ރައްޔިތުންގެ މަޖިލީހުގެ ރައީސްގެ މަޤާމުން ނަޝީދު އިސްތިޢުފާ ދެއްވައިފި

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަޤާމުން އަމިއްލަ ފުޅަށް އިސްތިއުފާ ދެއްވައިފިއެވެ.

އެ މަނިކުފާނު އެ މަގާމުން އިސްތިއުފާ ދެއްވައިފައިވަނީ އެކަން އަންގަވާ ރައްޔިތުންގެ މަޖިލީހުގެ އަމީން އާންމު އަލްއުސްތާޛާ ފާތިމަތު ނިއުޝާއަށް މިއަދު ފޮނުއްްވި ސިޓީފުޅަކުންނެވެ.

އެ ސިޓީފުޅުގައި ރައީސް ނަޝީދު ވަނީ ރައްޔިތުންގެ މަޖިލީހުގައި މިހާރު ހިނގަމުންދާ މައްސަލަ ތަކާއި އެ މައްސަލަތަކުގެ ސަބަބުން ޑިމޮކްރެޓިކް ވެރިކަމުގެ ނިޒާމަށް ކުރަމުންދާ އަސަރުތަކާއިމެދު ވިސްނަވައިފިކަމަށާއި އެ މަނިކުފާނުގެ ނަޒަރުގައި އެމްޑީޕީގެ ފަރާތުން ޑިމޮކްރެސީގެ އަސާސީ އުސޫލުތަކަށް ނުރައްކާވާފަދަ އަމަލުތައް ހިންގައިފިކަމަށް ދެކިލައްވާ ކަމުގައި ފާހަގަ ކުރައްވައިފައެވެ.

ރައްޔިތުންގެ މަޖިލީހުގެ ރައީސްކަމުން މުހައްމަދު ނަޝީދު އިސްތިއުފާ ދެއްވައިފައިވަނީ ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ ގަރާރު ހުށަހަޅާ ޖަލްސާގެ ރިޔާސަތު ބަލަހައްޓަވަން މަޖިލިހުގެ ނައިބް ރައީސް އުޒުރުވެރިވެއްޖެ ހާލަތެއްގައި އެ ރިޔާސަތު މަޖިލީހުން ކަނޑައަޅާ ފަސް މެމްބަރުންގެ ތެރެއިން މެމްބަރަކަށް ކުރެވޭނެ ކަމަށް ސުޕްރީމްކޯޓުން ހުކުމްކޮށްފައި ވަނިކޮށެވެ.