އިޒްރޭލު ޕާސްޕޯޓް މަނާކުރަން ހުށަހެޅި ބިލު މާދަމާއަށް އެޖެންޑާކޮށްފި

އިޒްރޭލުން ފަލަޞްޠީނުގައި ހިންގަމުންދާ ޤަޠުލުޢާންމާ ދެކޮޅު ހެދުމުގެ ގޮތުން، އިޒްރޭލުގެ ޕާސްޕޯޓު އޮންނަ މީހުން ރާއްޖެއަށް ވަނުން މަނާކުރުމަށް ޤާނޫނު އިސްލާހުކުރަން ހުށަހެޅި ބިލު ރައްޔިތުންގެ މަޖިލީހުގެ މާދަމާގެ ޖަލްސާއަށް އެޖެންޑާކޮށްފިއެވެ.

އިމިގްރޭޝަންގެ ގާނޫނަށް މި އިސްލާހު ގެންނަން ހުށަހެޅީ ގަލޮޅު ދެކުނު ދާއިރާގެ މެމްބަރު މީކާއިލް ނަސީމެވެ.

އެ ބިލްގެ ފުރަތަމަ ކިޔުން މާދަމާ އިއްވުމަށް ތާޥަލުކުރެވިފައިވާއިރު، ބަހުސް މަރުހަލާ އޮންނާނީ ތިން ދުވަސް ފަހުންނެވެ.

އެމްޑީޕީގެ މެންބަރު، މީކާއިލް މި އިސްލާހު ހުށަހަޅާފައިވާއިރު، އިޒްރޭލު ޕާސްޕޯޓު މަނާކުރަން ގާނޫނަށް އިސްލާހު ގެންނަން ސަރުކާރުން ވެސް ނިންމާފައިވާކަން ފާހަގަކޮށްލެވެއެވެ. ނަމަވެސް ސަރުކާރުން ވިސްނަވާފައިވަނީ މީކާއިލް ހުށަހެޅުއްވި ބިލަށް ތާއީދުކޮށްގެން ކުރިއަށް ދިޔުމަށް ކަމެއް ނުވަތަ އާ ބިލެއް ހުށަހަޅައިގެން ކުރިއަށް ދިޔުންކަމެއް އެނގިފައެއް ނުވެ އެވެ.

އިސްރާއީލުގެ ޕާސްޕޯޓު މަނާކުރުމަށްޓަކައި ގާނޫނު އަސާސީ އަށް ގެންނަންޖެހޭ ބަދަލުތައް ގެނައުމަށް ނިންމާފައިވާކަމަށް ސަރުކާރުން ހާމަކޮށްފައިވަނީ އިއްޔެއެވެ.

ރާއްޖެއިން އިޒްރޭލު ޕާސްޕޯޓު މަނާކުރަން އިއްޔެ ސަރުކާރުން ނިންމެވުމާއެކު، މި ނިންމެވުން ވަނީ މުޅި ދުނިޔޭގެ ސަމާލުކަމަށްވެސް އައިސްފައެވެ. އެގޮތުން ބޭރުގެ ބޮޑެތި ނޫސްތަކުންވެސް މި ޚަބަރު ގެނެސްދީފައިވާއިރު، އިޒްރޭލުގެ ވަޒީރަކު ވަނީ ރާއްޖެއަށް އެ ޤައުމުގެ ފަތުރުވެރިން ނައުމަށާއި، ރާއްޖޭގައި އިޒްރޭލު ފަތުރުވެރިން ތިބި ނަމަ، އަވަހަށް ރާއްޖެއިން ފޭބުމަށް ގޮވާލާފައެވެ.

އިޒްރޭލުގެ ޕާސްޕޯޓު މަނާކުރުމަށް ގޮވާލައި މީގެ ކުރިން ރާއްޖޭގެ ގިނަ ސަރަހައްދުތަކުގައި މީހުން މުޒާހަރާކޮށްފައި ވެސްވެއެވެ. އަދި އިޒްރޭލު ފަތުރުވެރިއަކު ރަށަށް އެރުމުން، އަނބުރާ ފޮނުވާލައިފައިވާކަން ވެސް ފާހަގަކޮށްލެވެއެވެ.