މިފްކޯގައި އޮތް ކޮރަޕްޝަން މުލުން ލުހެލާނަން: ރައީސް މުޢިއްޒު

މިފްކޯގައި އޮތް ކޮރަޕްޝަން މުލުން ލުހެލައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް މުއިއްޒު ހުވަދު އަތޮޅަށް ކުރައްވަމުން ގެންދަވާ ދަތުރުފުޅު ނިންމަވާ ލައްވަމުން، ނޫސްވެރިންނާ ބައްދަލުކުރައްވާ ވިދާޅުވީ، މިފްކޯ ރިފޯމްކޮށް، އެތަން ހަރުދަނާކޮށް ތަނުގައި ހިނގާ ބޭކާރު ޚަރަދުތައް އެތަނުގައި ހިނގާ ކޮރަޕްޝަންތައް ނައްތާލައްވާނެކަމަށެވެ.

"އެތާ (މިފްކޯ) އެތެރޭގައި ޒަމާންވީ އެކިއެކި ގޯސް ކަންތައްތައް ހިނގާ. އަޅުގަނޑު ގަބޫލުކުރަނީ ކޮރަޕްޝަންގެ އަމަލުތަކެއްގެ ގޮތަށް ފެންނަ ކަންތައްތަކެއް. އަޅުގަނޑުމެން އެ ހުރިހާ ކަމެއް އެތަނުން މުލުން ލުހެލާނަން. އެ އަޒުމުގައި މަސައްކަތްތައް ފަށާފައި އެހުރީ،" ރައީސް މުއިއްޒު ވިދާޅުވި އެވެ.

އެގޮތުން މިފްކޯ ހަރުދަނާކުރުމަށް ބޭރުގެ ސީއީއޯއެއް ހަމަޖައްސާފައިވާކަން ރައީސް މުއިއްޒު ފާހަގަކުރެއްވި އެވެ. އަދި މިފްކޯ ރިފޯމް ކުރުމުގެ މަސައްކަށް ވަރަށް ގާތުން ބައްލަވާ ކަމަށާ، މަސްވެރިން އެދޭ ގޮތަށް އެތަން ރިފޯމް ކުރައްވާނެ ކަމަށް ވިދާޅުވިއެވެ.

މީގެ އިތުރުން ރައީސް މުޢިއްޒު ވިދާޅުވީ، މަސްވެރިކަމުގެ ސިނާއަތް ރަނގަޅަށް ތަރައްގީ ކުރެވިއްޖެނަމަ އެއީ ރާއްޖެއަށް އެންމެ ބޮޑު އާމްދަނީއެއް ހޯދޭނެ ސިނާއަތް ކަމަށެވެ.

އަދި ފަތުރުވެރިކަމަކީ ރާއްޖޭގެ ޖީޑީޕީގެ އެންމެ ބޮޑު ބައެއް ހިއްސާކުރާ ސިނާއަތް ނަމަވެސް، ފަތުރުވެރިކަމަށްވުރެ މަސްވެރިކަމުގެ ސިނާއަތް ކުރިއެރުވޭނެ ކަމަށެވެ.

"މަސްވެރިކަމުގެ އިންޑަސްޓްރީއަކީ އެއަށްވުރެވެސް (ފަތުރުވެރިކަމަށްވުރެ) މައްޗަށް ގެންދެވޭނެ އިންޑަސްޓްރީއެއް. ޑައިވާސިފައިކުރަން ވެސް އެބައޮތް ވަރަށް ބޮޑަށް،" ރައީސް ވިދާޅުވި އެވެ.

ރައީސް ވިދާޅުވީ މަސްވެރިންގެ ކަންބޮޑުވުންތަކަށް ހައްލު ހޯދައިދެއްވުމަކީ އެމަނިކުފާނު އެންމެ އިސްކަމެއް ދެއްވާ އެއް ކަން ކަމަށާ، އެގޮތުން، މަސްވެރިންނަށްވެފައިވާ ވައުދާއި އެއްގޮތަށް 48 ގަޑިއިރުގެ ތެރޭގައި ފައިސާ ދޫކުރުމުގެ މަސައްކަތް ޑިސެމްބަރު 10 އިން ފެށިގެން ފުއްދަމުންދާ ކަމަށް ވިދާޅުވެފަ އެވެ.