މިފްކޯގެ ސީއީއޯ ރިޓަޔާކުރެއްވުމުގެ ނަމުގައި 1 މިލިއަނަށްވުރެ ގިނަ ރުފިޔާ ނަންގަވަން ހުށަހަޅުއްވައިފި

ދައުލަތުގެ މަސް ކުންފުނި މިފްކޯގެ ސީއީއޯ އިސްމާއީލު ފައުޒީ މަޤާމުން ރިޓަޔާކުރެއްވުމުގެ ނަމުގައި 1 މިލިއަނަށްވުރެ ގިނަ ރުފިޔާ ކުންފުނިން ނަންގަވަން ހުށަހަޅުއްވާފައިވާކަން ހާމަވެއްޖެއެވެ.

ފައުޒީއަކީ މިފްކޯގައި މަސައްކަތްކުރައްވާތާ 27 ވަރަކަށް އަހަރުވެފައިވާ ބޭފުޅެކެވެ. ފައުޒީ ސީއީއޯކަމާ ހަވާލުވެވަޑައިގަތުމުގެ ކުރިން އެ ކުންފުނީގެ މުވައްޒަފުން އަމިއްލައަށް އެދިގެން ރިޓަޔާކުރާއިރު ޕެކޭޖެއް ދިނުމަށް އުސޫލެއް ނޯވެއެވެ. އަދި އެފަދައިން ރިޓަޔާމެންޓު ޕެކޭޖުތަކެއް އެ ކުންފުނިން ދެމުން އައިސްފައިނުވެއެވެ. ނަމަވެސް ފައުޒީ މަޤާމާ ހަވާލުވެވަޑައިގެން ރިޓަޔާކުރާ މުވައްޒަފުންނަށް ފައިސާގެ އިނާޔަތް ދިނުމަށް ޚާއްޞަ ޕެކޭޖުތަކެއް ވަނީ އެކުލަވާލައްވާފައެވެ.

މި ޕެކޭޖު އޮންނަ ގޮތުން ރިޓަޔާކުރަން ހުށަހަޅާ މީހާގެ އަސާސީ މުސާރަ ބޮޑުވީ މިންވަރަކަށް އެމީހަކަށް ލިބޭ ޕެކޭޖުވެސް ބޮޑުވާނެއެވެ. މިފަދައިން މިކަން އޮއްވައި ފައުޒީވަނީ މަޤާމާ ހަވާލުވެވަޑައިގެން ސީއީއޯގެ މުސާރަ ބޮޑުކުރައްވާފައެވެ. އެގޮތުން އޭނާއަށް މުސާރައިގެ ގޮތުގައި 67،100 ރުފިޔާ ލިބިވަޑައިގަންނަވައެވެ.

ފައުޒީގެ ބޮޑު މުސާރައާއެކު އޭނާ ރިޓަޔާކުރައްވަން އެދިވަޑައިގަތުމުން އޭނާއަށް ހަމަޖައްސަން ނިންމާފައިވާ ރިޓަޔަމެންޓު ޕެކޭޖަކީ ޖުމްލަ 1،290،532.32 ގެ މައްޗަށް އެކުލެވޭ ޕެކޭޖެކެވެ. މިފައިސާ ދޫކުރަން މިހާރު އަންނަނީ މަސައްކަތްކުރަމުންނެވެ.

2020 ވަަނަ އަހަރު ފައުޒީ އިސްވެ ހުންނަވައިގެން އެކުލަވައިލެއްވި ރިޓަޔާމެންޓު ސްކީމުގެ ދަށުން އޭނާ ރިޓަޔާކުރައްވަން ހުށަހެޅުއްވީ ފާއިތުވި ހޯމަދުވަހުއެވެ.

މިކަމާއި ބެހޭގޮތުން މިފްކޯގައި މަސައްކަތް ކުރާ މުވައްޒަފުން މިފްކޯއަކީ މާލީ ގޮތުން މިހާރުވެސް ބޮޑެތި ގޮންޖެހުންތަކަކާ ކުރިމަތިވެފައިވާ ކުންފުންޏެއް ކަމަށް ފާހަގަ ކުރިއެވެ. އަދި މިފްކޯއިން ދުވަހުން ދުވަހަަށް ކުރަންޖެހޭ ޚަރަދުތައް ހަމަޖައްސަމުންދަނީ ސަރުކާރުން ދޭ ސަބްސިޑީއާއި އެސްޓީއޯ މެދުވެރިކޮށް ކުންފުންޏަށް ލިބޭ ކެޕިޓަލް އިންޖެކްޝަންތަކުން ކަމަށްވާއިރު، މިފަދަ ބޮޑު އަދަދެއްގެ ފައިސާ ރިޓަޔަމެންޓުގެ ގޮތުގައި ހޯއްދަވަން އުޅުއްވުމަކީ ފައުޒީ ކުރައްވާ "އަންއެތިކަލް" ކަމެކެވެ.