"ޝަރުޢީ ދާއިރާއާއި ފުލުހުން ސިޔާސީ ނުފޫޒުން އެއްކިބާ ވުމުގެ ފުރުސަތު މި ފަސް އަހަރު ލިބުނު"
ޝަރުޢީ ދާއިރާއާއި ފުލުހުންނާއި ސިފައިން އަދި މިނިވަން މުއައްސަސާތައް ސިޔާސީ ނުފޫޒުން މިނިވަންވުމަކީ، ދިވެހި ޤައުމަށް ކޮންމެހެން ބޭނުންކަމެއް ކަމަށާއި އެ ފުރުސަތު މި ފާއިތުވި ފަސް އަހަރު ދުވަހުގެ ތެރޭގައި ލިބިގެން ދިޔަ ކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ވިދާޅުވެއްޖެއެވެ.
ޖުމްހޫރީ ދުވަހުގެ މުނާސަބަތުގައި ދިވެހި ޤައުމާއި މުޚާތަބު ކުރައްވައި ރައީސް މިއަދު ދެއްވި ޚިތާބުގައި ވިދާޅުވެފައިވަނީ، ސިޔާސީ ނުފޫޒުން އެއްކިބާވެ މަސައްކަތްކުރުމުގެ ފުރުޞަތު ޝަރުޢީ ދާއިރާއާއި ފުލުހުންނާއި ސިފައިން އަދި މިނިވަން މުއައްސަސާތަކަށް މި ފަސް އަހަރުގެ ތެރޭގައި ލިބިގެން ދިޔަ ކަމުގައެވެ.
ރާއްޖޭގެ ޝަރުޢީ ދާއިރާއާއި ފުލުހުންނާއި ސިފައިން އަދި މިނިވަން މުއައްސަސާތައް ސިޔާސީ ނުފޫޒުން މިނިވަންވުމަކީ، ޤައުމަށް ކޮންމެހެން ބޭނުންކަމެއް. ނުފޫޒުން އެއްކިބާވެ މަސައްކަތްކުރުމުގެ ފުރުޞަތު އެ ދާއިރާތަކަށް މި ފަސް އަހަރު ލިބިދެވުނު.
ރައީސް ޞާލިޙް
ހަމަ އެޔާއެކު އެމަނިކުފާނު ވިދާޅުވީ، މި ފާއިތުވި ފަސް އަހަރުގެ ތެރޭގައި ވެރިކަމުގެ ޙައްޤުތައް އަދާކުރުމުގައި ހަމަހަމަކަމާއެކު އިޖުތިމާޢީ ޢަދާލަތު ޤާއިމުކުރުމަށް ޚާއްސަ އިސްކަމެއް އެ މަނިކުފާނު ދެއްވައިފައި ވާނެކަމަށެވެ. އަދި އޭގެ އިތުރުން ރަށްތަކުގެ މެދުގައި އޮތް ޒަމާންވީ ފަރަޤު ކުޑަކުރުމަށް ރައީސް ޞާލިޙް ގެ ސަރުކާރުން އިސްކަން ދެއްވިކަން ފާހަގަ ކުރައްވައި ރައީސް ވިދާޅުވީ، ފަރުދީގޮތުން ރައްޔިތުންނަށް ޚިދުމަތްކުރެވެން އޮތް ކޮންމެ ފުރުސަތެއްގެ ބޭނުން އެ މަނިކުފާނުގެ ސަރުކާރުން ހިއްޕަވައިފައިވާނެ ކަމަށެވެ.
ރަށްތަކުގެ މެދުގައި އޮތް ޒަމާންވީ ފަރަޤު ކުޑަކުރުމަށް ސަރުކާރުން އިސްކަންދިނިން. ޚިދުމަތްތައް ހަމަހަމަކުރެވި، ވަސީލަތްތައް ފުރިހަމަކޮށް، ކޮންމެ ރަށެއްގެ، ކޮންމެ ރައްޔިތެއްގެ މައްޗަށް ސަރުކާރުން އަދާކުރަންޖެހޭ ޙައްޤުތަކަށް އިސްކަންދިނިން.
ރައީސް ޞާލިޙް
މިއަދު ރައީސް ދެއްވި ޚިތާބުގައި ވަނީ، ހެޔޮ ވެރިކަމެއް ކުރެއްވުމަށް އެމަނިކުފާނަށް އެއްބާރުލުން ދެއްވި އެންމެހައި ފަރާތްތަކަށް ޝުކުރު އަދާކުރައްވައި އައު ސަރުކާރަށް ކާމިޔާބީއާށާއި ދިވެހި ރައްޔިތުންނަށް އުފާ ފާގަތި ކަމަށް އެދި ވަޑައިގަންނަވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
