ގަވައިދާ ޚިލާފަށް ގޯތީގެ ލިޔެކިޔުންތައް ނޯޓަރައިޒް ނުކޮށްދޭން އަންގައިފި

ރާއްޖެއިން ބޭރުގައި ދިރިއުޅޭ ފަރާތްތަކުގެ ލިޔުންތައް ޤަވައިދާ ޚިލާފަށް ނޯޓަރައިޒްކޮށް ނުދިނުމަށް ބާ ކައުންސިލުން އަންގައިފިއެވެ.

ރާއްޖެއިން ބޭރުގައި ދިރިއުޅޭ ފަރާތްތަކުގެ ލިޔުންތައް ޤަވައިދާ ޚިލާފަށް ނޯޓަރައިޒްކޮށްދެމުންދާ މައްސަލާގައި ބާ ކައުންސިލުން މިއަދު ނެރުނު ނޫސް ބަޔާނެއްގައި ބުނެފައިވަނީ ޕަބްލިކް ނޯޓަރީންގެ ގޮތުގައި މަސައްކަތްކުރާ ބައެއް ގާނޫނީ ވަކީލުން، ރާއްޖެއިން ބޭރުގައި ދިރިއުޅޭ ފަރާތްތަކުގެ، ގޯތީގެ ލިޔެކިއުންތައް އޮންލައިންކޮށް ނޯޓަރައިޒް ކޮށްދޭކަން އެ ކައުންސިލުގެ ސަމާލު ކަމަށް އައިސްފައިވާ ކަމަށާ އެކަން ކަމަކީ ޕަބްލިކް ނޯޓަރީއެއްގެ ގޮތުގައި މަސައްކަތް ކުރުމުގެ ގަވާއިދާ ޚިލާފް ކަމެއް ކަމަށެވެ.

ޕަބްލިކް ނޯޓަރީއެއްގެ ގޮތުގައި މަސައްކަތް ކުރުމުގެ ގަވާއިދުގައި ބަޔާންކޮށްފައިވާ ގޮތުން، ލިޔުމެއްގައި ސޮއި ކޮށްފައި ވަނީ، ނޯޓަރައިޒް ކޮށްދޭ ފަރާތުގެ ކުރިމަތީގައިކަން ކަށަވަރު ކުރުމަށްޓަކައި ނޯޓަރައިޒް ކޮށްދޭ ލިޔުންތަކުގައި ސޮއި ކުރަންވާނީ، ނޯޓަރައިޒް ކޮށްދޭ ވަކީލުގެ ހާޒިރުގައެވެ. އަދި އޮންލައިންކޮށް ޕަބްލިކް ނޯޓަރީގެ ޚިދުމަތްދެވޭނީ ގާނޫނު އަސާސީން ނުވަތަ ގާނޫނަކުން ބާރު ލިބިގެން އިއުލާން ކޮށްފައިވާ ދަފްތަރުކުރުން މަނާ ހާލަތްތަކުގައި އަޅާފައިވާ ފިޔަވަޅެއްގެ ސަބަބުން، ޚިދުމަތް އެދޭ ފަރާތާއި ގާނޫނީ ވަކީލާއި ބައްދަލުވެވެން ނެތް ޚާއްސަ ހާލަތް ތަކުގައެވެ.

އެހެންކަމުން، ބާ ކައުންސިލުން ބުނީ، މި މައްސަލަ އަކީ ނޯޓަރީއެއްގެ ގޮތުގައި މަސައްކަތް ކުރުމުގެ ގަވާއިދުގެ ދަށުން ޖޫރިމަނާވެސް ކުރެވޭނެ މައްސަލައެއް ކަމަށާ، އަދި އެއީ ވަކީލުންގެ ސުލޫކީ މައްސަލައެއްގެ ގޮތުގައިވެސް ބެލެވޭނެ ކަމެއް ކަމަށެވެ.

ވުމާއެކު ރާއްޖެއިން ބޭރުގައި ދިރިއުޅޭ ފަރާތްތައް އެގޮތަށް އެކަން ކުރުމުގެ ބަދަލުގައި އެ ޤައުމެއްގެ ޕަބްލިކް ނޯޓަރީއެއްގެ ޚިދުމަތް ހޯދުމަށް ބާކައުންސިލުންވަނީ އިލްތިމާސްކޮށްފައެވެ.

"އަދި ރާއްޖެއިން ބޭރުގައި ދިރިއުޅުއްވާ ފަރާތްތަކުގެ އެކި ބޭނުންތަކަށް ލިޔެކިއުންތައް ނޯޓަރައިޒް ކުރުމުގައި އެ ގައުމެއްގެ ޕަބްލިކް ނޯޓަރީއެއްގެ ހިދުމަތް ހޯދުމަށް އޮންނަ އުސޫލުގެ ދަށުން އަމަލުކުރެއްވުމަށް ދަންނަވަމެވެ." ބާކައުންސިލުން ބުންޏެވެ.

ނޯޓަރައިޒް ކުރުމަކީ ގާނޫނީ ލިޔެކިޔުންތަކުގައި ސޮއިކުރާ ފަރާތްތަކުގެ އައިޑެންޓިޓީ ބަލައި، ކަށަވަރުކޮށްދީ، އެފަދަ ލިޔެކިޔުމުގައި ސޮއިކުރާ ފަރާތްތަކަށް އޭގައި ބަޔާންކުރާ އެއްޗެއް އެނގޭކަން ކަށަވަރުކޮށް، އެފަދަ ލިޔެކިޔުންތަކުގައި އެފަރާތްތަކުން ސޮއިކުރިކަން ހެކިކޮށްދީ، އެނޫން ވެސް އެފަދަ ލިޔުންތަކުގެ ސައްހަކަން ކަށަވަރު ކުރުމެވެ.

ޤަވައިދާ ޚިލާފަށް ނޯޓަރައިޒްކޮށްދޭ ވަކީލުން ފުރަތަމަ ފަހަރު 25،000 - 50،000ރ. އާ ދެމެދުގެ އަދަދަކުން ޖޫރިމަނާކުރެވޭއިރު ދެވަނަ ފަހަރު 50،000 - 150،000ރ. އާ ދެމެދުގެ އަދަދަކަށް ޖޫރިމަނާ ކުރެވެއެވެ. އަދި ކުޑަބޮޑު މިނަށް ބަލައި، އިތުރަށް ޖޫރިމަނާކުރެވޭ ކޮންމެ ފަހަރަކު 150،000ރ.، އާއި 300،000ރ. އާއި ދެމެދުގެ އަދަދަކުނ ޖޫރިމަނާ ކުރެވެ އެވެ.