އީވާއާއި އަފީފު މަޖިލީހުގެ އިމްތިޔާޒަށް އަރައިގެންފައިވާކަމަށް ސުލޫކީ ކޮމެޓީން ނިންމައިފި

ރައްޔިިތުންގެ މަޖިލީހުގެ ރައީސް މުހައްމަދު ނަޝީދު ވަކިކުރަން އެމްޑީޕީން ހުށަހެޅި ގަރާރު ބޭރުކޮށްލީ ގަވައިދާ ހިލާފަށް ކަމަށާއި، އެ އެ މައްސަލަ ކުރިއަށް ގެންދިއުމަށް ފުރަތަމަ ތާވަލުކުރި ޖަލްސާގެ ރިޔާސަތުގައި އިންނެވި ވިލުފުށީ ދާއިރާގެ މެމްބަރު ހަސަން އަފީފާއި، އެފަހުން ތާވަލުކުރި ޖަލްސާގެ ރިޔާސަތު ބެލެހެއްޓެވި މަޖިލީހުގެ ނައިބު ރައީސް އީވާ އަބްދުالله މަޖިލީހުގެ އިމްތިޔާޒަށް އަރައިގެންފައިވާ ކަމަށް މަޖިލީހުގެ ސުލޫކު ކޮމެޓީން ނިންމައިފި އެވެ.

ރިޔާސަތުން މަޖިލީހުގެ އިމްތިޔާޒަށް އަރައިގެންފައިވާކަމަށް ބުނެ ނަޝީދުގެ އިތުބާރުނެތްކަމުގެ މައްސަލަ ހުށައަޅާފައިވާ އެމްޑީޕީން ވަނީ ސުކޫލު ކޮމެޓީއަށް މައްސަލައެއް ހުށައަޅާފައެވެ. އެ މައްސަލައާއި ގުޅިގެން މިއަދުގެ 12:00 ގައި ބޭއްވި ކޮމެޓީ ބައްދަލުވުމުގައި ބައިވެރިވި މެމްބަރުންގެ އަގުލަބިއްޔަތުން ވަނީ އަފީފާއި އީވާ މަޖިލީހުގެ އިމްތިޔާޒަށް އަރައިގެންފައިވާކަމަށް ފާސްކޮށްފަ އެވެ.

ނަޝީދުގެ އިތުބާރުނެތްކަމުގެ މައްސަލައާއި ގުޅިގެން މިއަދު 9:00 ގައި ބޭއްވި ޖަލްސާގައި ވަނީ، ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ކަނޑައަޅައި ދިނުމަށް ހުށައަޅާފައިވާ ގަރާރަކީ މަޖިލީހުގެ ގަވައިދުގައި ބަޔާންކުރާ ގަރާރެއްގެ ސިފަތައް ފުރިހަމަ ނުވާ ގަރާރެއްކަމަށް ކަނޑައަޅައި، ގަރާރު ބޭރުކޮށްލާފަ އެވެ.

މަޖިލީހުގެ ވިލުފުށީ ދާއިރާގެ މެމްބަރު ހަސަން އަފީފު ރިޔާސަތުގައި އިންނަވާ އެ ގަރާރު ބޭރުކޮށްލާފައިވާއިރު، އެއީ ގާނޫނާއި ޚިލާފަށް ނިންމި ނިންމުމެއްކަން ފާހަގަކޮށް މިއަދުގެ 11:30 ހާއިރަށް އިތުރު ޖަލްސާއެއް ތާވަލުކުރި އެވެ. ރިޔާސަތުގައި އިންނެވީ މަޖިލީހުގެ ނައިބު ރައީސާ އީވާ އެވެ.

ބޭރުކޮށްލި ގަރާރު އަލުން ކުރިއަށް ނުގެންދެވޭނެކަމަށް ކަނޑައަޅާއި އީވާ ވެސް ވަނީ ޖަލްސާ ނިންމާލާފަ އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންދެވިގެން، އެކަން ކުރެވޭނެ ގޮތެއް ހޯދުމަށް އެމްޑީޕީން ވަނީ ސުޕްރިމް ކޯޓަށް ދުސްތޫރީ މައްސަލައެއް ހުށައަޅާ، އެކަން ކުރެވޭނެ ހުކުމެއް ސުޕްރިމް ކޯޓުން ހޯދާފައެވެ.

އެގޮތުން މަޖިލީހުގެ ނައިބު ރައީސް ހާޒިރުވެވަޑައި ނުގަންނަވާ ހާލަތުގައި ވެސް އެ މައްސަލަ ކުރިއަށް ގެންދެވޭނެކަމަށް ސުޕްރިމް ކޯޓުން ކަނޑައަޅާފައިވާއިރު، ނަޝީދު ނިސްބަތްވެވަޑައިގަންނަވާ ދަ ޑިމޮކްރެޓްސްއިން މިއަދުގެ ޖަލްސާގައި ބުނެފައިވަނީ އިތުބާރު ނެތްކަމުގެ ގަރާރު ގަވައިދާއި ޚިލާފުކަމަށެވެ.

އެގޮތުން ގަރާރު ހުށައަޅާއިރު ދީބާޖާއެއް އޮންނަން ޖެހޭ ކަމަށާއި، ނަޝީދުގެ އިތުބާރު ނެތްކަމުގެ ގަރާރުގައި އެބައި ފުރިހަމަ ނުވާކަން ޑިމޮކްރެޓސްގެ މެމްބަރުން ފާހަގަކުރެއްވި އެވެ.

މިއަދުގެ ޖަލްސާގައި ޑިމޮކްރެޓްސްގެ މެމްބަރުން ވަނީ އެ ގަރާރު މިހާރު ހުށައަޅާފައި އޮތް ގޮތަށް ކުރިއަށް ގެންދިޔަ ނުދެއްވާނެކަމަށް ވިދާޅުވެ އިހުތިޖާޖުކޮށް އަޑުއުފުއްލަވާފައެވެ.