އެމްޑީޕީގެ "ތަފާތު" ރޭ ޖަލްސާއިން ނުފެނުނު!
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަކީ އެޕާޓީގެ ސިޔާސީ ހަރަކާތްތައް ހިންގަން ފެއްޓި ފުރަތަމަ ދުވަހުން ފެށިގެން ވަރަށް ފޯރީގައި ކަންތައްތައް ކުރާ ޕާޓީއެކެވެ. މުޒާހަރާއެއްވިޔަސް މުޅި ރަށް ގުޑުވާލާ، ޖަލްސާއެއް ވިޔަސް އެބީދައިން ކުރާ ބަޔެކެވެ.
އެމްޑީޕީގެ ސަޕޯޓަރުންނަށްވެސް އެމްޑީޕީ ގަޔާވާ މައިގަނޑު އެއް ސަބަބަކީ މިއީއެވެ. ރާއްޖޭގެ ދިމިކްރާތީ ނިޒާމުގެ ތެރެއިން ޚިޔާލު ފާޅުކުރުމުގެ މިނިވަންކަން އެންެމެ ފުރިހަމައަށް ބޭނުންކޮށް، އެމްޑީޕީއަކީ އެޕާޓީގެ އެޖެންޑާތައް ހާސިލްކުރަން ވަރަށް މޮޅަށް ދަންނަ ޕާޓީއެކެވެ.
އިިދިކޮޅު ޕާޓީއެއްގެ ގޮތުގައި އެމްޑީޕީއަކީ ވަރަށް ހަރަކާތްތެރި ޕާޓީއެކެވެ. ޕޯޑިއަމްތަކުގައާއި ސިޔާސީ އެއްވުންތަކުގައި އެމްޑީޕީގެ ބަލާޣާތްތެރި ވާހަކަދެއްކުންތެރިން ދައްކާ ބަސްތަކަކީ ޚަބަރުތަކުގެ ފަލަސުރުހީއަށް އަަރައި، އެވާހަަކަ އަޑުއަހައި ބަަލަންހުރި މީހާގެ ލޭ ކައްކުވާލާނޭފަދަ ވާހަކަތަކެކެވެ.
އެހެނަސް، ރޭ އެމްޑީޕީގެ މަޖިލިސް ކެމްޕެއިން ފެއްޓި ރަސްމިއްޔާތު ފެނިގެން ދިޔައީ ދިމާ އިިދިކޮޅަށެވެ.
ރޭގެ ޖަލްސާއަކީ ސަރުކާރުގެ އިއްތިހާދު ވެެރިކަމަށް އައިފަހުން ބޭއްވުނު ފުރަތަަމަ ބޮޑު ޖަލްސާއެވެ. ތެދެކެވެ. އެޖަލްސާގައި ގުނާ އަދަދުކުރަން ދަތި މިންވަރަށް މީހުން އޮތެވެ. މުޅި ރާއްޖޭގައި އެމްޑީޕީއަށް އޮތް ތާއިދު ވަރަށް މޮޅަށް ދައްކާލިއެވެ. އެހެނަސް، ރޭގެ ޖަލްސާ ދިޔައީ އެހެން ޖަލްސާތަކާއި އަޅާބަލާއިރު ވަނދުކޮށް ކަމަށް ގިނަ ފަރާތްތަކުން ދަނީ ބުނަމުންނެވެ.
އެޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދުވެސް ވާހަކަފުޅު ދެއްކެވިއެވެ. ކުޅަދާނަ ދެ ވާހަކަދެއްކުންތެެރިން ކަމުން އެތަނުގައި ވާހަކަ އަޑުއަހަން ތިިބި ފަރާތްތަކުގެ ޝައުގު ދަމައިގަނެވުނެވެ. ނަމަވެސް، ކުރިން އެޕާޓީގެ ޖަލްސާތަކުގައި އަޑުއިވޭހާ ޖޯޝުގެ އަތްތިލަބަޑިތަކާއި ހަޅޭކެއް، ރޭ މަދުން ނޫނީ އިވިފައެއް ނެތެވެ. އަދި މީގެ އިތުރުން ރޭގެ ޖަލްސާގެ ޒީނަތްތެރިކުރުން، އެމްޑީޕީގެ ޖަލްސާއަކާއި އަޅާބަލާއިރު ވަރަށް މަދުކަން ފާހަގަވެ، ގިނަ ފަރާތްތަކުން އެވާހަކަ ދެއްކިއެވެ.
ފަހަރެއްގައި ރޭގެ ޖަލްސާގެ ވަނދުކަމަކީ، ކޯލިޝަން ތެރޭގައި އުފެދިފައިވާ ނުތަނަވަސްކަމުގެ އަލިފާން ގަނޑަށް އިތުރު ތެޔޮ ނޭޅުމަށް ކުރިކަމަކަށް ވެދާނެއެވެ.
ނޫނީ ސަރުކާރު ހިންގާ ޕާޓީކަމަށްވުމުން ހިފަހައްޓަންޖެހޭ މިންގަނޑެއް ހިފެހެއްޓީކަމަށް ވެދާނެއެވެ. ހަގީގަތުގައި އެމްޑީޕީ ވިޔަސް ކޮންެމެ ޖަލްސާއެއް ފޯރިގަދަވާކަށް ނުޖެހޭނެއެވެ. ނަަމަވެސް އޮޑު ކަމަކަށް ވީމާ އެވާހަކަ ޢާންމުންދައްކާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
