ދިވެހިންގެ އެހީ ޣައްޒާއަށް ވައްދަން ހުއްދަ ލިބިއްޖެ؛ އޭޝިޔާއިންވެސް މި ހުއްދަ ލިބުނީ އައިއޭސީއަށް އެކަނި!

ހައްދުފަހަނައަޅާފައިވާ އިޒްރާއިލްގެ ސިފައިން ފަލަސްތީނަށް ދެމުން ގެންދާ ޢުދުވާނީ ހަމަލާތަކުގައި ހާލުގައި ޖެހިފައިވާ މުސްލިމުންނަށް އެހީވުމަށް ދިވެހިންގެ ފަރާތުން ދީފައިވާ އެހީ ޣައްޒާއަށް ވެއްދުމުގެ ހުއްދަ ލިބިއްޖެއެވެ.

އިންޓަނޭޝަނަލް އެއިޑް ކެންޕެއިން، އައިއޭސީން 'ވޮއިސް' އަށް މައުލޫމާތު ދީފައިވާ ގޮތުގައި، ޣައްޒާގެ ބޭރުން އެތެރެއަށް އެހީ ވެއްދުމުގެ ހުއްދަ ލިބެނީ ދުނިޔޭގެ ވަރަށް މަދު ޖަމިއްޔާ ޖަމާއަތްތަކަށް ކަމަށެވެ. އަދި، ޔުނައިޓެޑް ނޭޝަންސް(އދ) އާއި ރެޑްކޮރޮސް އައި ރެޑް ކްރެސެންޓް ފިޔަވައި ޣައްޒާގެ ބޭރުން އެތެރެއަށް އެހީ ވެއްދޭ ހަމައެކަނި ބަޔަކަށް، އައިއޭސީ ހިމެނޭ ކޯލިޝަން ވާނެ ކަމަށްވެސް އެ ޖަމިއްޔާއިން ފާހަގަކުރެއެވެ.

އައިއޭސީގެ އެ ކޯލިޝަންގައި ހިމެނެނީ، އައިއޭސީގެ އިތުރުން، އިނގިރޭސިވިލާތުގެ އަލް ޚައިރު، އެމެރިކާގެ ލައިފް އަދި ތުރުކިޔޭގެ އައި.ޑީ.ޑީ.އީ.އެފް އެވެ.

އެހެންކަމުން، މުޅި އޭޝިޔާއިންވެސް ޣައްޒާގެ ބޭރުން އެހީވެއްދޭ ހަމަ އެކަނި ޖަމިއްޔާ އަކަށް އައިއޭސީ ވެގެންދާނެކަމަށް އެ ޖަމިއްޔާއިން ފާހަގަކުރެއެވެ.

އައިއޭސީން އިތުރަށް ބުނީ, ޣައްޒާ ވެއްދޭ އެހީގެ ތެރޭގައި މިވަގުތަށް އެންމެ ބޭނުންވާ ބޭސްފަރުވާއަށް ބޭނުންވާ ތަކެއްޗާއި، އެނޫންވެސް ހައިޖީން ޕްރޮޑަކްޓްސް ތައް ފަދަ އަސާސީ ބޭނުންތަކަށް ބޭނުންވާނެ ތަކެތި ހިމެނޭ ކަމަށެވެ. އަދި އެ ކޯލިޝަންގެ އެހީގެ ގާފިލާތައް ވެގެން ދާނީ ޣައްޒާއަށް ލިބިގެންދާނެ ވަރަށް ބޮޑު އެހީއެއް ކަމަށް ވެސް އެ ޖަމިއްޔާ އިން ފާހަގަކުރެއެވެ.

ދިވެހިންގެ އެހީ ހިމެނޭ މި އެހީގެ ޣާފިލާތައް މިއަދު ނޫނީ މާދަމާގެ ވަގުތެއްގައި ރަފަހް ބޯޑަރ މެދުވެރިކޮށް ޣައްޒާއަށް ވެއްދޭނެ ކަމަށް އައިއޭސީން ބުނެއެވެ.

މީގެ ކުރިންވެސް އައިއޭސީންވެސް ދިވެހިންގެ އެހީ ޣައްޒާގެ ރައްޔިތުންނަށް ފޯރުކޮށްދީފައެވެ. އެތަކެތި ފޯރުކޮށްދީފައިވަނީ، ޣައްޒާތެރެއިން ގަނެގެން، އެތަނުގައި ތިބި ބޭނުން ޖެހިފައިވާ މީހުންނަށެވެ. އެ އެހީގެ އިތުރުން، ހާލުގައި ޖެހިފައިވާ 400 ޢާއިލާ އަކަށް، ކޮންމެ ޢާއިލާ އަކަށް 500 ޑޮލަރު އެހީގެ ގޮތުގައި ބަހާފައިވާއިރު، ހޮސްޕިޓަލު ތަކަށް ތެލާއި، އަދި އެތަނުގައި އެޑްމިޓް ކޮށްފައި ތިބި ކުޑަ ކުދިން ހިތްހަމަ ޖައްސާލުމަށް ކުޅޭ ތަކެތިވެސް ދިވެހިންގެ އެހީގައި އައިއޭސީން ވަނީ ބަހާފައެވެ.