ރައީސް ނަޝީދުގެ އިތުބާރު ނެތް މައްސަލައިގައި ބަންޑާރަ ނައިބުގެ ލަފާ ހޯދަނީ

އެމްޑީޕީގެ ފަރާތުން ރައްޔިތުންގެ މަޖިލީހަށް ހުށަހަޅައިފައިވާ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް މައްސަލައިގައި ބަންޑާރަ ނާއިބު ލަފާ ހޯދުމަށްމަޖިލީހުގެ އާއްމު ކޮމިޓީން ނިންމައިފިއެވެ.

މިފަދައިން ނިންމާފައިވަނީ މިއަދު ބޭއްވި ރައްޔިތުންގެ މަޖިލީހުގެ އާންމު ކޮމެޓީގެ ބައްދަލުވުމުގައި އަލިފުށީ ދާއިރާގެ އެމްޑީޕީގެ މެންބަރު މުހައްމަދު ރަޝީދު ހުސައިންގެ ހުށަހެޅުމަކުންނެވެ.

އެގޮތުން އާއްމު ކޮމިޓީއަށް ލިބިފައިވާ އިޚުތިޔާރުގެ ތެރެއިން ގަވާއިދާ ޚިލާފަށް މަޖިލީހުގެ ނައިބު ރައީސް އީވާ އަބްދުﷲއާއި ވިލުފުށީ ދާއިރާގެ މެންބަރު ޙަސަން އަފީފް މިއަދުގެ ޖަލްސާ ނިންމަވާލައްވާފައިވާކަމަށް ބުނެ، އެ މައްސަލައިގައި މަޖިލީހުގެ އަމީން އާއްމަށް އެހީތެރިވުމުގެ ގޮތުން ނަޝީދުގެ މައްސަލަ ކުރިއަށް ގެންދިޔުމަށް ބަންޑާރަ ނައިބުގެ ލަފައެއް ހޯދުމަށް މުހައްމަދު ރަޝީދު ހުސައިން ވަނީ ހުށަހަޅައިފައެވެ.

ހަމަ އެހެންމެ އެ މައްސަލައާ ގުޅިގެން މަޖިލީހުގެ މަސައްކަތްތައް ހުއްޓުމަކަށް އައިސްފައި އޮތް އޮތުމަށް ހައްލެއް ހޯދަން ޖެހޭ ކަމަށާއި އެ މައްސަލައަށް ގޮތެއް ނިންމުމަށް ވީހާވެސް އަވަހަށް ހައްލު ހޯދަން ޖެހޭނެކަމަށް ރަޝީދުގެ ހުށަހެޅުމުގައި ވެއެވެ.

މިގޮތުން އެ ބައްދަލުވުމުގައި ބައިވެރިވި ހަތް މެންބަރުންގެ އަގުލައްބިއްޔަތުން ވަނީ ބަންޑާރަ ނައިބު އިބްރާހީމް ރިއްފަތުގެ ލަފާ ހޯދުމަށްފަހު އެ ލަފާ އަމީން އާންމް ފާތިމަތު ނިއުޝާއަށް އެރުވުމަށް ފާސްކޮށްފައެވެ.