ކުރާނެ އިތުރު މަސައްކަތެއް ނެތުމުން މިއަދުގެ މަޖިލީހުގެ ޖަލްސާ ނިންމާލައިފި

ޢީދުގެ ބޮޑު ޗުއްޓީއަށްފަހު މިއަދު ބޭއްވުނު މަޖިލީހުގެ ފުރަތަމަ ޖަލްސާގައި ކުރަން ހުރި މަސައްކަތްތައް ގަޑިއިރެއްގެ ތެރޭގައި ނިންމާލައި ޖަލްސާ ކުރުކޮށްލައިފިއެވެ.

މަޖިލީހުގެ މިއަދުގެ ޖަލްސާގައި އޮތީ ސިވިލް އޭވިއޭޝަން ގާނޫނަށް ގެންނަ އިސްލާހަށް ބަހުސް ކުރުމާއި، ނޭޕާލުން ދިވެހިރާއްޖެއަށް ކަނޑައަޅާ ނަން-ރެސިޑެންޓް ސަފީރު ކަމަށް އައިޝަތު އަޒީމާ އައްޔަނު ކުރުމާމެދު ކޮމިޓީން ނިންމި ގޮތުގެ ރިޕޯޓް ހުށަހެޅުމުގެ އިތުރުން، ސްޕްރީމް ކޯޓުގެ ހުސްވެފައިވާ ފަނޑިޔާރުންގެ މަގާމަށް ދެ ބޭފުޅަކު އައްޔަން ކުރުމާމެދު ޖުޑިޝަރީ ކޮމިޓީން ނިންމި ގޮތުގެ ރިޕޯޓް ހުށަހެޅުމެވެ.

އެގޮތުން، ސިވިލް އޭވިއޭޝަން ގާނޫނަށް އިސްލާހް ގެނައުމުގެ ބިލަށް އެންމެ ދެ މެންބަރުން ބަހުސް ކޮށްފައިވާއިރު، އަޒީމާ ނޮންރެސިޑެންޓް ސަފީރު ކަމަށް އައްޔަނުކުރުމާ ގުޅޭގޮތުން ހުށަހެޅި ރިޕޯޓަށް ބަހުސް ކުރީ އެންމެ މެންބަރެކެވެ.

އަދި ސްޕްރީމްކޯޓުގެ ފަނޑިޔާރު ކަމަށް އަބްދުالله ހަމީދާއި، މުޙައްމަދު ސަލީމް އައްޔަނު ކުރުމާ ގުޅޭ ރިޕޯޓަށް ބަހުސްކުރީ ދެ މެންބަރުންނެވެ.

އެފަހުން ސިވިލް އެވިއޭޝަން އޮތޮރިޓީގެ ގާނޫނަށް އިސްލާހް ގެނައުމުގެ ބިލް ބަލައިގަތުމަށާ، އަޒީމާ އަށާއި، އަބްދުالله ހަމީދުގެ އިތުރުން ސަލީމަށް މަޖިލީހުން ރުހުން ދިނުމަށް ވޯޓަށް އެހުމަށްފަހު، ކުރާނެ އެހެން ކަމެއް ނެތުމުން ޖަލްސާ ވަނީ ނިންމާލާފައެވެ.

ދެން މަޖިލީހުގެ ޖަލްސާއެއް ބާއްވާނީ އަންނަ ހަފްތާގެ ހޯމަ ދުވަހު ކަމަށް ރިޔާސަތުގައި އިންނެވި މަޖިލީހުގެ ރައީސް އަބްދުއްރަޙީމް އަބްالله ވަނީ އިއުލާން ކުރައްވާފައެވެ.