އާރަށު މައްސަައިގެ އިސްތިއުނާފު އަޑުއެހުމެއް މާދަމާއަށް ތާވަލުކޮށްފި
ޕީޕީއެމްގެ ރައީސް، ރައީސް އަބްދުﷲ ޔާމީން އަބްދުލްގައްޔޫމުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ ވ އާރަށު މައްސަލައިގެ އަޑުއެހުމެއް މާދަމާއަށް ތާވަލުކޮށްފި އެވެ.
އެކަން ރައީސް ޔާމީންގެ ގާނޫނީ ޓީމުން ވަނީ ކަށަވަރުކޮށްދީފައެވެ. އެގޮތުން އެމަނިކުފާނުގެ ގާނޫނީ ވަކީލު އަބްދުﷲ ޝިޔާޒު ވިދާޅުވީ އެ މައްސަލައިގެ އަޑުއެހުމެއް މާދަމާ މެންދުރު 1:45 އަށް ތާވަލުކޮށްފައިވާ ކަމަށެވެ.
މިދިޔަ ބުރާސްފަތި ދުވަހު ވެސް އެ މައްސަލައިގެ އަޑުއެހުމެއް ބާއްވާފައިވާއިރު، ދަށު ކޯޓުގައި އެ މައްސަލަ ކުރިއަށް ގެންގޮސްފައިވާ ގޮތާއި ގުޅިގެން، ހައިކޯޓުގެ ފަނޑިޔާރުން ވަނީ މުހިންމު ގިނަ ސުވާލުތަކެއް ކުރައްވާފަ އެވެ.
އެ ދުވަހުގެ އަޑުއެހުމުގައި ފަނޑިޔާރުން ވިދާޅުވީ އެ މައްސަލައިގައި އަދިވެސް އެ ކޯޓުން ސާފުކުރަން ބޭނުންވާ ބައެއް މުހިންމުކަންކަން ހުރިކަމަށެވެ. މާދަމާގެ އަޑުއެހުމުގައި އެ ކަންކަން ސާފުކުރައްވާނެއެވެ.
އެ މައްސަލައާއި ގުޅިގެން މިހާރު ރައީސް ޔާމިނުގެ ފަރާތްޕުޅުންނާއި، އެ މައްސަލައިގައި ހިމެނޭ ޔޫސުފް ނައީމުގެ ފަރާތްޕުޅުން ވަނީ އިސްތިއުނާފީ ނުކުތާތައް ހުށައަޅާ، އެ ނުކުތާތަކަށް ދައުލަތުން ޖަވާބު ވެސް ދީފައެވެ.
އެ މައްސަލައިގެ އަޑުއެހުންތައް އަލުން ފަށާފައިވަނީ ވަރަށް ގިނަ ދުވަސްތަކެއްގެ މެދުކެނޑުމަކަށްފަހުގައި ކަން ފާހަގަކޮށްލެވެއެވެ. އަދި އެ މައްސަލަ ލަސްވެގެން ދިއުމަކީ ރައީސް ޔާމިނުގެ ވަރަށް ގިނަ ހައްގުތަކެއް ގެއްލިގެންދާ ކަމެއްކަން ފާހަގަކޮށް ގާނޫނީ ވަކީލުން ވެސް ގެންދަވަނީ ކަންބޮޑުވުން ފާޅުކުރައްވަމުން ނެވެ.
ރައީސް ޔާމީނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ މައްސަލަ ގާތްގަނޑަކަށް ނިމުމަކާއި ހަމަޔަށް ގޮސްފައިވާއިރު، މިވަގުތު އެމަނިކުފާނު ގެންދަވަނީ އެ މުއާމަލާތާއި ގުޅިގެން އެމަނިކުފާނުގެ މައްޗަށް ދައުލަތުން އުފުލި ދައުވާތައް ސާބިތުވާކަމަށް ކަނޑައަޅާ މިދިޔަ ޑިސެމްބަރުމަހުގެ 25 ގައި ކުރި ޖަލު ހުކުމް ތަންފީޒު ކުރައްވަމުން ނެވެ.
ރިޔާސީ އިންތިޚާބަށް ފަހު އެމަނިކުފާނު ގެކޮޅަށް ބަދަލުކުރައްވާފައިވާއިރު، މިހާރު އެމަނިކުފާނުގެ ހުކުމަށް ވެސް ވަނީ ކޮންމެވެސް ލުޔެއް ދެއްވާފައެވެ. އެގޮތުން މާލެ ސަރަހައްދުގައި ހިމެނޭ މާލެ، ވިލިމާލެ އަދި ހުޅުމާލެއަށް ވަޑައިގެން އާންމުންނާއި ބައްދަލުކުރުމުގެ ހުއްދަ މި ލުޔާއެކު އެމަނިކުފާނަށް ލިބިގެން ގޮސްފައިވާކަމަށް ވަނީ މައުލޫމާތު ލިބިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
