މޯލްޑިވްސް ގެސްޓް އިންފޮމޭޝަން ސިސްޓަމަކީ ޓެކްސްގެ ނިޒާމަށް ލިބުނު ކުރިއެރުމެއް: މާލީ ވަޒީރު

މީރާއިން މިއަދު ތައާރަފުކުރި މޯލްޑިވްސް ގެސްޓް އިންފޮމޭޝަން ސިސްޓަމް (އެމްޖީއައިއެސް) އަކީ ފަތުރުވެރިންގެ ޑޭޓާ އެއް ވިއުގައަކުން ދައުލަތުގެ މާލީ އިދާރާތަކާ ގުޅުވައިދޭ ވަރަށް މުހިންމު ވަސީލަތެއް ކަމަށް މިނިސްޓަރ އޮފް ފިނޭންސް އެންޑް ޕަބްލިކް އެންޓަޕްރައިޒަސް ޙަސަން ޒަރީރު ވިދާޅުވެއްޖެއެވެ.

އެމްޖީއައިއެސް ތައާރަފުކުރުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ވަޒީރު ވިދާޅުވީ ރާއްޖޭގެ އިޤްތިޞާދުގެ މައި ތަނބަކީ ފަތުރުވެރިކަން ކަމަށްވާއިރު އެ ދާއިރާގެ މައުލޫމާތު ސަރުކާރުގެ ތަފާތު އެތައް އިދާރާއަކުން ބޭނުންކުރާ ކަމަށެވެ. މި މަރުކަޒީ ނިޒާމުގެ ސަބަބުން އެ މައުލޫމާތު ބެލެހެއްޓުމުގައި ކަމާ ގުޅޭ މުއައްސަސާތަކަށް ބޮޑު ލުޔެއް ލިބިގެންދާނެ ކަމަށް ވެސް ވަޒީރު ފާހަގަކުރެއްވިއެވެ.

ޒަމާނީ ޓެކްނޮލޮޖީ ބޭނުންކޮށްގެން ދައުލަތް ހިންގުން ހަރުދަނާކުރުމަކީ ރައީސް ޑރ. މުޙައްމަދު މުޢިއްޒުގެ މޯލްޑިވްސް 2.0 ޑިޖިޓަލް ތަޞައްވުރުގެ ލަނޑުދަނޑިއެއް ކަމަށާއި މި ސިސްޓަމް ތައާރަފުވެގެން ދިޔައީ އެ ތަޞައްވުރުގެ ދަށުން ހާސިލުކުރެވުނު މުހިންމު ކާމިޔާބީއެއްގެ ގޮތުގައި ކަމަށް ވަޒީރު ވިދާޅުވިއެވެ. ހަމައެއާއެކު މީރާގެ ޑިޖިޓަލް ޓްރާންސްފޯމޭޝަން ރޯޑްމެޕްގައި ހިމެނޭ ރިޕޯޓިން އޮޓޮމޭޓްކުރުމުގެ މަސައްކަތަށް ވެސް އެމްޖީއައިއެސް އިން ބޮޑު ކުރިއެރުމެއް ގެނެސްދޭ ކަން ވަޒީރު ފާހަގަކުރެއްވިއެވެ. ޑިޖިޓަލައިޒޭޝަންގެ ރޮނގުން މީރާ ވާންޖެހޭނީ އެންމެ ކުރީ ސަފުގައި އޮންނަ މުއައްސަސާއަށް ކަމަށާއި ފަސޭހަ ޓެކްސް ނިޒާމެއް ޤާއިމުކުރުމުގެ މަސައްކަތް ދެމެހެއްޓުމަށް ވެސް ވަޒީރު އިލްތިމާސްކުރެއްވިއެވެ.

ވަޒީރު ވިދާޅުވި ގޮތުގައި ފަތުރުވެރިކަމުގެ ދާއިރާގެ ވިޔަފާރިތަކަށް ވަކީން ޚާއްޞަކޮށް އަމިއްލަ ޕްރޮޕަޓީ މެނޭޖްމަންޓް ސިސްޓަމެއް ނެތް ގެސްޓްހައުސްތަކާއި ކުދި ވިޔަފާރިތަކަށް ފަތުރުވެރިންގެ މައުލޫމާތު ބެލެހެއްޓުމުގައި މި ޕްލެޓްފޯމް ބޮޑު އެހީއަކަށް ވެގެންދާނެއެވެ.

މި ނިޒާމު ކުރު މުއްދަތެއްގެ ތެރޭގައި ޤާއިމުކުރެވުނީ ކަމާ ގުޅޭ މުއައްސަސާތަކުގެ ފުރިހަމަ އެއްބާރުލުމާ އެކުގައި ކަމަށް ވަޒީރު ވިދާޅުވިއެވެ. ވަކީން ޚާއްޞަކޮށް ކޮންޓްރޯލަރ ޖެނެރަލް އޮފް އިމިގްރޭޝަން ކޮމިޝަނަރ އޮފް ޕޮލިސް (ރިޓަޔަރޑް) އަޙުމަދު ފަސީޙް ފޯރުކޮށްދެއްވި އެހީތެރިކަމަށް ވަޒީރު ޝުކުރު އަދާކުރެއްވިއެވެ. އަދި މި ވިއުގަ ފަރުމާކޮށް ޤާއިމުކުރުމުގައި މީރާގެ މުވައްޒަފުން ކުރެއްވި ފަންނީ މަސައްކަތަށް ވެސް ވަޒީރު ތައުރީފުކުރެއްވިއެވެ.