މާފުށީގެ އަލަށް ހިއްކި ބިމުން ރެކޯޑް އަގެއްގައި ބިން ވިއްކަން ހުޅުވާލައިފި

ކ.މާފުށީގެ ދެކުނު ފަރާތުން އަލަށް ހިއްކި ބިމުން ގޯތިތަކެއް ވިއްކަން ނިންމައި، ބިން ވިއްކަން ހުޅުވާލައިފިއެވެ.

މާފުށި ކައުންސިލުން ނެރުނު އިއުލާނެއްގައި ބުނީ، މާފުށީގައި އަލަށް ހިއްކުނު ބިމުން ރަށުގެ ލޭންޑްޔޫސް ޕްލޭނާއި އެއްގޮތަށް އެތަނުން 6 ގޯތި ވިއްކުމަށް ހުޅުވާލާފައިވާ ކަމަށެވެ. އެހެންކަމުން، ގޯތި ގަތުމަށް ޝައުޤުވެރިވާ ފަރާތްތަކަށް ބިޑުފޮތް ގަތުމަށާއި، ބިޑު ހުށަހެޅުމަށް މާފުށި ކައުންސިލުން ވަނީ ދަޢުވަތު ހުޅުވާލާފައެވެ.

ވިއްކަން ހުޅުވައިލި ގޯތީގެ ސައިޒުތައް އުޅެނީ 1،961.42 އާއި 1،961.48 އަކަފޫޓާ ދެމެދުގަ އެވެ. ކައުންސިލުގެ ބިޑު ޑޮކިޔުމަންޓުގައިވާ ގޮތުން، މާފުށިން ވިއްކާ މި ހަ ގޯތީގެ ބީލަމުގެ އެންމެ ކުޑަ އަގަކީ އަކަފޫޓަކަށް 2،000 ރުފިޔާ އަށް ވާއިރު، މިއީ  މާލެ ފިޔަވައި ރާއްޖޭގެ އެހެން ރަށަކުން ބިން ވިއްކާ އެންމެ ބޮޑު އަގުކަން ފާހަގަކޮށްލަން ޖެހެއެވެ.

ބިޑު ފޮތް ވިއްކުމަށް ހަމަޖެހިފައިވަނީ 24 މާރިޗު 2024 ވަނަ ދުވަހުން ފެށިގެން 24 އެޕްރީލް 2024 ވާ ބުދަ ދުވަހުގެ ނިޔަލަށް ސަރުކާރު ބަންދު ނޫން ކޮންމެ ދުވަހެއްގެ 9:00 އިން 13:00 އަށް އެ ރަށުގެ ކައުންސިލް އިދާރާގެ ރިސެޕްޝަނުން ކަމަށް މާފުށި ކައުންސިލުން ކުރި އިއުލާން ގައި ވެއެވެ.

ބިޑުފޮތެއްގެ އަގަކީ 30،000 ރުފިޔާ ކަމަށްވައިރު، ބިޑް ސެކިޔުރިޓީގެ ގޮތުގައި 100،000 ރުފިޔާ ބަހައްޓަންޖެހެ އެވެ. ބިޑު ކާމިޔާބުކުރާ ޖުމްލަ އަގު 30 ދުވަހުގެ ތެރޭގައި ކައުންސިލަށް ދައްކާ ނިންމުމުގެ އިތުރުން، ބިޑް ކާމިޔާބު ކުރާ ފަރާތްތަކުން އެޑްވާންސެއްގެ ގޮތުގައި 50،000 ރުފިޔާ މާފުށި ކައުންސިލަށް ދައްކަން ޖެހެއެވެ.

މާފުށި ކައުންސިލުން ބުނީ ބިޑު ހުށައެޅުމަށް ހަމަޖެހިފައިވަނީ 05 މެއި 2024 ވާ އާދީއްތަ ދުވަހު ކަމަށެވެ.