާއަށް ގަންނަމުންކަމުގައިވެސް މިފްކޯގެ ބަޔާނުގައި ބުނެފައި ވެއެވެ. އަދި މިއަގަށް އެއްވެސް ބަދަލެއް ގެނައުމުގެ އެއްވެސް ވިސްނުމެއް އެކުންފުނިން ނުގެންގުޅޭކަމަށްވެސް މިފްކޯއިން ހާމަކޮށްފައި ވެއެވެ.

މިފްކޯއިން ބުނެފައިވަނީ، މަހުގެ އަގު ރިވިއު ކުުރުމަށް ފިނޭންސް މިނިސްޓްރީއާއި ސަރުކާރުގެ އިދާރާތަކާއެކު މިފްކޯއިން ސީދާ މަޝްވަރާ ކުރަމުން ނުގެންދާ ކަމުގައެވެ. ހަމައެއާއެކު މަސްކިރާ، އަގު ނުދެވި ހުރި ހުރިހާ ފައިސާއެއް މަސްވެރިންނަށް ދައްކާ ޚަލާސްކުރަން ކުރަންޖެހޭ މަސައްކަތްވެސް އެކުންފުނިން ކުރަމުންދާކަމަށްވެސް ބުނެފައި ވެއެވެ. އަދި މަސްވެރިން އަތުން ގަނެފައިވާ މަހަށް މިފްކޯއިން ބަރާބަރަށް ފައިސާ ދައްކަމުންދާނެކަމުގެ ޔަގީންކަންވެސް އެކުންފުނިން މަސްވެރިންނަށް ދީފައި ވެއެވެ.