ޕާޓީ ނިޒާމަށްފަހު މިއީ އަމާންކަމާ އޮމާންކަމާއެކު ވެރިކަން ބަދަލުވާ ފުރަތަމަ ފަހަރު: ރައީސް
ދިވެހިރާއްޖޭގެ ވެރިކަމުުގެ ނިޒާމުގެ ތެރެއަށްސިޔާސީ ނިޒާމު ތައާރަފުވި ފަހުން މިއީ، އަމާންކަމާ އޮމާންކަމާއެކު ވެރިކަން ބަދަލުވާ ފުރަތަމަ ފަހަރު ކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ޖުމްހޫރީ ދުވަހުގެ މުނާސަބަތުގައި ދިވެހި ޤައުމާއި މުޚާތަބު ކުރައްވައި ރައީސް ދެއްވި ހިތާބުގައު އެމަނިކުފާނު ވިދާޅުވީ، ޕާޓީ ނިޒާމު ރާއްޖެއަށް ތައާރަފުކުރި ފަހުން މި ފަހަރު ފިޔަވައި އެހެން ފަހަރުތަކުގައި ވެރިކަން ބަދަލުވެފައި ވަނީ ހަމަ އެކަނި ވޯޓަކުން ނޫންކަމަށެވެ.
އެގޮތަށް އެ މަނިކުފާނު ސިފަ ކުރެއްވި ގޮތުގައި މީގެ ކުރިން އެކަން ހިނގާފައި ވަނީ"ވޯޓުން ނުވިއްޔާ ކޯޓުން ނުވަތަ މަގުމަތިން" ވެރިކަން ބަދަލު ކުރުމުގެ އުސޫލެއްގެ ގޮތުގައެވެ.
ގިނަ ޕާޓީ އެކުލެވޭ ސިޔާސީ ނިޒާމަށް ރާއްޖެ ބަދަލުވި ފަހުން އޮމާންކަމާއެކު ވެރިކަން ބަދަލުވުމުގެ މަރުހަލާ ހިނގަމުން މިދަނީ ހަމައެކަނި މިފަހަރު. މީގެކުރިން އެކަން ހިނގާފައި އޮތީ ވޯޓުން ނުވިއްޔާ، ކޯޓުން ނުވަތަ މަގުމަތިން
ރައީސް ޞާލިޙް
އެގޮތުން ގިނަ ސިޔާސީ ޕާޓީތަކެއް ބައިވެރިވެ ރާއްޖޭގައި އެކުލަވާލެވުނު ފުރަތަމަ ސަރުކާރު، ކުރީގެ ރައީސް މުހައްމަދު ނަޝީދުގެ ވެރިކަން 2012 ވަނަ އަހަރު ނިމުމަކަށް އައި އައުމަށް އިޝާރާތް ކުރައްވައި ރައީސް ވިދާޅުވީ، 2013 ވަނަ އަހަރުގެ ރިޔާސީ އިިންތިހާބުގެ ފުރަތަަމަ ބުރު ސުޕްރީމް ކޯޓުން ބާތިލުކޮށް ދެވަނަ ފަހަރަށް ވޯޓުލުން ކުރިއަށް ގެންދަން ޖެހުނީ މިފަދަ އުސޫލެއްގެ ތެރެއިން ކަމުގައެވެ.
އެގޮތުން މި ފަހަރު ވެރިކަން އޮމާންކަމާ އެކު ބަދަލުވާކަން ފާހަގަކުރައްވައި ރައީސް ޞާލިހު ވިދާޅުވީ، ކުރިއަށް އޮތްތަނުގައި ވެސް ރާއްޖޭގައި އޮންނަ ރިޔާސީ އިންތިހާބުތަކާ، ވެރިކަން ބަދަލުވެގެން ދިއުން މިގޮތުގައި ހިނގަމުން ދާތަން ދިވެހިރައްޔިތުން ދެކޭ ހިތްވާނެ ކަމަށެވެ.
މި ހޯދުނު ކާމިޔާބީތަށް ހިފަހައްޓާ، ދަމަހައްޓާ ގައުމުގައި އެކަން އަށަގެންނެވުމަކީ ދެން އަންނަ ހުރިހާ ސަރުކާރުތަކާ ވެރިންގެ މަސްއޫލިއްޔަތެއް. ސަރުކާރުތަށް ބަދަލުވާނެ، ވެރިން އައިސް ގޮސްވާނެ. ގާއިމުވެ، ދާއިމުވެ، ދެމިއޮންނާނީ ގައުމާ ރައްޔިތުން
ރައީސް ޞާލިޙް
ރައީސް ޞާލިހް މިފަދައިން ވިދާޅުވެފައިވާއިރު، އެމަނިކުފާނު ނިސްބަތްވެވަޑައިގަންނަވާ ޕާޓީ، އެމްޑީޕީން އަންނަނީ ރައީސުލްޖުމްހޫރިއްޔާ ކަމުގެ ހުވާ ކުރައްވާ ރަސްމީޔާތުގައި އިހުތިޖާޖު ކުރަން ނިންމާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
