އީވާ ނައިބު ރައީސްކަމުން ވަކިކުރަން އެމްޑީޕީ ޕީޖީން ފާސްކޮށްފި
މަޖިލީހުގެ ނައިބު ރައީސްގެ މަގާމުން އީވާ އަބްދުالله ވަކިކުރުމަށް ރައްޔިތުންގެ މަޖިލީހުގެ މެޖޯރިޓީ ޕާޓީ އެމްޑީޕީގެ ޕާލަމެންޓްރީ ގްރޫޕުން ފާސްކޮށްފި އެވެ.
އެމްޑީޕީގެ ޕާލަމެންޓްރީ ގުރޫޕުން އެފަދައިން ނިންމާފައިވަނީ މިއަދު ބޭއްވި ޕީޖީ ބައްދަލުވުމުގައެވެ. އަދި އީވާގެ އިތުބާރު ނެތްކަމުގެ މައްސަލަ ހުށައެޅުމަށް ޕީޖީން ނިންމާފައިވާކަން ޕީޖީ ލީޑަރު މުހައްމަދު އަސްލަމް ވަނީ ކަށަވަރުކޮށްދެއްވާފަ އެވެ.
އެމްޑީޕީން ވަނީ އީވާގެ އިތުބާރުނެތްކަމުގެ މައްސަލަ ހުށައެޅުމަށް މެމްބަރުންގެ ސޮއި ހޯދުމުގެ މަސައްކަތް ވެސް ފަށާފައެވެ. އެހެން ނަމަވެސް މިހާތަނަށް ސޮއި ހޯދުނު އަދަދު އަދި އެމްޑީޕީގެ ޕީޖީން ހާމަކޮށްފައެއް ނުވެއެވެ.
މީގެ ކުރިން ވެސް އެމްޑީޕީން ވަނީ މަޖިލީހުގެ ނައިބު ރައީސް އީވާގެ އިތުބާރު ނެތްކަމުގެ މައްސަލައެއް ހުށައަޅާފައެވެ.
އެހެން ނަމަވެސް ރިޔާސީ އިންތިޚާބުގެ ދެވަނަ ބުރުގައި އެ މައްސަލަ ޕާޓީން އަނބުރާ ނަގާފައިވާއިރު، ދެވަނަ ފަހަރަށް އީވާގެ އިތުބާރު ނެތްކަމުގެ މައްސަލަ ހުށައެޅުމަށް އެމްޑީޕީން މަސައްކަތްކޮށްފައިވަނީ މަޖިލީހުގެ ރައީސް މުހައްމަދު ނަޝީދު މަޖިލީހުގެ ރިޔާސަތުން ވަކިކުރުމަށް ހުށައަޅާ މައްސަލައިގެ ގަރާރު އިއްވުމަށް ބޭއްވި ޖަލްސާ ކުރިއަށް ނުގެންދެވޭނެކަމަށް ކަނޑައަޅާ ނިންމާލުމާއި ގުޅިގެންނެވެ.
އިއްޔެ މަޖިލީހުގައި އެކަމަށް ޖަލްސާއެއް އެޖެންޑާ ކުރެވުނު ނަމަވެސް އީވާ ވަނީ އެއީ، ބޭރުކޮށްލާފައިވާ ގަރާރެއްކަން ފާހަގަކޮށް އެ ޖަލްސާ ކުރިއަށް ނުގެންދިއުމަށް ނިންމާފައެވެ.
އެމްޑީޕީގެ މެމްބަރުން ސިފަކުރެއްވީ އެއީ މަޖިލީހުގެ އިމްތިޔާޒަށް އަރައިގަތުން ކަމަށެވެ. އަދި އެ މައްސަލަ ސުލޫކު ކޮމެޓީއަށް ހުށައަޅާ ވަނީ އެ ގޮތަށް ފާސް ވެސް ކޮށްފައެވެ.
އީވާ ވަކިކުރަން ސޮއި ހޯދަން ފެށީވެސް އެކަން އެގޮތަށް ފާސްކުރުމަށް ފަހުގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
