މިހާރުވެސް ރިސޯޓުތައް އޮޑިޓް ކުރަން: މީރާ

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ވިޔަފާރިތައް އޮޑިޓް ކުރުމުގައި ޓޫރިޒަމް ދާއިރާގެ ވިޔަފާރިތަކާއި ރިސޯޓުތައް ވެސް މިހާރު އޮޑިޓް ކުރަމުންދާ ކަމަށާއި، މި މަސައްކަތް ކުރިއަށް ގެންދަނީ ވަކި ބަޔަކަށް ބެލުމެއްނެތި ހަމަހަމަ އުސޫލަކުން ކަމަށް އެ އިދާރާއިން ބުނެފިއެވެ.

މީރާއިން ނެރުނު ބަޔާނެއްގައި ބުނެފައިވަނީ، ޓެކްސް ނެގުމާބެހޭ އިދާރީ ޤާނޫނުގެ ދަށުން އެ އިދާރާއާ މަތިކޮށްފައިވާ މައިގަނޑު ޒިންމާއަކީ ޓެކްސް ޤާނޫނުތައް ތަންފީޒުކުރުމާއި، ޓެކްސްއާބެހޭ ސިޔާސަތުތައް ހިންގުމާއި، ޤާނޫނީ ގޮތުން ދައުލަތަށް ނަގާ އެންމެހައި ޓެކްސް ނެގުމުގެ މަސައްކަތް ހިންގައި ބެލެހެއްޓުން ކަމަށެވެ.

އަދި ޓެކްސް ދައްކާ ފަރާތްތަކުން ޓެކްސް ހިސާބުކުރަމުން ދަނީ ޤާނޫނާ އެއްގޮތަށްތޯ ބެލުމާއި، ޤާނޫނީ ޒިންމާ އަދާކުރާކަން ކަށަވަރުކުރުމަކީ މީރާގެ ޤާނޫނީ މަސްއޫލިއްޔަތެއް ކަމަށް ވެސް ފާހަގަކޮށްފައިވެއެވެ.

މި ޒިންމާ އަދާކުރުމުގައި ވިޔަފާރީގެ ބާވަތާއި ކުޑަބޮޑުމިނަށް ބެލުމުގެ ބަދަލުގައި، ހުރިހާ ފަރާތްތަކުގެ މެދުގައި ޤާނޫނު ހަމަހަމަކޮށް ތަންފީޒުކުރުމަކީ ފެށުނީއްސުރެ މީރާއިން ޢަމަލުކުރަމުންދާ އުސޫލެއް ކަމަށް އެ ބަޔާނުގައިވެއެވެ. އަދި މީރާގެ މަސައްކަތްތަކަކީ ކަނޑައެޅިފައިވާ ސްޓްރެޓެޖިކް ޕްލޭނެއްގެ ދަށުން ރޭވިގެން، އާންމު ކުރެވިފައިވާ ކޮމްޕްލަޔަންސް އިމްޕްރޫވަމަންޓް ޕްލޭނަކާ އެއްގޮތަށް ކުރަމުންދާ މަސައްކަތެއް ކަމަށް ވެސް ބުނެފައިވެއެވެ.

މީރާއިން އިތުރަށް ބުނީ، އޮޑިޓްކުރަން ކަނޑައަޅާ ފަރާތްތަކަކީ "ރިސްކް ބޭސްޑް" އުސޫލުގެ މައްޗަށް އެކުލަވާލާފައިވާ، ކޮމްޕްލަޔަންސް ރިސްކް މެނޭޖްމަންޓް އޮނިގަނޑެއްގެ ތެރެއިން ހަމަހަމަކަމާއެކު ހޮވޭ ފަރާތްތަކެކެވެ.

އެގޮތުން މީރާއިން ޓޫރިޒަމް ދާއިރާގެ ވިޔަފާރިތަކާއި އެނޫން ދާއިރާތަކުގެ ވިޔަފާރިތައްވެސް އޮޑިޓް ކުރަމުންދާ ކަމަށާ، އަދި ދައުލަތަށް ލިބޭ އާމްދަނީގެ ބޮޑު އިންސައްތައެއް ޙިއްޞާކުރަނީ ޓޫރިޒަމް ދާއިރާއިންކަން ވެސް އެ އިދާރާއިން ފާހަގަކުރެއެވެ.

މީގެއިތުރުން، ޓެކްސް ނިޒާމުގެ ތެރެއިން ކުދި ވިޔަފާރިތަކަށް ހިސާބު ބެލެހެއްޓުމާއި، އޮޑިޓް ކުރުމާއި، އަދި ޓެކްސް ބަޔާން ހުށަހެޅުމުގައި ލުއި އިންތިޒާމުތަކެއް ހަމަޖައްސައިދީފައިވާނެ ކަމަށް މީރާއިން ބުންޏެވެ. އަދި މީރާގެ އަމާޒަކީ ވިޔަފާރިތަކާ ގުޅިގެން މަސައްކަތްކޮށް، އެހީތެރިކަން ފޯރުކޮށްދީގެން ޓެކްސް ދެއްކުން އިތުރުކުރުން ކަމަށް ވިޔަސް، ގަސްދުގައި ޓެކްސް ނުދައްކާ ފަރާތްތަކާމެދު ޤަވާޢިދުގެ ދަށުން ފިޔަވަޅު އަޅަމުންދާނެ ކަމުގެ އިންޒާރު ވެސް ވަނީ ދީފައެވެ.

މީރާއިން މިފަދަ ބަޔާނެއް ނެރެފައި މިވަނީ، ރާއްޖޭގެ ރިސޯޓުތަކުން ބޭންކިން ނިޒާމަށް ވަންނަންޖެހޭ ބޭރު ފައިސާ ހޯދުމަށްޓަކައި މީރާއިން ޚާއްޞަ އޮޑިޓެއް ހަދަންޖެހޭ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަޙްމަދު މުނައްވަރު ވިދާޅުވެފައި ވަނިކޮށެވެ.

ރައްޔިތުންގެ މަޖިލީހުގެ ބަޖެޓް ކޮމިޓީގައި ވާހަކަދައްކަވަމުން ގަވަރުނަރު މުނައްވަރު ވިދާޅުވީ، ރާއްޖެއަށް ވަންނަ ކޮންމެ ޑޮލަރެއް ރާއްޖޭގެ ބޭންކިން ނިޒާމުގެ ތެރެއަށް ވަންނަ ނަމަ މިހާރު ކުރިމަތިވެފައިވާ ބޭރު ފައިސާގެ ދަތިކަން މިހާ ބޮޑުވެގެން ނުދާނެ ކަމަށެވެ. އަދި ރާއްޖެއަށް އާމްދަނީގެ ގޮތުގައި ގާތްގަނޑަކަށް 5.9 ބިލިއަން ޑޮލަރު ލިބޭއިރު، ރާއްޖޭގެ ބޭންކިން ނިޒާމަށް ވަންނަނީ އެންމެ 3.8 ބިލިއަން ޑޮލަރު (65 އިންސައްތަ) ކަން ފާހަގަކުރެއްވިއެވެ.

މީރާގެ ހިސާބުތަކަށް އަލިއަޅުއްވާލައްވަމުން ގަވަރުނަރު ވިދާޅުވީ، ރާއްޖޭގައި ހިންގާ 185 ރިސޯޓުގެ ތެރެއިން އިންކަމް ޓެކްސް ނުވަތަ ބިޒްނަސް ޕްރޮފިޓް ޓެކްސް (ބީޕީޓީ) ދައްކަނީ އެންމެ 50 ވަރަކަށް ރިސޯޓުން ކަމަށެވެ.

"އޭގެ މާނައަކީ ކޮބައިތޯ؟ ފައިދާއެއް ނުވަނީތޯ ނުވަތަ ކޮންމެވެސް ކަހަލަ މައްސަލަތަކެއް އެބައުޅޭ. އެހެންވީމާ އެ ބޭފުޅުންގެ ހިސާބުތައް އޮޑިޓުކުރަން އެބަ ޖެހޭ ނޫންތޯ؟ ކަންމަތީ ފިހާރަތަކަށް އެކަނި ނޫން މީރާއިން ދާންވީކީ. ޓޫރިޒަމްގެ ހުރި ހިސާބުތައް ރަނގަޅުތޯ ވެސް ބަލަން އެބަ ޖެހޭ،" ގަވަރުނަރު ވިދާޅުވިއެވެ.

ގަވަރުނަރު އިތުރަށް ފާހަގަކުރެއްވި ގޮތުގައި، ރާއްޖެއަށް ލިބޭ ކޮންމެ ޑޮލަރެއް ބޭންކިން ނިޒާމަށް ވެއްދުމަށްޓަކައި މޮނިޓަރިން ހަރުދަނާކުރަން ޖެހެއެވެ. މިގޮތުން، ރިސޯޓުތަކާއި ޑޮލަރުން އާމްދަނީ ލިބޭ ފަރާތްތަކުން ވަކި ޚާއްޞަ (ޑެސިގްނޭޓެޑް) އެކައުންޓުތަކެއް ހުޅުވުމަށް މިހާރު އަންގާފައިވާ ކަމަށާއި، އަންނަ އަހަރުގެ ތެރޭގައި އެކަންކަން އިތުރަށް ހަރުކަށިކޮށް ބަލަހައްޓަވާނެ ކަމަށް ވިދާޅުވިއެވެ.