އެއަރބަސް ކުންފުނީގެ ބޯޑު މެމްބަރުން އިންޑިއާގައި

މަތިންދާބޯޓު އުފައްދާ ދުނިޔޭގެ އެންމެ ބޮޑު ކުންފުނި އެއަރބަސްގެ ބޯޑު މެމްބަރުން އިންޑިއާގެ ވެރިރަށް ދިއްލީއަށް ވަޑައިގެންފިއެވެ.

4 ދުވަހުގެ ދަތުރެއްގައި އެއަރބަސް ކުންފުނީގެ ބޯޑު މެމްބަރުން އިންޑިއާއަށް ވަޑައިގަތީ ސެޕްޓެމްބަރު 29 ގައެވެ. ބޯޑު ބައްދަލުވުމެއް ދިއްލީގައި ބޭއްވުމުގެ އިތުރުން، އިންޑިއާގެ ބޮޑުވަޒީރު ނަރެންދްރަ މޯދީއާއި، ސިވިލް އޭވިއޭޝަން މިނިސްޓަރ ރަމޯހަން ނައިޑޫއާއި އެބޭފުޅުން ބައްދަލުކުރެއްވިއެވެ.

އެއަރބަސް ކުންފުނީގެ ބޯޑު ދިއްލީއަށް ވަޑައިގަތުމުން، އެކުންފުންޏަށް އިންޑިއާ ބާޒާރު މުހިއްމު ވެފައިވާ މިންވަރު ދޭހަކޮށްދޭކަމަށް މުހައްލިލުން ބުނެއެވެ. އިންޑިއާގެ ބޮޑު ދެ އެއަރލައިންކަމަށްވާ އިންޑިގޯ އާއި އެއަރ އިންޑިއާއިން މިހާރުވެސް ގިނަ އަދަދެއްގެ އެއަރބަސް މަތިންދާބޯޓަށް ވަނީ އޯޑަރު ދީފައެވެ. އިންޑިގޯއިން މިހާތަނަށް 1370 މަތިންދާބޯޓަށް އޯޑަރު ދިންއިރު، އެއަރބަސްއިން ޑެލިވަރކޮށްފައިވަނީ އަދި 463 މަތިންދާބޯޓެވެ. އެހެންކަމުން އަދި 907 މަތިންދާބޯޓު އިންޑިގޯއަށް ފޯރުކޮށްދޭން ޖެހެއެވެ. އިންޑިގޯ ކުންފުނިން އެކުންފުނީގެ ފްލީޓް ބޮޑުކޮށް،މަންޒިލްތައް އިތުރުކުރުމަށް މަސައްކަތްތަކެއް ދަނީ ކުރަމުންނެވެ. އިންޑިއާގެ ވައިގެ ދަތުރުފަތުރުގެ ބާޒާރަކީ ދުނިޔޭގެ އެންމެ ބާރަށް ކުރިއަރަމުން އަންނަ އެއް މާކެޓެވެ.

ޓާޓާ ކުންފުނީގެ އެއަރ އިންޑިއާއިންވެސް 361 މަތިންދާބޯޓަށް އޯޑަރު ދީފައިވާއިރު، އެއަރބަސްއިން އަދި ޑެލިވަރކުރީ 17 މަތިންދާބޯޓެވެ.

މަތިންދާބޯޓު ވިއްކުމުގެ އިތުރުން، މަތިންދާބޯޓުތަކަށް ބޭނުންވާ ކޮމްޕޯނަންޓްތައް ފޯރުކޮށްދިނުމުގައިވެސް އިންޑިއާއަކީ އެއަރބަސްއަށް މުހިއްމު މާކެޓެކެވެ. އެގޮތުން ކޮމްޕޯނަންޓްތައް ގަތުމަށް އިންޑިއާގެ 40 ވަރަކަށް ސަޕްލަޔަރުންނާއެކު އެއަރބަސްއިން މަސައްކަތްކުރެއެވެ. އަދި އެއަރކްރާފްޓް އެސެމްބްލީ ލައިނެއްވެސް އިންޑިއާގައި ޤާއިމްކުރުމަށް އެކުންފުނިން ދަނީ މަސައްކަތްކުރަމުންނެވެ.