އެއް އަހަރުގެ ކާމިޔާބީ؛ އައިވީއެފް ހަދައިގެން 23 އަންހެނަކު ބަލިވެއިން
ލިޔުންތެރިޔާ
އަހުމަދު ހަމީދު އާދަމް
ދަރުމަވަންތަ ހޮސްޕިޓަލުގެ ނެޝަނަލް ފާޓިލިޓީ ސެންޓަރުން ހިދުމަތް ހޯދި 23 އަންހެނެއްގެ ބަނޑުގައި ދަރިފުޅު ގަރުބަގަނެ އައިވީއެފް ކާމިޔާބުވެފައިވާ ކަމަށް އެ ސެންޓަރުން ބުނެފި އެވެ.
ދަރުމަވަންތަ ހޮސްޕިޓަލުގައި ހުންނަ ނެޝަނަލް ފާޓިލިޓީ ސެންޓަރު ހުޅުވީ 2024 ނޮވެންބަރު މަހު އެވެ. އެ ސެންޓަރަށް އެއް އަހަރު ފުރުން ފާހަގަކުރުމަށް މިއަދު ވަނީ ރަސްމިއްޔާތެއް ބާއްވާފަ އެވެ. ރައީސުލްޖުމްހޫރިއްޔާގެ ދެކަނބަލުން ޝަރަފުވެރިކޮށް ދެއްވި މި ރަސްމިއްޔާތުގައި ވަނީ މިދިޔަ އަހަރެއްހާ ދުވަހުގެ ކާމިޔާބީތައް ފާހަގަ ކޮށްފަ އެވެ.
ކާމިޔާބީ ހިމަނާ އާންމުކުރި ރިޕޯޓްގައި ބުނި ގޮތުގައި އަހަރު ދުވަސްތެރޭ އެ ސެންޓަރުން 578 ދެމަފިރިއަކަށް ކޮންސަލްޓޭޝަން ހިދުމަތް ދިނެވެ. އަދި 96 މީހަކު އައިވީއެފް ފަރުވާއަށް ހޮވި 86 އަންހެނެއްގެ ބިސްނެގުމުގެ މަސައްކަތް ކޮށްފައިވެ އެވެ.
އަދި 68 އަންހެނެއްގެ ރަހިމުގައި ދަރިމައިކުރެވިފައިވާ ބިސް ވަނީ އިންދާފަ އެވެ. އޭގެ ތެރެއިން 23 އަންހެނެއްގެ ބަނޑުގައި ދަރިފުޅު ގަރުބަގަނެ އައިވީއެފް ފަރުވާ ކާމިޔާބުވި ކަމަށް ވަނީ ފާހަގަކޮށްފަ އެވެ.
އަދި އެ ސެންޓަރުން އައިވީއެފް ހެދި އަންހެނަކު ޖަނަވަރީ 7, 2026 ގައި ވަނީ ކުއްޖަކު ލިބިފަ އެވެ. އެއީ އެ ސެންޓަރުން އައިވީއެފް ހަދައިގެން މީހަކަށް ކުއްޖަކު ލިބުނު ފުރަތަމަ ފަހަރެވެ. އޭގެ ފަހުން އިތުރު ކުއްޖަކު ވެސް ވަނީ އުފަންވެފަ އެވެ.
ދަރުމަވަންތަ ހޮސްޕިޓަލުގެ ނެޝަނަލް ފާޓިލިޓީ ސެންޓަރަކީ އަގުބޮޑު އަދި ޒަމާނީ އެ ފަރުވާގެ ހުރިހާ މަރުހަލާއެއް ފުރިހަމަކުރުމަށް ބޭނުންވާ އެންމެ ފުރިހަމަ ވަސީލަތްތަކާއި ނިޒާމުތައް ގާއިމުކޮށްފައިވާ ސެންޓަރެކެވެ.
ސަރުކާރުން މިހާރު ވަނީ އައިވީއެފް ފަރުވާގެ ހުރިހާ ކަމަކަށް އާސަންދަަ ދޭން ނިންމާފަ އެވެ. އައިވީއެފް ފަރުވާ އަކީ ވަރަށް ހަރަދު ބޮޑު ފަރުވާ އެކެވެ. ބޭރުން އެ ފަރުވާ ހޯދަން ބައެއް ދިވެހީން އެތައް ލައްކަ ރުފިޔާއެއް ހަރަދުކޮށްފައިވެ އެވެ.
ދަރިމައިވުމާ ގުޅޭ ފަރުވާތަކުގެ ތެރޭގައި ހިމެނޭ އައިވީއެފް. އަދި އައިޔޫއައިގެ ފަރުވާ އާސަންދައިގެ ތެރެއިން ހަމަޖައްސައިދިނުމަކީ ރައީސުލްޖުމްހޫރިއްޔާގެ ރިޔާސީ ވައުދެކެވެ. މި ވައުދާއި އެއްގޮތަށް އާސަންދަ އަދި ނޭޝަނަލް ސޯޝަލް ޕްރޮޓެކްޝަން އެޖެންސީ، މެދުވެރިކޮށް ރާއްޖެއިން ބޭރުން ވެސް ދަރިމައިވުމާ ގުޅޭ ފަރުވާ މިހާރު ލިބެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
