ފްލެޓް ދޫކުރުމުގެ ހުރިހާ ކަމެއް ހުއްޓައިލުމަށް އެސީސީ އިން އަންގައިފި

ފަހި ދިރިއުޅުމުގެ ފްލެޓް ތައް ދޫކުރުމުގެ ހުރިހާ ކަމެއް ހުއްޓައިލުމަށް އެންޓި ކޮރަޕްޝަން ކޮމިޝަނުން ސަރުކާރަށް އަންގައިފިއެވެ.

އޭސީސީން އެގޮތަށް އެންގީ ހުޅުމާލޭގައި މިހާރު ޢިމާރަތް ކުރަމުން އަންނަ 4،000 ފްލެޓު ލިބޭ މީހުންގެ ދާއިމީ ލިސްޓަށް ހުށަހެޅި ޝަކުވާތައް ބެލުމަށް ފަހު، އަލުން ދާއިމީ ލިސްޓު ހައުސިން މިނިސްޓްރީން ރޭ އާއްމުކޮށްފައި ވަނިކޮށެވެ.

އަދި ފްލެޓު ލިބޭ މީހުންގެ މެދުގައި ރޭ ވަނީ ގުރުއަތުނެގުންވެސް ކުރިއަށް ގެންގޮސްފައިވެއެވެ.

އޭސީސީއިން ހައުސިން މިނިސްޓްރީއަށް ރޭ ފޮނުވި ސިޓީ އެއްގައި އަންގާފައި ވަނީ ގެދޮރުވެރިޔާ ސްކީމްގެ ދަށުން ދޫކުރުމަށް ހަމަޖެހިފައިވާ ފްލެޓްތަކުގެ އެއްބަސްވުމުގައި ސޮއިކުރުމާއި އެ ފުލެޓްތައް ހަވާލުކުރުމާ ގުޅުންހުރި އެންމެހާ މަސައްކަތްތައް ހުއްޓާލުމަށެވެ.

އަދި އެ ގޮތަށް އެންގީ އޭސީސީން ކަންކަން ބެލުމަށް ފަހު ވަކި ގޮތެއް ކަނޑައަޅަންދެން ކަމަށްވެސް އެސިޓީގައި ބުނެފައިވެއެވެ.

ގެދޮރުވެރިޔާ ސްކީމުން ދޫކުރުމަށް ހަމަޖައްސައި ސަރުކާރުން ދޫކުރުމަށް ނިންމައިފައިވާ 3 ކޮޓަރީގެ ފުލެޓްގެ މަހު ކުއްޔަކީ 7000ރ އާއި މަރާމާތު ފީގެ ގޮތުގައި މަހަކު 1000ރއެވެ.

އަދި 2 ކޮޓަރީގެ މަހު ކުއްޔަކީ 5000ރ އާއި މަރާމާތު ފީގެ ގޮތުގައި މަހަކު 1000ރ އެވެ.

ކުލި ދެއްކުމަށް ފެށުމަށް ހަމަޖެހިފައިވަނީ ފުލެޓް ޙަވާލުކުރާ ތާރީހުންފެށިގެން 3 މަސް ދުވަހުގެ ގްރޭސް ޕީރިއަޑް އަކަށްފަހު އެވެ. އަދި ކުލި ދައްކަންޖެހޭ ޖުމްލަ މަހުގެ އަދަދަކީ 300 މަހެވެ.