ޑިއު ޑިލިޖެންސް ސާފުކުރުމަށް ހުށައަޅާއިރު ރަނގަޅު ލޮކޭޝަން ބަޔާންކުރުމަށް އެދެފި

ދިވެހިރާއްޖޭގައި ރަޖިސްޓްރީ ކޮށްގެން ހިންގާ ކުންފުނިތަކާއި ރާއްޖޭގައި މަސައްކަތްކުރާ ބޭރުގެ ކުންފުނިތަކުގެ "ޑިއު ޑިލިޖެންސް"ސާފުކުރުމަށް އެދި އެންވަޔަރަންމަންޓަލް ޕްރޮޓެކްޝަން އެޖެންސީއަށް ހުށަހަޅާއިރު، އެ ފަޅަކަށް ކަނޑައެޅިފައިވާ ރަނގަޅު ލޮކޭޝަން ބަޔާންކުރުމަށް ސަމާލުކަން ދިނުމަށް އެދެފިއެވެ.

މިއަދު އެންވަޔަރަންމަންޓަލް ޕްރޮޓެކްޝަން އެޖެންސީން ނެރުނު ނޫސް ބަޔާނެއްގައި ބުނެފައިވަނީ ދިވެހިރާއްޖޭގައި ރަޖިސްޓްރީ ކޮށްގެން ހިންގާ ކުންފުނިތަކާއި ރާއްޖޭގައި މަސައްކަތްކުރާ ބޭރުގެ ކުންފުނިތަކުގެ "ޑިއު ޑިލިޖެންސް" ހެދުމުގެ މަސައްކަތް، އެކި ފަރާތްތަކުން ކުރަމުންދާއިރު، ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނު އާއި އެ ޤާނޫނުގެ ދަށުން އެކުލަވާލެވިފައިވާ ގަވާއިދުތަކުގެ ދަށުން އެ ކުންފުންޏާ ގުޅޭގޮތުން ބަލަންޖެހޭ ކަންތައްތައް ބެލުމަށް އެދި އެ އެޖެންސީއަށް ހުށައަޅަމުން އަންނަ ކަމަށެވެ.

މިފަދައިން "ޑިއު ޑިލިޖެންސް" އަށް އެދި އެ އެޖެންސީއަށް ހުށަހަޅާ ބައެއް ހުށަހެޅުންތަކުގައި މަޢުލޫމާތު ފުރިހަމަ ނުވުމާއި، "ޑިއު ޑިލިޖެންސް" ސާފުކުރުމަށް އެދޭ ރަށްރަށާއި ފަޅުތަކުގެ ނަންތައް ނުބައިކޮށް ލިޔެފައި ހުންނަކަން ވަނީ ފާހަގަކުރެވިފައިވާ ކަމަށް އެ ނޫސް ބަޔާނުގައި ވެއެވެ.

އެހެންކަމުން، "ޑިއު ޑިލިޖެންސް" ސާފުކުރުމަށް އެދި އެންވަޔަރަންމަންޓަލް ޕްރޮޓެކްޝަން އެޖެންސީއަށް ހުށަހަޅާއިރު، މޯލްޑިވްސް ލޭންޑް އެންޑް ސާރވޭ އޮތޯރިޓީ އިން އެރަށަކަށް ޙާއްސަކޮށްފައިވާ އެފް ކޯޑް ބޭނުންކުރުމަށާއި، އެފް ކޯޑު ނެތް ފަޅެއްގެ "ޑިއު ޑިލިޖެންސް" ސާފުކުރުމަށް އެދި ހުށަހަޅާނަމަ، އެ ފަޅަކަށް ކަނޑައެޅިފައިވާ ރަނގަޅު ލޮކޭޝަން ބަޔާންކުރުމަށް ސަމާލުކަން ދިނުމަށް އެ އެޖެންސީން އެދުނެވެ.