ލަންކާގެ ސިޔާސީ މަޝްރަހާއި މެދު އެމެރިކާއިން ކަންބޮޑުވުން ފާާޅުކޮށްފި

ސްރީލަންކާގެ ގާނޫނު ހަދާ މަޖިލިސް އުވާލައި، އަލުން އާންމު އިންތިހާބެއް ބޭއްވުމަށް އެގައުމުގެ ރައީސް މައިތިރިޕާލާ ސިރިސޭނާ ނިންމެވުމުން، ލަންކާގެ ސިޔާސީ މަޝްރަހާއި މެދު އެމެރިކާއިން ކަންބޮޑުވުން ފާޅުކޮށްފިއެވެ.

ކޮޅުނބުގައި ހުންނަ އެމެރިކާގެ އެމްބަސީން އިއްޔެ ނެރުނު ބަޔާނުގައި ވަނީ ގާނޫނު ހަދާ މަޖިލީސް އުވާލުމަށް ރައީސް ސިރިސޭނާ ނިންމެވި ނިންމުމަކީ ލަންކާގެ ޑިމޮކްރަސީގެ ބާރުތަކަށް ބޮޑެތި ގޮންޖެހުންތަކެއް ކުރިމަތިވާނެ ކަމަށް ބުނެފައެވެ. އަދި މިކަމުގެ ސަބަބުން ލަންކާގެ އިގްތިސާދާއި ހާރިޖީ ގުޅުންތަކަށް ނޭދެވޭ އަސަރުތަކެއް އައުމުގެ ބިރުވެރިކަން އެބައޮތްކަމަށްވެސް ބަޔާނުގައި ފާހަގަކޮށްފައިވެއެވެ.

މި ބަޔާނުގައި އެމެރިކާއިން ވަނީ ލަންކާގެ ރައީސްއަށް، އެގައުމުގެ ޑިމޮކްރަޓިކް އުސޫލުތަކާއި، ގާނޫނީ ބާރު ނެގެހެއްޓުމަށް ގޮވާލާފައެވެ.

ސްރީލަންކާގެ ގާާނޫނު ހަދާ މަޖިލިސް އުވާލުމަށް އެގައުމުގެ ރައީސް ނިންމެވުމާއި ގުޅިގެން ބޭރުގެ ގިނަ ގައުމުތަކާއި ޑިޕްލޮމެޓިކް މިޝަންތަކުން ދަނީ ކަންބޮޑުވުން ފާޅުކުރަމުންނެވެ.

ސްރީލަންކާގެ އާ އާންމު އިންތިހާބު ބޭއްވުމަށް ހަމަޖެހިފައިވަނީ އަންނަ އަހަރުގެ ޖެނުއަރީ މަހުގެ ފަސްވަނަ ދުވަހުގައެވެ.