މަޖިލީހުން ދިޔައީ ބޭރު ފައިސާ ހޯދަން މި ސަރުކާރަށް ދަތިތައް ކުރުވަމުން: ސަޢީދު

ނިމިދިޔަ 19 ވަނަ ރައްޔިތުންގެ މަޖިލީހުން، ބޭރު ފައިސާ ހޯދުމަށް މި ސަރުކާރަށް ދަތިތައް ކުރިމަތި ކުރުވަމުން ދިޔަ ކަމަށް އިކޮނަމިކް މިނިސްޓަރ މުހައްމަދު ސަޢީދު ވިދާޅުވެއްޖެއެވެ.

ޕީއެސްއެމްގެ “ރާއްޖެ މިއަދު” ޕްރޮގްރާމްގައި ވާހަކަދައްކަވަމުން ސަޢީދު ވިދާޅުވީ، 2024 ވަނަ އަހަރުގެ ބަޖެޓް 50 ބިލިއަނަށްވުރެ މަތި ނުކުރެއްވުމަށް އޭރުގެ އިންތިޚާބީ ރައީސް އަދި އަދުގެ ރައީސް ޑރ މުހައްމަދު މުޢިއްޒު އެދިލެއްވި ކަމަށެވެ. އަދި އެކަމަށް އޭރުގެ އެމްޑީޕީ މެޖޯރިޓީ އޮތް މަޖިލީހުގެ މާލިއްޔަތު ކޮމިޓީންވެސް އެއްބަސްވި ކަމަށް ސައީދު ވިދާޅުވިއެވެ.

އެމްޑީޕީ އާއްމު އުސޫލުންވެސް ކަންކަން ކުރާ ގޮތް. އެ ދެއްކި ވާހަކައަށް އެވަގުތު އާދޭހޭ ވިދާޅުވެފައި، ދެން ފަހުން އަމަލު ކުރެއްވީ މުޅިން ތަފާތުކޮށް. ވިދާޅުވި އެއްވެސް ކަމެއް އަޑެއް ނޭއްސެވި. އަދި އުނދަގޫ ކުރުމަށް، ބަޖެޓްގެ ތެރެއިންވެސް ދަތި ކުރުމުގެ ކަންކަން ކޮށްފައި ހުރީ.

އިކޮނަމިކް މިނިސްޓަރ މުހައްމަދު ސަޢީދު

އަދި މަޖިލީހުން ފިއްތުންތައް ކުރިމަތި ކުރުވައި ކެބިނެޓަށް ރުހުން ނުދީ، ބޭރުގެ ފައިސާ ހޯދުމަށް ދަތިތައް ކުރިމަތި ކުރުވަމުންދިޔައިރުވެސް ރައީސް މުޢިއްޒު އިސްކުރެއްވީ ކެތްތެރިކަމާއި ހިކުމަތްތެރިކަން ކަމަށް ސަޢީދު ވިދާޅުވިއެވެ.

ރައީސް މުޢިއްޒުގެ ކެބިނެޓްގެ މެންބަރުންނަށްވެސް އެމްޑީޕީން ރުހުން ނުދީ، އަދި ބޭރު ދުނިޔޭގައި އަޅުގަނޑުމެންނަށް ފައިސާ ހޯދޭނެ އެތައް ތަނަކަށްވެސް ހަމަ އުނދަގޫވާ ފަދަ މަސައްކަތްތަކެއް އޭރުގެ މަޖިލިސް ތެރެއިންވެސް ކުރަމުން، ދަތި ކުރަމުން ދިޔައީ.

އިކޮނަމިކް މިނިސްޓަރ މުހައްމަދު ސަޢީދު

ކަންމިހެން ހުރި ނަމަވެސް، ރައީސް މުޢިއްޒުގެ ވެރިކަމުގެ 6 މަސް ދުވަސް ނިންމަވާލައްވައި ކުރިއަށް ވަޑައިގަންނަވަނީ، އެއްވެސް ފައިސާއެއް ޗާޕު ނުކުރައްވާ ކަމަށް ސަޢީދު ވިދާޅުވިއެވެ.

އޭގެ ނަތީޖާއެއްގެ ގޮތުން، ފައިސާގެ އަގު އުފުލި، ކާބޯތަކެތީގެ އަގު ކަންބޮޑުވާ ވަރަށް އުފުލިގެން ނުގޮސް ހަމަސް ދުވަސް ނިންމާލެވިފައިވާ ކަމަށްވެސް ސަޢީދު ވިދާޅުވިއެވެ. އަދި ދިވެހިން ބަނޑަށް ނުޖެހި، އެމްޑީޕީން ރޭވި ފަދައިން ރާއްޖެ ބަނގުރޫޓްވެގެން ވެސް ނުދާ ކަމަށް ސަޢީދު ވިދާޅުވިއެވެ.