ބަންކަރިންގެ ހިދުމަތް މިމަހުގެ 22 ވަނަ ދުވަހު ފެށިގެންދާނެ: ވަޒީރު ސައީދު

ސަރުކާރުން އުތުރުގައި ފަށާ ބަންކަރިންގެ ހިދުމަތް މި މަހުގެ 22 ވަނަ ދުވަހު ފެށިގެންދާނެ ކަމަށް އިގުތިސާދީ ކަންކަމާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.

ޗައިނާ އާއި ރާއްޖެއާއި ދެމެދު ވިޔަފާރީގެ ގުޅުން ބަދަހި ކުރުމަށްޓަކައި ބޭއްވި "މޯލްޑިވްސް – ސިޗުއާން ޓްރޭޑު އެންޑު އިންވެސްޓުމަންޓު ކޯރޕަރޭޝަން ކޮންފަރެންސް" ފެށުމުގެ ރަސްމިއްޔާތުގައި ވާހަކަދައްކަވަމުން ރާއްޖެ ކަނޑެއްގެ މެދުގައި އޮންނައިރު، ރާއްޖެއަށް މެރިޓައިމް ސިނާއަތުގެ ފައިދާ ނެގުމާއި ރީ-އެކްސްޕޯޓު ފުޅާކުރުމަކީ ކުރަން ޖެހޭ ކަމެއްކަން ފާހަގަކުރައްވަމުން ވަޒީރު ސައީދު ވިދާޅުވީ، އެކަމަށްޓަކައި ސަރުކާރުން ކުރަމުންދާ މަސައްކަތްތަކުގެ ތެރެއިން މިމަހުގެ 22 ވަނަ ދުވަހު އުތުރުގައި ބަންކަރިންގެ ޚިދުމަތް ފެށުމަށް ތައްޔާރުވަމުންދާ ކަމަށެވެ.

"ރާއްޖެ ކަނޑެއްގެ މެދުގައި އޮންނައިރު، ރާއްޖެއަށް މެރިޓައިމް ސިނާއަތުގެ ފައިދާ ނެގުމާއި ރީ-އެކްސްޕޯޓު ފުޅާކުރުމަކީ އަޅުގަނޑުމެން ކުރަން ޖެހޭ ކަމެއް. އެގޮތަށް މަސައްކަތްކުރަމުން މިދަނީ، ބަންކަރިންގ ހިދުމަތްވެސް މިމަހުގެ 22 ވަނަ ދުވަހު ފެށިގެންދާނެ،"

ވަޒީރު ސައީދު ވިދާޅުވިއެވެ.

އުތުރުގައި ބަންކަރިންގެ ހިދުމަތް ފެށުމަށް ތައްޔާރުވުމުގެ ގޮތުން އެކަމަށް ބޭނުންވާ ޕައިލެޓް ބޯޓާއި ޓަގްބޯޓު ކުޅުދުއްފުއްޓަށް ގެންގޮސްފައިވާއިރު، މީގެ ކުރިން ސަރުކާރުން ހިންގާ މައި ޕާޓީ، ޕީއެންސީ އިން ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުން ވަޒީރު ސައީދު ވަނީ މިކަމަށްޓަކައި އެންމެ 6 މަސްދުވަހުގެ ތެރޭގައި، އެސްޓީއޯއިން ބޮޑު 2 ޓޭންކަރު ގަނެފައިވާ ކަމަށާއި، އެމްއެންޑީއެފާއި އެކު އެސްޓީއޯއިން ޗާޓު އަޕްޑޭޓް ކުރުމުގެ މަސައްކަތްތައް ކުރަމުން އަންނަ ކަމަށް ވިދާޅުވެފައެވެ. އަދި ކަސްޓަމާއި އިމިގްރޭޝަނުންވެސް މި ހިދުމަތާއި ގުޅިގެން ކުރަން ޖެހޭ ކަންކަމުގެ އެންމެ ފަހުގެ މަސައްކަތްތައް ކުރަމުން އަންނަ ކަމަށްވެސް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ، މި އަހަރު ބަންކަރިންގެ ހިދުމަތް ފެށުމުން، އަންނަ އަހަރުގެ ޖުލައި މަސް ފެށެންވާއިރަށް ރާއްޖޭގެ ޖީޑީޕީގެ ގޮތުގައި މިހާރު އޮތް 6.5 ބިލިއަން ޑޮލަރުގެ ތެރެއަށް 400 މިލިއަން ޑޮލަރު އިތުރުވާނެ ކަމަށެވެ.

މޯލްޑިވްސް އިކޮނޮމިކް ގޭޓްވޭ ޕްރޮޖެކްޓްގެ ދަށުން އިހަވަންދިއްޕޮޅުގައި ބައިނަލްއަގުވާމީ ބަންކަރިން ފެސިލިޓީއެއް ފެށުމުގެގޮތުން އެސްޓީއޯއާއި އަދި ވިޓޯލް ގުރޫޕާއި ދެމެދު ޓާރމް ޝީޓްގައި މިދިޔަ މާޗުމަހު ވަނީ ސޮއިކޮށްފައިވާކަން ފާހަގަކޮށްލަން ޖެހެއެވެ.