ޖުމްހޫރީ 50: ޖަލްސާގައި ރައީސް އަދި މިނިސްޓަރަކު ނެތުމުން މައުމޫން ފާޑު ވިދާޅުވެއްޖެ

ދެވަނަ ޖުމްހޫރިއްޔަތަށް 50ވަނަ އަހަރު ފުރުން ފާހަގަ ކުރުމުގެ ގޮތުން ބޭއްވި ހާއްސަ ޖަލްސާއިން މިހާރު ސަރުކާރު ހިންގުމާ ހަވާލުވެ ތިއްބެވި ކެބިނެޓްގެ މެންބަރަކު އަދި ރައީސް ޔާމީން ބައިވެރިވެވަޑައި ނުގަތުމުން އެކަމާ ކުރީގެ ރައީސް އަލްއުސްތާޒް މައުމޫން އަބްދުލްގައްޔޫމް ކަންބޮޑުވުން ފާޅުކުރައްވައިފިއެވެ.

ރައީސް މައުމޫން މިކަމައި ބެހޭގޮތުން ކަންބޮޑުވުން ފާޅުކުރައްވާފައިވަނީ ކުރެއްވި ޓްވީޓެއްގައެވެ.

Deeply dismayed by the lack of high level govt representation at the official event to mark the 50th anniversary of our second republic. Not even one cabinet minister, let alone the president, turned up. Is that how we cherish our national values? pic.twitter.com/wySyJdWOCY

— Maumoon Abdul Gayoom (@maumoonagayoom) November 12, 2018

މިޓްވީޓްގައި އެމަނިކުފާނު ވިދާޅުވެފައިވަނީ ރޭގެ ޖަލްސާގައި ރައީސް ޢަބުދްﷲ ޔާމީންއާއި ކެބިނެޓްގެ އެންމެ ވަޒީރަކުވެސް ބައިވެރިވަޑައިނުގަންނަވާ ކަމަށެވެ. އަދި މިއީ ގައުމީ އަގު އަދާކުރައްވާ ގޮތްތޯ އައްސަވާ ސުވާލު އުފައްދަވާފައިވެއެވެ.

ދައުލަތުގެ އިސްވެރިން މިޖަލްސާއިން ފެނިވަޑައިނުގަތުމަކީ އެކަމާއި ހިތާފުޅުކުރައްވާ ކަމެއް ކަމުގައިވެސް މައުމޫން ވިދާޅުވެފައިވެއެވެ.

ރޭ އިސްލާމީ މަރުކަޒުގެ ޖަލްސާކުރާ މާލަމުގައި ޖުމްހޫރީ ދުވަސް ފާހަގަ ކުރުމުގެ ގޮތުން ބޭއްވުނު މި ޖަލްސާ ޝަރަފުވެރި ކޮށްދެއްވީ އިންފޮމޭޝަން ކޮމިޝަނަރު ޢަބްދުލްއަޒީޒް ޖަމާލް އަބޫބަކުރް އެވެ.

ދެވަނަ ޖުމްހޫރިއްޔާގެ 2 ވަނަ ރައީސް ކަމަށްވާ ރައީސް މައުމޫނު ވަނީ ޖުމްހޫރީ ދުވަހުގެ މުނާސަބަތުގައި އިއްޔެ ބަޔާނެއް ނެރުއްވާފައެވެ.

ރިޔާސީ އިންތިހާބު ބާތިލްކުރުމަށް ސުޕްރީމް ކޯޓަށް ހުށަހެޅި މައްސަލައިގައި ސުޕްރީމް ކޯޓުގެ ހުކުމް އައުމަށްފަހު ރައީސް ޔާމީން މިފަދަ ޖަލްސާތަކުންނާއި އެހެނިހެން އިވެންޓްތަކުން ފެންނަލެއް ވަރަށް މަދެވެ.

އެކަމައިމެދު ގިނަބައެއްގެ ފާޑުކިޔުންތައް އެމަނިކުފާނަށް ދަނީ އަމާޒުވަމުންނެވެ.