ދަރުމަވަންތަ ހޮސްޕިޓަލުން އެކުއެޓިކް ފިޒިއޮތެރަޕީގެ ހިދުމަތް ދެނީ

ދަރުމަވަންތަ ހޮސްޕިޓަލުން އެކުއެޓިކް ފިޒިއޮތެރަޕީގެ ހިދުމަތް ދޭން ފަށައިފިއެވެ.

އައިޖީއެމްްއެޗުން މިއަދު ނެރުނު ނޫސް ބަޔާނެއްގައި ބުނީ، މިއީ ވާންވެފައިވާ ހުޅުތަކުގައި ހުންނަ ރިހުންތަކާއި މަސްފަށަލަތަކަށް ދޫޖެއްސުމަށް އެހީތެރިވެދޭ ފަރުވާއެއް ކަމަށެވެ. މިއީ 34 ޑިގްރީ ސެލްސިއަސްގައި ހޫނުމިން ހުންނަ ފެންގަނޑެއްގައި ކުރާ ކަސްރަތެކެވެ.

އައިޖީއެމްއެޗުން ބުނިގޮތުގައި، މި ހިދުމަތް ލިބޭނީ ޑޮކްޓަރަކަށް ދެއްކުމަށްފަހު ފިޒިއޮތެރަޕިސްޓްއެއްގެ އިރުޝާދުގެ ދަށުން ފިޒިއޮތެރަޕީ ދޭންޖެހޭކަން އަންގާފައިވާ މީހަކަށެވެ. އެކުއެޓިކް ފިޒިއެތެރަޕީ ދެނީ ދަރުމަނަވްތަ ކޮމްޕްލެކްސްގެ 4 ވަނަ ފަންގިފިލާގައި ކަމަށް އައިޖީއެމްއެޗްގެ ބަޔާނުގައި ވެއެވެ.

ދަރުމަވަންތަ ހޮސްޕިޓަލްގެ ނަމުގައި ރައީސް ޔާމީންގެ ސަރުކާރުން އިމާރާތް ކޮށްފައިވާ 25 ބުރީގެ އިމާރާތް އައިޖީއެމްއެޗްގެ ބައެއްގެ ގޮތުގައި، ދަރުމަވަންތަ ކޮމްޕްލެކްސްގެ ގޮތުގައި ކަނޑައަޅައި އެތަނުން ހިދުމަތް ދޭން ފަށާފައިވަނީ މިއަހަރުގެ މާޗް މަހުގެ ތެރޭގަ އެވެ.

ދަރުމަވަންތަ ހޮސްޕިޓަލުގައި ފިޒިއޮތެރަޕީއަށް ހާއްސަ ގިނަ ފަރުވާތަކެއް ފަށަން ވަނީ ނިންމާފައެވެ. މުޅިން އަލަށް ތޭރަ ފަރުވާއެއް، ފަށަން ބޭނުންވާ ސާމާނު ގެނެސް، ހުރިހާ ތައްޔާރީތަކެއްމިހާރު ވަނީ ނިމިފައެވެ.