ސަރުކާރު ހިއްސާވާ އެސްއޯއީތަކަށް މިދިޔަ އަހަރު، ސަބްސިޑީގެ ގޮތުގައި ދިން އަދަދު 3.9 ބިލިއަން ރުފިޔާގައި

ސަރުކާރު ހިއްސާވާ ކުންފުނިތަކަށް މިދިޔަ އަހަރު ސަބްސިޑީގެ ގޮތުގައި ދިން އަދަދު 3.9 ބިލިއަން ރުފިޔާއަށް އަރާކަމަށް ކުންފުނިތަކުގެ ބަލަދުވެރިފަރާތް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ އަހަރީ މާލީ މުރާޖައާ ރިޕޯޓުން ދައްކައިފިއެވެ.

ޕީސީބީން ނެރެފައިވާ ރިޕޯޓަށް ބަލާއިރު، ފިނޭންސް މިނިސްޓްރީން ވަނީ ނިމިގެންދިޔަ 2023 ވަނަ އަހަރު ސަރުކާރު ހިއްސާވާ ގިނަ ކުންފުނިތަކަކަށް ސަބްސިޑީ އާއި ކެޕިޓަލް ހަރަދު، އަދި ގްރާންޓުގެ ގޮތުގައި ގިނަ އަދަދެއްގެ ފައިސާ ދީފައެވެ.

މި ރިޕޯޓަށް ބަލާއިރު މިދިޔަ އަހަރު އެސްއޯއީތަކަށް ކެޕިޓަލް ހަރަދުގެ ގޮތުގައި 833.1 މިލިއަން ރުފިޔާ އާއި، ސަބްސިޑީގެ ގޮތުގައި 3.9 ބިލިއަން ރުފިޔާގެ އިތުރުން ކެޕިޓަލް ހަރަދުގެ ގޮތުގައި ވަނީ، 192 މިލިއަނަށްވުރެ ގިނަ ރުފިޔާ ދޫކޮށްފައެވެ.

ފިނޭންސުން މިދިޔަ އަހަރު ކެޕިޓަލް ހަރަދުގެ ގޮތުގައި އެންމެބޮޑު އަދަދެއް ދީފައިވަނީ ފަންޑް މެނޭޖްމަންޓް ކުންފުންޏަށެވެ. މީގެ އިތުރުން އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަނާއި، އައްޑޫ އިންޓަރނޭޝަނަލް އެއާޕޯޓަށް ވަނީ ބޮޑެތި އަދަދުތަކުން ފައިސާ ދީފައެވެ.

އެންމެގިނައިން ކެޕިޓަލް ހަރަދުގެ ގޮތުގައި ފައިސާ ދިން ކުންފުނިތައް:

1. ފަންޑް މެނޭޖްމަންޓް ކޮމްޕެނީ: 286.1 މިލިއަން ރުފިޔާ

2. އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން: 100-މިލިއަން ރުފިޔާ

3. އައްޑޫ އިންޓަރނޭޝަނަލް އެއާޕޯޓް: 77.1 މިލިއަން ރުފިޔާ

4. ވޭސްޓް މެނޭޖްމަންޓް ކޯޕަރޭޝަން: 73 މިލިއަން ރުފިޔާ

ދައުލަތުން މިދިޔަ އަހަރު ސަބްސިޑީގެ ގޮތުގައި އެންމެގިނަ ފައިސާ ދީފައިވަނީ އެސްޓީއޯއަށެވެ. ސަބަބަކީ އެސްޓީއޯއަކީ ރާއްޖެއަށް ބޭނުންވާ ހަކަތައިގެ ގޮތުގައި ބޭނުންކުރާ ތެލާއި، ކާޑުގެ ބާވަތްތަކުގެ އިތުރުން ސިއްހީ އާލާތްތައް އެތެރެކުރާ ކުންފުންޏެވެ.

އެންމެގިނައިން ސަބްސިޑީ ދިން ކުންފުނިތައް:

1. އެސްޓީއޯ: 2.3 ބިލިއަން ރުފިޔާ

2. ފެނަކަ: 1.1 މިލިއަން ރުފިޔާ

3. އެމްްޓީސީސީ: 307 މިލިއަން ރުފިޔާ

4. ސްޓެލްކޯ: 103 މިލިއަން ރުފިޔާ

ގްރާންޓްގެ ގޮތުގައި މިދިޔަ އަހަރު ފައިސާ ދީފައިވަނީ ރާއްޖެ އިސްތިހާރުކުރާ ޓޫރިޒަމް ކުންފުނި، އެމްއެމްޕީއާރުސީ އާއި ޕަބްލިކް ސާވިސް މީޑިއާއެވެ.

މިދިޔަ އަހަރު އެމްއެމްޕީއާރުސީއަށް ގްރާންޓްގެ ގޮތުގައި 100.8 މިލިއަން ރުފިޔާ ދީފައިވާއިރު، ދައުލަތުގެ މީޑިއާއަށް ވަނީ 81.7 މިލިއަން ރުފިޔާ ދީފައެވެ.