މަޖިލީހުގައި އެއް މެންބަރަކު ގިނަ ވެގެން ދޭންވާނީ ދެ ދައުރު: ހީނާ ވަލީދު

މަޖިލީހުގައި އެއް މެންބަރަކަށް ގިނަ ވެގެން ދެދައުރު އަދާކުރުމަށް ފުރުސަތު ދިނުމަކީ ބޭނުންވާ ގޮތެއް ނޫން ކަމަށް ހީނާ ވަލީދު ވިދާޅުއްވެއްޖެއެވެ.

ދިއްގަރު ދާއިރާގެ ބަހުސްގައި ވާހަަކަދައްކަވަން އެދާއިރާއަށް ވާދަކުރައްވާ ކެނޑިޑޭޓު ނަމްބަރު އެކެއް ހީނާ ވަލީދު ވިދާޅުވެފައިވަނީ މިހާރު މަޖިލީހުގެ ތިއްބެވި މެންބަރުންގެ މުސާރައާއި ދޭތެރޭގައި އޭނާ ކަންބޮޑުވާ ކަމަށެވެ. އަަދި މަޖިލިސް މެންބަރުންގެ މުސާރައަކީ އެމީހުން އަމިއްލަ އަށް ކަނޑައެޅުމުގެ ބަދަލުގައި ވަކި މުސްތަގިއްލު ކޮމިޝަނަކުން ހަދާ އެއްޗެއް ކަމަށް ވާނެ ކަމަށް އުއްމީދު ކުރައްވާ ކަމަށް ހީނާ ވިދާޅުވިއެވެ.

ހީނާ ވިދާޅުވީ މަޖިލިސް މެންބަރުންގެ މުސާރައިގެ ވާހަކަ އެކަނި ދައްކައިގެން ނުފުދޭ ކަމަށާއި، މަޖިލީހުގައި އެއް މެންބަރަކަށް ދެދައުރަށް ވުރެ ގިނައިން ވާދަކުރުމަށް ފުރުސަތު ދިނުމަކީ އޭނާ ގަބޫލު ކުރާ ގޮތެއް ނޫން ކަމަށް އޭނާ ވިދާޅުވިއެވެ. އެއް މެންބަރަކު ގިނަ އަހަރު ތަކެއް ވަންދެން މަޖިލީހުގައި މެންބަރެއްގެ ދައުރު އަދާކުރައްވާނަމަ މަޖިލީހުގެ ތެރެއިން ބާރާއި ނުފޫޒު ބޭނުންކޮށްގެން ކޮރަޕްޝަަނަށް މަގުފަހިވާ ވަރަށް ގިނަ ކަންތަައްތައް ކުރުުގެ ފުރުސަތު ފަހިވެގެންދާ ކަމަށް އޭނާ ވިދާޅުވިއެވެ.

ހީނާ ވިދާޅުވީ މަޖިލީހުގައި އާ ވިސްނުންތަކާއި އާ ޚިޔާލުތަކަށް ފުރުސަތު ދޭން ޖެހޭ ކަމަށެވެ. އަދި އަންހެނުންނަށް ހައްގުވާ މިންވަރު މަޖިލީހުގައި ހޯދަދިނުމަށްޓަކައި މަޖިލީހުގައި އަންހެނުންގެ ދައުރު އިތުރުވާން ޖެހޭ ކަމަށާއި، އެ ފުރުސަތު ހޯދައިދިނުމަށް އޭނާ އަށް ވޯޓްދެއްވުމަށް ހީނާ ވަނީ ވިދާޅުވެފައެވެ.

ހީނާ ވިދާޅުވީ ރާއްޖެއިން ކޮރަޕްޝަން ހުއްޓުވަން ބޭނުންވާނަަމަ މަޖިލީހުގެ މެންބަރުން ނަޒާހަތްތެރިވާން ޖެހޭނެ ކަމަށާއި، ރައްޔިތުންގެ މަޖިލީހުގެ މެންބަރުންނަަކީ ސަރުކާރު ޒިންމާދާރު ކުރުވުމަށް ހޮވާ މީހުން ކަމަށެވެ. އަދި ޖުޑިޝަރީ ޒިންމާދާރު ކުރުވުމަކީ ވެސް މަޖިލިސް މެންބަރުންގެ ޒިންމާއެއްކަމަށް ހީނާ ވަނީ ވިދާޅުވެފައެވެ.

ހީނާވަނީ ދިއްގަރު ދާއިރާއަށް އޭނާ ހޮވިއްޖެނަމަ ދާއިރާއަށް ކޮށްދެއްވާނެ ކަންތައްތައް ވިދާޅުވެ ދާއިރާގެ ރައްޔިތުންނަށް އުއްމީދު ގެނެސްދެއްވާފައެވެ. އަދި އޭނާ މަޖިލީހަށް ހޮވިއްޖެނަމަ އެންޑިޑިފެކްޝަން ގާނޫނު އަނބުރާ ގެނައުމަަށް މަސައްކަތް ކުރައްވާނެ ކަމަށް ވެސް ވަނީ ވިދާޅުވެފައެވެ.