އެމްޓީސީސީގެ 53 އިންސައްތަ މުވައްޒަފުންނަކީ ބިދޭސީން: އިންތިޤާލީ ކޮމެޓީ

2018 ވަނަ އަހަރު 1706 މުވައްޒަފުންނާއެކު މަސައްކަތް ކުރަމުން އައި އެމްޓީސީގައި 2023 ވަނަ އަހަރާއި ހަމައަށް އައި އިރު 4771 މުވައްޒަފުން އެބަ ތިބި ކަމަށާއި އޭގެ ތެރެއިން 53 އިންސައްތަ މުވައްޒަފުންނަކީ ބިދޭސީންކަމުގައި އިންތިޤާލީ ކޮމެޓީން ބުނެފިއެވެ.

އިންތިޚާބީ ރައީސް ގެ އޮފީހުގައި މިއަދު ކުރިއަށް ދިޔަ އިންތިޤާލީ ކޮމެޓީން ދައުލަތުގެ ކުންފުނިތަކުގެ މަސައްކަތަކާއި ޚަރަދުތަކާއި ގުޅޭ ރިޕޯޓު ހިއްސާކުރުމުގައި އެ ކޮމެޓީން ބުނެފައިވަނީ އެމްޓީސީސީގައި 53 އިންސައްތަ މުވައްޒަފުން ތިބުމަކީ ކަންބޮޑުވާންޖެހޭ މައްސަލައެއްގެ ގޮތުގައި އެ ކޮމެޓީން ވަނީ ފާހަގަކޮށްފައެވެ.

މީގެ އިތުރުން އެހެން މައްސަލައެއްގެ ގޮތުގައި އެ ކޮމެޓީއަށް ފާހަގަކުރެވުނުކަމަށް އެ ރިޕޯޓުގައި ބުނެފައިވަނީ، އެމްޓީސީސީއަސް އާމްދަނީ ވަންނަ 95 އިންސައްތަ މަޝްރޫޢުތަކަކީ ދައުލަތުން އެ ކުންފުންޏާއި ހަވާލުކުރެވިގެން ކުރިއަށްގެންދާ މަޝްރޫއުތައް ކަމުގައެވެ.

މީގެ އިތުރުން އެމްޓީސީސީއާއި ހަވާލުކުރެވިފައިވަ މަސައްކަތްތަކުގެ ތަފްޞީލަށް އަލި އަޅުވާލައި އެ ކޮމެޓީން ފާހަގަކޮށްފައިވާ ގޮތުގައި، (13،017،417،094.63ރ) ގެ 194 މަޝްރޫޢެއް އެ ކުންފުންޏާއި ހަވަލުކޮށްފައިވާއިރު އޭގެ ތެރެއިން، (4،263،522،116.41ރ) ގެ 77 މަޝްރޫޢެއްގެ މަސައްކަތް އަދި އެ ކުންފުންޏަށް ފެށިފައެއް ނުވެއެެވެ.

މީހެ އިތުރުން 2023 ވަނަ އަހަރު އެމްޓީސީސީއަސް ލިބޭނެކަމަށް އަންދާޒާ ކުރެވޭ އާމްދަނީ 2،824،019،946.68ރ އަށް އަރާއިރު އަހަރުގެ ތިންވަނަ ކުއަރޓަރ އާއި ހަމައަށް ކުންފުންޏަށް ސާފު ފައިދާގެ ގޮތުގައި ލިބުނީ، 123،633،059ރ އެވެ. އަދި 2024 ވަނަ އަހަރަށް އެ ކުންފުންޏަށް ލިބޭނެ ކަމަށް ލަފާކުރެވޭ އާމްދަނީ، 3،337،375،169.72ރ އަށް އަރާކަމަށް އެ ކޮމެޓީގެ ރިޕޯޓުގައި ބުނެފައިވެއެވެ.