ނަޝީދު ވަކިކުރަން ޖަލްސާ ބޭއްވުމުގެ ބާރު އަމީންއާންމަކަށް ނޯންނާނެ: އީވާ

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރުނެތްކަމުގެ މައްސަލައިގެ ގަރާރަކީ މަޖިލީހުން ބޭރުކޮށްފައިވާ ގަރާރަކަށް ވާއިރު، އެ މައްސަލަ އަލުން އެޖެންޑާކުރުމުގެ ބާރަކީ މަޖިލީހުގެ އަމީންއާންމަށް ލިބިގެންވާ ބާރެއް ނޫންކަމަށް ނައިބު ރައީސް އީވާ އަބްދުالله ވިދާޅުވެއްޖެ އެވެ.

އެކަން ހާމަކޮށް އީވާ ފޮނުއްވި ސިޓީގައި ވިދާޅުވެފައި ވަނީ މަޖިލީހުގެ ނައިބު ރައީސް މަޖިލީހުގެ ރިޔާސަތު ބެލެހެއްޓެވުމަށް ކަނޑައެޅިފައިވާ ޖަލްސާއެއްގެ ރިޔާސަތު ނައިބު ރައީސް ބަލަހައްޓަވަމުން ދަނިކޮށް އެހެން އެއްވެސް ފަރާތަކާއި ޖަލްސާގެ ރިޔާސަތު ހަވާލުކޮށްފި ނަމަ އެއީ އަމީންއާންމު ޤާނޫނު އަސާސީއާއި ގަވައިދުތަކާއި އަދި ސުޕްރިމް ކޯޓުގެ ޙުކުމާއި ޚިލާފުވީކަމަށް ބެލެވޭނެ ކަމަށެވެ.

ރައްޔިތުންގެ މަޖިލީހުގެ ރައީސް މަޤާމުން ވަކިކުރުމުގެ މައްސަލައެއްގެ ރިޔާސަތު ބެލެހެއްޓުމަށް މަޖިލީހުގެ ނައިބު ރައީސް ހަމައެކަނި އުޒުރުވެރިވާ ހާލަތުގައި މަޖިލީހުގެ ގަވައިދުގެ 44 ވަނަ މާއްދާގެ ދަށުން މަޖިލީހުގެ ރިޔާސަތު ބެލެހެއްޓުމަށް ކަނޑައެޅިފައިވާ ފަރާތްތަކަށް ވެސް، އެ މާއްދާގައި ކަނޑައެޅިފއިވާ ތަރުތީބުން އެ ޖަލްސާގެ ރިޔާސަތު ބެލެއްޓިދާނެކަމަށް އީވާ ފާހަގަކޮށްފައި ވެއެވެ. އަދި އެ ނޫން ހާލަތްތަކުގައި އެެހެން މެމްބަރަކަށް ރިޔާސަތު ނުބެލެއްޓޭނެކަމަށް އީވާ ވިދާޅުވި އެވެ.

އެހެން ކަމުން ސުޕްރިމް ކޯޓުގެ ހުކުމުގެ ތަރަހައިން ބޭރުވެ މަޖިލީހުގެ ރައީސް އުޒުރުވެރިނުވާ އެއްވެސް ހާލަތެއްގައި މަޖިލީހުގެ ގަވައިދުގެ 44 ވަނަ މާއްދާއިން ރިޔާސަތު ބަލަހައްޓަން ކަނޑައެޅިފައިވާ ފަރާތަކާއި މަޖިލީހުގެ ރިޔާސަތު ބެލެހެއްޓުން ހަވާލުކުރުމުގެ އެއްވެސް ބާރެއް އަމީންއާންމަށް ލިބިފައި ނުވާކަމަށް އީވާ ވިދާޅުވި އެވެ.

އޭގެ އިތުރުން އީވާ ވިދާޅުވީ ރައްޔިތުން އިންތިޚާބުކޮށްފައިވާ މަޝްވަރާ މަޖިލީހެއްގެ ގޮތް ނިންމުމުގެ ތެރެއަށް، އިދާރީ މަސައްކަތް ހިންގުމަށް ކަނޑައަޅާފައި ހުންނަ އަމީންއާންމު ވެންނެވުމަކީ ރައްޔިތުންގެ މަޖިލީހަށް ރައްޔިތުންދީފައިވާ ބާރަށް އަރައިގަތުން ކަމަށެވެ. އަދި އިންތިޚާބީ އޮނިގަނޑުން ބޭރުން، މަޖިލީހުގެ މިނިވަންކަމާއި މުސްތަގިއްލުކަމާއި ކަރާމާތަށް އަރައިގަތުމަށް ކޮށްއިދެވޭ މަގެއްކަމަށެވެ.

އީވާ ވިދާޅުވީ މަޖިލީހުގެ ރައީސަށް މަޖިލީހުގެ ޖަލްސާއެއްގެ ނުވަތަ ޖަލްސާއެއްގެ ބައެއްގެ ރިޔާސަތު ނުބެލެހެއްޓޭ ހާލަތުގައި މަޖިލީހުގެ ނައިބު ރައީސް މަގާމުން ވަކިނުކުރާހާ ހިނދަކު އެ ޖަލްސާއެއް ނުވަތަ އެ ޖަލްސާއެއްގެ ބައެއްގެ ރިޔާސަތު ބަލަހައްޓާނީ މަޖިލީހުގެ ނައިބުރައީސްކަމަށް ގާނޫނު އަސާސީންނާއި މަޖިލީހުގެ ގަވައިދުގެ ދަށުން އަދި ސުޕްރިމް ކޯޓުގެ ހުކުމަށް ބަލާއިރު ކަނޑައެޅިގެން ބަޔާންކޮށްފައިވާ ކަމަށެވެ.

"މަޖިލީހުގެ ޖަލްސާތަކުގެ ރިޔާސަތު ބެލެހެއްޓުމަށް މަޖިލީހުގެ ނައިބު ރައީސް މަޖިލީހަށް ހާޒިރުވެ ހުންނަވާ ހިނދަކު، މަޖިލީހުގެ ގަވައިދުގެ 44 ވަނަ މާއްދާގެ ދަށުން ރިޔާސަތު ބެލެހެއްޓުމަށް ކަނޑައެޅިފައިވާ އެހެން އެއްވެސް ފަރާތެއް ރިޔާސަތު ހަވާލުވުމަކީ ޤާނޫނު އަސާސީއާއި މަޖިލީހުގެ ގަވައިދާއި، އަދި ސުޕްރިމް ކޯޓުގެ ހުކުމާއި ކަނޑައެޅިގެން ޚިލާފުކަމެއް"

މަޖިލީހުގެ ނައިބު ރައީސް އީވާ

އީވާ މިފަދައިން ވިދާޅުވެފައިވާއިރު، ނަޝީދު ވަކިކުރަން ޖަލްސާއެއް މިއަދަށް ވަނީ ތާވަލުކޮށްފައެވެ. އަދި މި ޖަލްސާގެ ރިޔާސަތު ބަލަހައްޓަވާނީ މަޖިލީހުގެ އެމްޑީޕީއަށް ނިސްބަތްވެވަޑައިގަންނަވާ މެމްބަރު އިބްރާހިމް ޝަރީފުކަމަށް ވަނީ ކަނޑައަޅާފަ އެވެ.