ފޮރިން އިންވެސްޓްމަންޓް ގާނޫނު ތަސްދީގު ކުރި ނަމަވެސް، އަމަލުކުރަން ފަށާނީ 3 މަސްފަހުން: އުޝާމް

ފޮރިން އިންވެސްޓްމަންޓް ގާނޫނު މިއަދު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ތަސްދީގުކުރައްވާ، ގެޒެޓް ކުރެއްވި ނަމަވެސް، އެ ގާނޫނަށް އަމަލު ކުރަންފަށާނީ ތިން މަސް ފަހުން ކަމަށް އެޓާނީ ޖެނެރަލް އަހުމަދު އުޝާމް ވިދާޅުވެއްޖެއެވެ.

ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އުޝާމް ވިދާޅުވީ، ގާނޫނަށް އަމަލުކުރަން ފަށާތާ ތިން މަސް ތެރޭގައި، ރާއްޖޭގައި އިންވެސްޓް ކުރެވޭނެ ދާއިރާތައް ކެބިނެޓްގެ ލަފައާއި އެކު އިކޮނޮމިކް މިނިސްޓަރު ކަނޑައަޅުއްވަން ޖެހޭނެ ކަމަށެވެ.

މިހާރު ރާއްޖޭގައި އިންވެސްޓްކޮށްގެން ތިބި ފަރާތްތަކާއި މެދު އަމަލު ކުރާނެ ގޮތް ގާނޫނުގައި ވަރަށް ސާފުކޮށް ބަޔާންކޮށްފައިވާނެކަމަށާއި، މުއްދަތުތައް ކަނޑައަޅައި އެ މުއްދަތުތަކުގެ ތެރޭގައި މިނިސްޓްރީން އައު ކުރަން ޖެހޭ ހުއްދަތައް އައު ކުރެވިގެންދާނެ ކަމަށް ވެސް އުޝާމް ވިދާޅުވިއެވެ.

މި ގާނޫނު މިއަދު ތަސްދީގު ކުރެއްވިނަމަވެސް، މިގާނޫނަށް އަމަލުކުރަން ފަށާނީ ތިން މަސް ދުވަސްފަހުން. ގާނޫނަށް އަމަލުކުރަން ފަށާތާ 3 މަސް ދުވަހުގެ ތެރޭގައި ކެބިނެޓްގެ ލަފައާއި އެކީގައި މިނިސްޓަރު ކަނޑައަޅުއްވަން ވާނެ ރާއްޖޭގައި އިންވެސްޓް ކުރެވޭނެ ދާއިރާތަކަކީ ކޮބައިކަން،"

އުޝާމް ވިދާޅުވިއެވެ.

ރާއްޖޭގައި އިންވެސްޓް ކުރެވޭނެ ދާއިރާތައް ކަނޑައަޅާއިރު، މިހާރު އިންވެސްޓް ކުރާ ފަރާތަކީ އެ ދާއިރާއާއި ގުޅޭ ގޮތުން އިންވެސްޓް ކުރާ ފަރާތަކަށް ނުވާނަމަ، އެ ފަރާތްތަކާއި މެދު އަމަލު ކުރެވޭނެ ގޮތްތައް ވެސް އާ ގާނޫނުގައި ބަޔާންކޮށްފައިވާނެ ކަމަށް އުޝާމް ވިދާޅުވިއެވެ.