ޗައިނާ ޓައިވާން ކޯޅުން: ސަބްމެރިން ކޭބަލެއް ބުރިކޮށްލި މައްސަލާގައި ޗައިނާ މީހަކަށް ހުކުމެއް

ކަނޑުއަޑިން އަޅާފައިވާ ސަބްމެރިން ކޭބަލްތަކަށް ގަސްތުގައި ގެއްލުންދިން މައްސަލައިގައި ކުށްވެރިވެ، ޗައިނާގެ ބޯޓެއްގެ ކެޕްޓަން ޖަލަށްލުމަށް ޓައިވާން ކޯޓަކުން ހުކުމްކޮށްފިއެވެ.

ޓައިވާން އޮފިޝަލުން ބުނާ ގޮތުގައި މިއީ މިދިޔަ ފެބްރުއަރީ މަހު ޗައިނާގެ ހުޅަނދު ދެކުނު އައްސޭރިފަށާކައިރިން، ނަގިލި ވައްޓާލައިގެން ސަބްމެރިން ކޭބަލްތަކަށް ގެއްލުންދިން ހިންގް ޓައި-58 ބޯޓުގެ ކެޕްޓަންއެވެ. ޗައިނާގެ ފަޅުވެރިން ތިބި މި ބޯޓަކީ ޓޯގޯގައި ރަޖިސްޓްރީކޮށްފައި އޮތަސް، ޗައިނާގެ ބާރު ހިނގާ ބޯޓެއްކަމަށް ޓައިވާނުން ބުނެއެވެ. ގަސްތުގައި ކޭބަލްތަކަށް ގެއްލުންދިންކަމަށް ކުށް ސާބިތުވިނަމަވެސް، ވޭންގް ނަމަކަޔަށް ކިޔާ މިމީހާ ވަނީ ކުށަށް ދައުވާތަކަށް އިންކާރުކޮށްފައެވެ. އަދި އޭނާއަށް ހުކުމް އިސްތިއުނާފުކުރުމުގެ ފުރުސަތު އޮންނާނެކަމަށް ޓައިވާނުގެ އޮފިޝަލުން ވިދާޅުވިއެވެ. ކޯޓުގެ އޭނާގެ ފުރިހަމަ ނަން ހާމަނުކޮށް، ހާމަކޮށްފައިވަނީ އާއިލީ ނަންކަމަށްވާ ވޭންގް އެކަންޏެވެ.

ވޭންގް ބުނިކަމަށްވަނީ ނަގިލި ވައްޓާލަން ފަޅުވެރިންނަށް އޭނާ އިރުޝާދު ދިންކަމަށާއި، އެއީ ގަސްތުގައި ކޭބަލްތަކަށް ގެއްލުން ދިނުމަށް ކުރިކަމެއް ނޫންކަމަށެވެ. އަދި ކުށްވެރިވިޔަސް ވާން ޖެހޭނީ ފަރުވާކުޑައަމަލެއް ހިންގުމުގެ ކުށުންކަމަށާއި، ގަސްތުގައި ކޭބަލްތަކަށް ގެއްލުން ނުދޭކަމަށް އޭނާ ބުންޏެވެ.

ގެއްލުން ލިބުނު ސަބްމެރިން ކޭބަލްއަށް ލިބުނު ގެއްލުން މަރާމާތުކުރުމަށް އެކޭބަލް ބަލަހައްޓާ ޗަންގްހުއާ ކުންފުނިން ބައި މިލިއަން އެމެރިކާ ޑޮލަރަށްވުރެ ބޮޑު އަދަދެއް ހޭދަކުރަން ޖެހުނެވެ. ޓައިވާނުން ކަނޑުއަޑިން އަޅާފައިވާ މުވާސަލާތީ ސަބްމެރިން ކޭބަލްތަކަށް މިއަހަރުގެ މިހާތަނަށް މިފަދަ 5 ހަމަލާ އައިސްފައިވެއެވެ. އަދި މިދިޔަ ދެ އަހަރުވެސް މިފަދަ ހަމަލާތައް އައިސްފައިވާއިރު، ޓައިވާނުން ބުނަނީ ސަބްމެރިން ކޭބަލްތަކަށް ގެއްލުން ދެނީ ޗައިނާއިން ކަމަށެވެ.