އަދީބަށް ތައުރީފްކޮށް ފޯބްސް ޖޯޖިއާގައި ލިޔުނު ލިޔުން އެ ނޫހުން ނަގައިފި

ދިވެހިރާއްޖޭގެ ކުރީގެ ނައިބު ރައީސް އަޙްމަދު އަދީބުއާ ގުޅޭގޮތުން ބައިނަލްއަޤްވާމީ މަޝްހޫރު މަޖައްލާ "ފޯބްސް" ގެ ޖޯޖިއާ އެޑިޝަން ("ފޯބްސް ޖޯޖިއާ") ގައި ޝާއިޢުކުރި ލިޔުމެއް އެ ނޫހުން ނަގައިފިއެވެ.

"ދަ ރައިޒް، ފޯލް، އެންޑް ރީއިންވެންޝަން" ގެ ނަމުގައި ޝާއިޢުކުރި މި ލިޔުން ޝާއިޢުކުރީ ޖޫން މަހުގެ އެއްވަނަ ދުވަހުއެވެ. އެ ލިޔުން މީސް މީޑިއާގައި ހިއްސާކޮށް މީގެ ދެދުވަސްކުރީން އަދީބު ވަނީ ލިޔުން ޝާއިއުކުރި ކަމަށްޓަކައި ފޯބްސް އަށް ޝުކުރުވެސް އަދާކޮށްފައެވެ.

ނަމަވެސް އެ ލިޔުން މިހާރު ވަނީ އެ ނޫހުން ނަގާފައެވެ.

އެ ލިޔުން ނެގުމަށްފަހު ފޯބްސް ޖޯޖިއާގެ ވެބްސައިޓުގައި ލިޔެފައިވާ ނޯޓިސްގައި ބުނެފައިވަނީ، އެ ލިޔުން ޝާއިޢުކުރުމާއި، މައުލޫމާތު ހޯދި ގޮތާއި، އަދި އެޑިޓޯރިއަލް މިންގަނޑުތަކާ ގުޅޭގޮތުން އުފެދިފައިވާ ސުވާލުތައް އެ ނޫހުން މުރާޖަޢާކުރަމުންދާތީ، އެ މުއްދަތުގައި ލިޔުން ނަގާފައިވާ ކަމަށެވެ.

ނަމަވެސް، މި މައްސަލަ ބަލަން ޖެހުނު ސީދާ ސަބަބެއް އަދި ތަހުގީގުކުރަމުންދަނީ ކޮން ކަންތައްތަކެއް ކަމެއް އެ ނޯޓިސްގައި ތަފުސީލުކޮށްފައެއް ނުވެއެވެ.

ފޯބްސް ޖޯޖިއާއަކީ ބައިނަލްއަޤްވާމީ ފޯބްސް ބްރޭންޑުގެ ދަށުން ޖޯޖިއާ އަދި ބައިނަލްއަޤްވާމީ ފަރާތްތަކަށް ޚާއްޞަކޮށްގެން ވިޔަފާރިއާއި، އިޤްތިޞާދާއި، ލީޑަރޝިޕްގެ ދާއިރާތަކުގެ ޚަބަރާއި މައުލޫމާތު ގެނެސްދޭ މަޖައްލާއެކެވެ.

އަދީބަކީ ރާއްޖޭގައި މިހާތަނަށް ހިންގި އެންމެ ބޮޑު ޚިޔާނާތް ކަމަށްވާ އެމްއެމްޕީއާރުސީގެ ބޮޑު ޚިޔާނާތުގެ މުގުލުގައި ހުރި އެކެކެވެ. ފަތުރުވެރިކަމަށް ފަޅުތަކާއި ރަށްތައް ދޫކޮށްގެން ދައުލަތަށް ލިބެންޖެހޭ ފައިސާއަށް ޚިޔާނާތްތެރިވި މި މައްސަލައިގައި އަދީބުގެ މައްޗަށް ކުށް ސާބިތުވެ، ޖަލު ޙުކުމްތަކެއްވެސް އިއްވިއެވެ. ނަމަވެސް ރައީސް ޞާލިޙްގެ ސަރުކާރުން ވަނީ އޭނާއަށް މަޢާފުދީ ޖަލުން މިނިވަންކޮށްފައެވެ.