އެއް މިލިއަނަށް ވުރެ ގިނަ ރުފިޔާގެ ޓެކްސް ނުދައްކާ 25 ފަރާތެއްގެ ނަން މީރާއިން އާންމުކޮށްފި

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ޓެކުހުގެ ފައިސާ ނުދައްކައިވާ އަދަދު އެއް މިލިއަން ރުފިޔާއަށް ވުރެ އިތުރުވެފައިވާ 25 ފަރާތެއްގެ ނަން އެ އޮތޯރިޓީން އާންމުކޮށްފިއެވެ.

މީރާގެ ބަޔާނުގައި ވާގޮތުން، ޓެކްސް ބަޔާން ހުށަނާޅާ ނުވަތަ ފައިސާ ނުދައްކާ ފަރާތްތަކުގެ ނަން ހާމަކުރުމުގެ އުސޫލުގެ ދަށުން މި ފަހަރު ނަން ހާމަކޮށްފައިވަނީ 2024 ވަނަ އަހަރުގެ 4 ވަނަ ކުއާޓަރާއި، ޑިސެންބަރު 2024 އިން ޖޫން 2026 ގެ ނިޔަލަށް އާމްދަނީން ނަގާ ޓެކްސް (އިންކަމް ޓެކްސް) އަދި ޖީ.އެސް.ޓީގެ ގޮތުގައި 1,000,000ރ (އެއް މިލިއަން ރުފިޔާ) އަށް ވުރެ ގިނަ ފައިސާ ނުދައްކާ ހުރި ފަރާތްތަކެވެ.

މީރާއިން ބުނީ ޓެކްސް ނުދައްކާ ފަރާތްތަކުގެ މައުލޫމާތު އާންމުކުރުމުގެ ކުރިން، ކަނޑައެޅިފައިވާ އުސޫލުތަކާ އެއްގޮތަށް އެ ފަރާތްތަކަށް ފޯނުން ގުޅައި ވާހަކަދައްކާފައިވާނެ ކަމަށެވެ. އަދި ޤާނޫނުގައި ކަނޑައަޅައިފައިވާ އަދަބުތަކާއި، އަޅާނެ ފިޔަވަޅުތަކުގެ މައުލޫމާތު ކިޔައިދިނުމުގެ އިތުރުން، އެސް.އެމް.އެސް މެދުވެރިކޮށް ވެސް އެ ކަންކަން އެ ފަރާތްތަކަށް އަންގައި ހަނދާންކޮށްދީފައިވާނެ ކަމަށް އެ އޮތޯރިޓީން ފާހަގަކުރެއެވެ.

މީގެއިތުރުން، ދައުލަތަށް ދައްކަންޖެހި ނުދައްކައިވާ ޓެކްސްގެ ފައިސާ ހޯދުމުގެ ގޮތުން، މީރާގެ އެންފޯސްމަންޓް ޕޮލިސީގެ ދަށުން އަޅަންޖެހޭ އިތުރު ގާނޫނީ ފިޔަވަޅުތައް ވެސް އެއްވެސް ތަފާތުކުރުމެއް ނެތި އަޅަމުން ގެންދާނެ ކަމަށް މީރާއިން ވަނީ ބުނެފައެވެ.

އެހެންކަމުން، މިހާތަނަށް ޓެކްސް ބަޔާން ހުށަނާޅާ ފަރާތްތަކުން ލަސްނުކޮށް ބަޔާންތައް ހުށަހެޅުމަށާއި، ދައްކަންޖެހޭ ޓެކްސް ފައިސާ ވީއެންމެ އަވަހަކަށް ދައްކައި ޚަލާޞްކުރުމަށް މީރާއިން ވަނީ ޓެކްސް ދައްކާ ފަރާތްތަކަށް އިލްތިމާސްކޮށްފައެވެ.

ޓެކްސް ނުދައްކާ ފަރާތްތަކުގެ ލިސްޓު މީރާގެ ވެބްސައިޓް (https://www.mira.gov.mv/extended/NonCompliers) މެދުވެރިކޮށް މިހާރު ފެންނަން ހުންނާނެއެވެ.