މާޗު މަހުން ފެށިގެން ކޮންމެ ހަފްތާއަކު އެއްދުވަހު ރައީސް މުޢިއްޒު ނޫސްވެރިންނާ ބައްދަލުކުރައްވަނީ

އަންނަ މަހުން ފެށިގެން ކޮންމެ ހަފްތާއަކު އެއް ދުވަހު ނޫސްވެރިންނާ ބައްދަލުކުރައްވާނެ ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ މިއަދު އިއްވި ރިޔާސީ ބަޔާނުގައެވެ.

އެގޮތުން ވިދާޅުވީ، މިއީ މީޑިއާއަށް ސީފާ އެމަނިކުފާނު މައުލޫމާތުތައް ދެއްވުމަށް ބޭއްވޭ ބައްދަލުވުންތަކެއް ކަމަށާ، އެ ބައްދަލުވުންތައް އޮންނާނީ، ކޮންމެ ހޯދަ ދުވަހެއްގެ ހެނދުނު 10:00 އިން 11:00 އަށް ކަމަށެވެ.

އަދި ދަތުރެއް ކުރަން ޖެހުން ނުވަތަ ބަންދު ދުވަހަކާ ދިމާވުން، ނުވަތަ އެ ނޫންވެސް އެ ޝެޑިޔުލަށް ބަދަލު އަންނަ ފަދަ ކަމެއް މެދުވެރި ނުވާހާ ހިނދަކު ބައްދަލުވުންތައް ބާއްވާނެ ކަމަށްވެސް ވިދާޅުވިއެވެ.

މީޑިއާއާ އަޅުގަނޑު ބާއްވަމުން އަންނަ ގާތް ރަޙްމަތްތެރި ގުޅުން އިތުރަށް ގާތް ކުރުމަށްޓަކައި، މީޑިއާއަށް ސީދާ އަޅުގަނޑު މަޢުލޫމާތު ދިނުމުގެ ގޮތުން މި އަހަރުގެ މާޗް މަހުން ފެށިގެން، ޢާއްމު އުސޫލެއްގެ މަތިން، އިރާދަކުރެއްވިއްޔާ ކޮންމެ ހަފްތާއެއްގެ ހޯމަ ދުވަހު ހެނދުނު 10:00 އިން 11:00 އަށް ނޫސްވެރިންނާ އަޅުގަނޑު ބައްދަލު ކުރާނަން.

ރައީސް ޑރ. މުޙައްމަދު މުޢިއްޒު

މީގެ އިތުރުން، މިއަހަރުގެ މާޗް މަހުން ފެށިގެން، ކެބިނެޓުގެ ކޮންމެ ވަޒީރަކު ވެސްހަފްތާއަކު 1 ފަހަރު 1 ގަޑި އިރަށް ނޫސްވެރިންނާ ބައްދަލުކުރައްވާނެ ކަމަށާ، މި ބައްދަލުވުންތަކުގެ ތާވަލް ރައީސް އޮފީހުން ހާމަކުރަމުން ގެންދާނެ ކަމަށް އެމަނިކުފާނު ވިދާޅުވިއެވެ.

ރިޔާސީ ބަޔާނުގައި ރައީސް މުޢިއްޒު ވަނީ، މި ސަރުކާރުން އެކިއެކި މީޑިއާތަކަށް މައުލޫމާތު ހިއްސާކޮށްފައިވާ އަދަދުތަކުގެ ތަފާސްހިސާބުތައްވެސް ހިއްސާ ކުރައްވާފައެވެ.

އެގޮތުން ވިދާޅުވީ،

* ރާއްޖެއާއި ބޭރުގެ މީޑީއާތައް ހިމެނޭގޮތަށް 424 ފަހަރު، ސީދާ ވަޒީރުން އެކި މީޑިއާތަކަށް، މަޢުލޫމާތާއި އިންޓަރވިއު ދެއްވާފައިވާ ކަމަށް.

* 493 ފަހަރު ވުޒާރާތަކުގެ އެކިއެކި އިސްވެރިންވަނީ ރައްޔިތުންނަށް ބޭނުންވާ އެކިއެކި މުހިންމު މަޢުލޫމާތު މީޑިއާގެ ޒަރީޢާއިން ހިއްސާ ކުރައްވާފައިވާ ކަމަށް.

މީގެ އިތުރުން އާންމު އެކި ރައްޔިތުން ސާފުކުރައްވަން ބޭނުންފުޅުވާ މަޢުލޫމާތެއް ހުރިނަމަ އެކަމަށް އެދި ފޯމް ހުށަހެޅުމުން ޤާނޫނީ ހުދޫދުގެ ތެރެއިން ހާމަކުރެވެން އޮތް އެންމެ ފުޅާ މިނެއްގައި އެ އެދޭ މައުލޫމާތު ސަރުކާރުގެ ހުރިހާ އިދާރާއަކުން ހާމަ ކުރަމުންދާ ކަމަށް ވިދާޅުވިއެވެ.

މިގޮތުން މިދިޔަ އަހަރު ތެރޭގައި ރައީސުލްޖުމްހޫރިއްޔާގެ އޮފީހާއި މިނިސްޓްރީތަކަށް 1341 އާރު.ޓީ.އައި ފޮނުވާފައިވާ އިރު އޭގެ ތެރެއިން 1251 އާރ.ޓީ.އައި އަށް ވަނީ ޖަވާބު ދީ ނިންމާފައިވާ ކަމަށް ވިދާޅުވިއެވެ.

މިއީ، ރައީސުލްޖުމްހޫރިއްޔާގެ އޮފީހާއި މިނިސްޓްރީތަކަށް ފޮނުވި އާރު.ޓީ.އައި ގެ %93 . ޖަވާބު ތައްޔާރުކުރުމުގެ އެކި މަރުހަލާތަކުގައި އެއްކުރަންޖެހޭ އިތުރު މަޢުލޫމާތު ހުރުމާއި، އެކި ސަބަބުތަކާހުރެ ވަގުތު އިތުރުކުރަންޖެހުމުގެ ސަބަބުން އަދި ޖަވާބު ނުދެވި ހުރި އާރު.ޓީ.އައި ފޯމުތަކަށް ވެސް ދަނީ ޖަވާބުތައް ތައްޔާރުވަމުން. މި މަސައްކަތް ހުއްޓުމެއްނެތި ކޮންމެ ދުވަހަކުވެސް އެދަނީ ކުރިއަށް. ވީމާ، މާސް މީޑިޔާއާއި ޕްރިންޓް މީޑިޔާއާއި ފަރުދީ ގޮތުން މަޢުލޫމާތު ހޯދުމުގައި ކުޑަވެސް ހުރަހެއް ނެތް.

ރައީސް ޑރ. މުޙައްމަދު މުޢިއްޒު

މީގެ އިތުރުންވެސް، މީސްމީޑިއާގެ އެކިއެކި މަންސަތައް މެދުވެރިކޮށް ވެސް ސަރުކާރުން ވަނީ އެކިއެކި ކަންކަމުގެ މަޢުލޫމާތު ރައްޔިތުންނަށް ފޯރުވައިދިނުމަށް ޓަކައި، 2025 ވަނަ އަހަރު 40875 ޕޯސްޓު ސޯޝަލް މީޑިޔާ މެދުވެރިކޮށް މަޢުލޫމާތުޝާއިޢުކޮށްފައިވާ ކަމަށް އެމަނިކުފާނު ވިދާޅުވިއެވެ.