ދައުލަތަށް ނުލިބި ހުރި ޓެކްސް ފައިސާއިން 639 މިލިއަން ރުފިޔާ ހޯދައިފި

ޓެކްސް އާއި އެހެނިހެން އާމްދަނީގެ ގޮތުގައި ދައުލަތަށް ލިބެން ޖެހޭ ފައިސާގެ ތެރެއިން 639 މިލިއަން ރުފިޔާ ޓެކްސް އިދާރާ، މީރާއިން ހޯދައިފި އެވެ.

މީރާއިން އާއްމު ކޮށްފައިވާ ދެވަނަ ކުއާޓާގެ ރިޕޯޓުގައިވާ ގޮތުން ވޭތުވެދިޔަ ހަ މަސް ތެރޭގައި މީރާއިން ވަނީ ދައުލަތަށް ނުލިބި ހުރި ޓެކްސް ފައިސާ ހޯދުމަށް އެކި ގޮތް ގޮތުން މަސައްކަތް ކޮށއފައެވެ.

އެގޮތުން، ތަކުރާރުކޮށް ގުޅައި، ޓެކްސް ހޯދުމަށް އަންގައިގެން 515 މިލިއަން ރުފިޔާ ދައުލަތަށް ހޯދައިފައިވާއިރު، ޑިއުޒް ކްލިއަރެންސްގެ ގޮތުގައި 93 މިލިއަން ރުފިޔާ، ބޭންކް އެކައުންޓު ފްރީޒްކޮށްގެން 21 މިލިއަން ރުފިޔާ އަދި އޯވަޑިއުވެފައިވާ ޕޭމެންޓްތަކުގެ ގޮތުގައި 12 މިލިއަން ރުފިޔާ ވަނީ ހޯދާފައެވެ. އަދި ފައުސާ ދައްކަންޖެހޭ ފަރާތްތަމަށް ހަނދާންކޮށްދީގެން 135،000ރ. ހޯދައިފަ އިވާއިރު، ކޯޓު މަރުހަލާގެ ތެރެއިން 10،000ރ. ވަނީ ހޯދައިފަ އެވެ.

މިފައިސާ ހޯދުނު ނަމަވެސް، ޖުމްލަ ޓެކުހާއި ކުލީގެ ގޮތުގައި ދައުލަތަށް ލިބެންޖެހޭ 10 ބިލިއަން ރުފިޔާ ނުލިބޭ ކަމަށް ތަފާސް ހިސާބުތަކުން އެނގެއެވެ. އޭގެ ތެރޭގައި ޓެކްސްގެ ގޮތުގައި ނުލިބޭ 5.5 ބިލިއަން ރުފިޔާ އާއި ރިސޯޓު ކުލީގެ ގޮތުގައި ނުލިބި ހުރި 4.3 ބިލިއަން ރުފިޔާ ހިމެނެ އެވެ.

މީރާއިން ނިމިދިޔަ ކުއާޓަރުގައި ވަނީ، ޖުމުލަ 83 އޮޑިޓެއް ހަދައިފައެވެ. އޭގެތެރޭގައި ބިޒްނަސް ޕްރޮފިޓް ޓެކްސްއާ ގުޅޭ 14 އޮޑިޓެއް ހަދައިފައި ވާއިރު، ޖެނެރަލް ސެކްޓާއިން ގޫޑްސް އެންޑް ސާވިސަސް ޓެކްސްއާ ގުޅޭ 10 އޮޑިޓެއް ހަދައިފައިވެއެވެ. އަދި ޓުއަރިޒަމް ސެކްޓާއިން ގޫޑްސް އެންޑް ސާވިސަސް ޓެކްސްއާ ގުޅޭ 17 އޮޑިޓަކާއި އިންކަމް ޓެކްސްއާ ގުޅޭ 37 އޮޑިޓެއްގެ އިތުރުން ގްރީން ޓެކްސްއާ ގުޅޭ ފަސް އޮޑިޓެއް ވަނީ ހަދައިފައެވެ.

އެ އޮޑިޓްތަކުން 93 މިލިއަން ރުފިޔާ ދައުލަތަށް އިތުރަށް ލިބެން ޖެހޭކަން ވަނީ ފާހަގަކުރެވިފަ އެވެ.