ޓެކްސް ދައްކާ ފަރާތްތަކަށް ލުޔެއް؛ މީރާއިން "މޯލްޑިވްސް ގެސްޓް އިންފޮމޭޝަން ސިސްޓަމް" ތަޢާރަފުކޮށްފި

ޓެކްސް ދައްކާ ފަރާތްތަކަށް ލުއިފަސޭހަ ޚިދުމަތްތަކެއް ފޯރުކޮށްދިނުމުގެ ގޮތުން މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން "މޯލްޑިވްސް ގެސްޓް އިންފޮމޭޝަން ސިސްޓަމް" (އެމް.ޖީ.އައި.އެސް) ރަސްމީކޮށް މިއަދު އިފުތިތާޙުކޮށްފިއެވެ.

މިކަމަށްޓަކައި މިއަދު ބޭއްވި ޚާއްޞަ ރަސްމިއްޔާތެއްގައި މި ސިސްޓަމް ރަސްމީކޮށް އިފުތިތާޙުކޮށްދެއްވީ މިނިސްޓަރ އޮފް ފިނޭންސް އެންޑް ޕަބްލިކް އެންޓަރޕްރައިސެސް، ހަސަން ޒަރީރެވެ.

މީރާއިން ބުނީ މި ސިސްޓަމް ތަޢާރަފުކުރުމާއެކު، ގްރީން ޓެކުހަށް ރަޖިސްޓަރީކޮށްފައިވާ ހުރިހާ ފަރާތްތަކަށް ވެސް ފަތުރުވެރިކަމުގެ ޚިދުމަތްދޭ ތަންތަނަށް (ޓޫރިސްޓް އެސްޓެބްލިޝްމަންޓްތަކަށް) އަންނަ ފަތުރުވެރިންގެ މަޢުލޫމާތު މި ސިސްޓަމް މެދުވެރިކޮށް ފަސޭހަކަމާއެކު ހުށަހެޅޭނެ ކަމަށެވެ.

އަދި މި ސިސްޓަމް މެދުވެރިކޮށް މަޢުލޫމާތު ހުށަހެޅުމުން، މިނިސްޓްރީ އޮފް ޓޫރިޒަމަށް ހުށަހަޅަންޖެހޭ މަޢުލޫމާތުތައް ވެސް އެ މިނިސްޓްރީއަށް ހުށަހެޅުނީ ކަމުގައި ބެލެވޭނެ ކަމަށް އެ އޮތޯރިޓީން މަޢުލޫމާތުދެއެވެ.

މީގެއިތުރުން، މި އައު އިންތިޒާމުގެ ސަބަބުން ޓޫރިސްޓް އެސްޓެބްލިޝްމަންޓްތަކުން މަޢުލޫމާތު ހުށަހެޅުމުގައި އުފުލަންޖެހޭ ތަކުލީފުތަކަށް ވަރަށް ބޮޑު ލުޔެއް ލިބިގެންދާނެ ކަމަށް މީރާއިން ބުންޏެވެ. އަދި މި ސިސްޓަމަކީ ވިޔަފާރިތަކުގެ އަމިއްލަ ސިސްޓަމްތަކާ ގުޅާލެވޭ (އިންޓަގްރޭޓް ކުރެވޭ) ނިޒާމަކަށް ވާތީ، މަޢުލޫމާތު ހުށަހެޅުމަށް މެނުއަލްކޮށް ކުރަންޖެހޭ މަސައްކަތްތައް މުޅިން ނިމުމަކަށް އަންނާނެ ކަމަށް ވެސް މީރާއިން ފާހަގަކުރެއެވެ.

މި ސިސްޓަމަކީ ހުރިހާ ފަރާތްތަކަށް ވެސް ބޭނުންކުރެވޭ ގޮތަށް ހުޅުވާލެވިފައިވާ ސިސްޓަމެއް ނަމަވެސް، ޓެކްސް ދައްކާ ފަރާތްތައް ސިސްޓަމަށް އޮންބޯޑް ކުރުމަށް ހަމަޖެހިފައިވަނީ ދެ މަރުޙަލާއަކަށް ބަހާލައިގެންނެވެ. އެގޮތުން:

1 ނޮވެމްބަރު 2026 އިން ފެށިގެން: ރިސޯޓުތަކާއި، ހޮޓާތަކާއި، އަދި 50 އެނދަށްވުރެ މަތީގެ ގެސްޓްހައުސްތަކުން މި ސިސްޓަމް މެދުވެރިކޮށް ރިޕޯޓުކުރަން ފަށަންޖެހޭނެއެވެ.

1 ޖަނަވަރީ 2027 އިން ފެށިގެން: ގްރީން ޓެކުހަށް ރަޖިސްޓަރީކޮށްފައިވާ އެހެނިހެން ހުރިހާ ފަރާތްތަކުން މި ސިސްޓަމް ބޭނުންކުރަން ފަށަންޖެހޭނެއެވެ.

މީރާއިން ބުނީ އައު ސިސްޓަމް ތައާރަފް ކުރި ނަމަވެސް ގްރީން ޓެކްސް ބަޔާން ހުށަހެޅުމާއި، ފައިސާ ދެއްކުމަށް ކަނޑައެޅިފައިވާ ސުންގަޑިތަކަށް ބަދަލެއް ނާންނާނެ ކަމަށެވެ. އަދި ކުރިއެކޭ އެއްފަދައިން ގްރީންޓެކްސް ރިޓާން ހުށަހެޅުމާއި، ފައިސާދެއްކުން ކުރިއަށްދާނީ ”މީރާކަނެކްޓް“ މެދުވެރިކޮށް ކަމަށެވެ.

ނަމަވެސް، މި ސިސްޓަމަށް މަޢުލޫމާތު ރިޕޯޓް ކުރުމުން އެ މުއްދަތުގެ ގްރީން ޓެކްސް ބަޔާނާއެކު އިތުރު އިންފޮމޭޝަން ޝީޓެއް އަޕްލޯޑްކުރާކަށް ނުޖެހޭނެ ކަމަށާ، އޭގެ ބަދަލުގައި ބަޔާން ހުށަހަޅާއިރު، އެ މަޢުލޫމާތު ގްރީން ޓެކްސް ބަޔާނަށް ޕްރީފިލް ކޮށްދޭނެ ކަމަށްވެސް މީރާއިން މަޢުލޫމާތު ދެއެވެ.