ރާއްޖޭގެ ކަނޑުން ޤަވާއިދާ ޚިލާފަށް މަސްވެރިކަންކުރި އިންޑިއާ ބޯޓެއްގެ ޖޫރިމަނާ މައާފުކޮށްދޭން އުޅެނީ

ރާއްޖޭގެ އިޤުތިޞާދީ ޚާއްޞަ ސަރަހައްދުގެ ތެރެއިން ޤަވާއިދާ ޚިލާފަށް މަސްވެރިކަން ކުރަނިކޮށް އަތުލައިގަތް އިންޑިއާ މަސްބޯޓަކުން ދައްކަންޖެހޭ ޖޫރިމަނާ މައާފުކުރުމަށް ސަރުކާރުން މަސައްކަތްކުރަމުންދާކަމަށް މައުލޫމާތު ލިބިއްޖެއެވެ.

ފިޝަރީޒް މިނިސްޓްރީގެ އޮފިޝަލެއް "ވޮއިސް" އަށް މައުލޫމާތު ދިން ގޮތުގައި ޖޫރިމަނާ މާފުކޮށްދޭން މަސައްކަތް ކުރި ބޯޓު އަތުލައިގެންފައިވާއިރު 10 ޓަނުގެ މަސް ހުރިއިރު، އޭގެ ތެރޭގައި 10 ޓަނުގެ މަސް ހުރި ކަމަށެވެ. އަދި 10 މޭލުގެ ދިގުމިންހުރި މަސް ބާނަން ބޭނުންކުރާ ދައުވެސް ހުއްޓެވެ. މި މަސްބޯޓު ޖޫރިމަނާ ކޮށްފައިވަނީ 4.2 މިލިއަން ރުފިޔާއިންނެވެ.

ބޭރުގެ މަސްބޯޓުތަކާއި ދިވެހި މަސްބޯޓުތައްވެސް ގަވާއިދާއި ޚިލާފް ވެގެން މީގެ ކުރިން ޖޫރިމަނާ ކުރުމުން އެ މަޢާފް ކޮށްދޭން އެދިފައިވާއިރު، އެކަން މިނިސްޓްރީއަށް ކޮށްދެވިފައި ނުވަނީ އެ ޖޫރިމަނާ މައާފުކުރުމުގެ ބާރު ލިބިފައި ނެތް ކަމަށް ބުނެ ކަމަށް ވޮއިސް އަށް މައުލޫމާތު ދިން ފަރާތުން ބުނެއެވެ. އެހެން ނަމަވެސް، އިންޑިއާގެ މި މަސްބޯޓުގެ ފަރާތުން ޖޫރިމަނާ މައާފުކޮށްދޭން އެދުމުން، މާލިއްޔަތު ޤާނޫނާއި ޤަވާއިދުގެ ތެރެއިން އެކަން ކުރެވޭނެ ގޮތެއް ފެނޭތޯ ސަރުކާރުން ދިރާސާކޮށް ބަލަމުންދާކަމަށް މައުލޫމާތު ލިބިފައިވެއެވެ.

އަދި މިކަމުގައި ސަރުކާރުގެ ވިސްނުންހުރީ މި ފައިސާއަކީ ދައުލަތަށް ލިބެން ނެތް ފައިސާކަމަށް ކަނޑައަޅައި މާލިއްޔަތު ޤަވާއިދުގެ ދަށުން ލިބޭ ބާރުގެ ބޭނުންކޮށްގެން ފިނޭންސް މިނިސްޓްރީން މި ފައިސާ ނުލިބޭނެތީ މައާފުކުރުމަށް ކަންވެސް އެނގިފައިވެއެވެ.

ކަންމިހެން ހުރި ނަމަވެސް، މިފަދައިން ކަން ކުރުމަކީ، ވަރަށް ބޮޑު ނާ އިންސާފަކަށް ވާއިރު، އެކަން އެގޮތަށް ކުރުމުން ދެވަަނަ ފަހަރަށްވެސް އެގޮތަށް ރާއްޖޭގެ ޚާއްސަ އިގްތިސާދީ ސަރަހައްދުން މަސްބޭނުމުގެ ހިތްވަރު ލިބިގެންދާނެ ކަމަށް ބުނެ މައުލޫމާތު ދިން ފަރާތުން ވަނީ ކަންބޮޑުވުން ފާޅުކޮށްފަ އެވެ.