ޚާރިޖީ ގުޅުންތައް އެންމެ ބޮޑަށް ބަދަހި ކުރެވުނީ މި ފާއިތުވި ފަސް އަހަރު: ރައީސް ޞާލިޙް

ރާއްޖެއާއި ދުނިޔޭގެ އެކި ޤައުމުތަކާއި ދެމެދު އޮންނަ ޚާރިޖީ ގުޅުން އެންމެ ބޮޑަށް ބަދަހިވެފައިވަނީ މި ފާއިތުވި ފަސް އަހަރުގެ ތެރޭގައި ކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ޖުމްހޫރީ ދުވަހުގެ މުނާސަބަތުގައި ދިވެހި ޤައުމާއި މުޚާތަބު ކުރައްވައި މިއަދު ދެއްވި ޚިތާބުގައެވެ.

މިއަދުގެ ޚިޠާބުގައި ރައީސް އިބްރާހިމް މުހައްމަދު ޞާލިހް ވިދާޅުވީ، މި ފާއިތުވި ފަސް އަހަރަކީ ދިވެހި ރާއްޖޭގެ ތާރީޚުގައިވެސް ބައިނަލްއަގުވާމީ ގައުމުތަކާއި އޮންނަ ޚާރިޖީ ގުޅުން އެންމެ ބޮޑަށް ބަދަހި ކުރެވުނު ފަސް އަހަރު ކަމުގައެވެ.

ވޭތުވި ފަސް އަހަރަކީ، ރާއްޖޭގެ ތާރީޚުގައި ޚާރިޖީ ގުޅުން، ބައިނަލްއަޤްވާމީ ދުނިޔެއާ އެންމެ ބޮޑަށް ބަދަހިކުރެވުނު މުއްދަތު.

ރައީސް ޞާލިޙް

ރައީސްގެ ވާހަކަފުޅުގައި އިތުރަށް ވިދާޅުވީ، މި ފާއިތުވި ފަސް އަހަރުގެ ތެރޭގައި،  ސިޔާސީ ގުޅުމާއި ޑިޕްލޮމެޓިކް ފުޓްޕްރިންޓް، ދުނިޔޭގެ 185 ޤައުމަށް ފުޅާކުރެވިފައިވާކަމަށާއި އޭގެ ދަށުން މިހާރު ވިސާއާއި ނުލައި ދިވެހިންނަށް ދުނިޔޭގެ 101 ޤައުމަކަށް ދަތުރު ކުރެވޭނެ ކަމަށެވެ.

އަދި މީގެ އިތުރުން އދ ގައި ދިވެހިރާއްޖޭގެ ފަރާތުން ކުރެވުނު މަސައްކަތްތައް ހަރުދަނާކޮށް ފުޅާކުރުމުގެ ނަތީޖާއެއްގެ ގޮތުން 76 ވަނަ އދ ގެ އާންމު މަޖިލީހުގެ ރިޔާސަތު ބެލެހެއްޓި ޤައުމަކަށްވެސް ރާއްޖެ ވެގެން ގޮއްސައި ވާކަމުގައި ވެސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހްގެ ޚިތާބުގައި ވިދާޅުވެފައިވެއެވެ.

އ.ދ. ގައި ރާއްޖެއިން ކުރަމުންގެންދާ މަސައްކަތްތައް ވަނީ އިތުރަށް ފުޅާކޮށް ހަރުދަނާކުރެވިފައި. ނަތީޖާއެއްގެ ގޮތުން، އ.ދ. ގެ 76 ވަނަ އާންމު މަޖިލީހުގެ ރިޔާސަތު ރާއްޖެއިން ބެލެހެއްޓި

ރައީސް ޞާލިޙް

މީގެ އިތުރުން ރައީސްގެ ޚިޠާބުގައި ވަނީ މި ފަހުގެ ތާރީޚެއްގައި ދުނިޔެ ދުށް އެންމެ ލާއިންސާނީ އަދި އަނިޔާވެރި ޖަރީމާ ކަމުގައިވާ ފަލަސްޠީނުގެ ބިމަށް ވެރިވެ އިސްރާއީލުގެ ސިފައިން އެ ޤައުމުގެ ރައްޔިތުންނަން ދެމުން ގެންދާ ހަމަލާތަކަށް އަލި އަޅުވާލައި އެ މައްސަލައިގައި އަބަދުވެސް ދިވެހީން ތިބޭނީ ފަލަސްޠީނާއެކުގައި ކަމުގައި ވިދާޅުވެފައެވެ.

ރާއްޖޭގެ ޚާރިޖީ ކާމިޔާބީއާ ގުޅޭގޮތުން އެއްޗެއް ދެންނެވުމުގެ ކުރިން، އަޅުގަނޑުމެން ދިވެހިންގެ ހިތްތައް މިއަދު ބަރުވެފައި ވަނީ، ފަލަސްޠީނުގެ މުސްލިމް އަޚުންނާއި އުޚްތުންނަށް އިޒްރޭލުން ދެމުންދާ ލާއިންސާނީ އަނިޔާތަކުން. ފަލަސްޠީނުގެ މިނިވަންކަމަށް ދިވެހިން ކުރާ ތާއީދު ދުވަހަކުވެސް ބަދަލެއްނުވާނެ.

ރައީސް ޞާލިޙް