ދީނަށް ފުރައްސާރަކުރާ ޕޭޖްތައް ބްލޮކްނުކޮށް ބައެއް ޝެއިޚުންގެ ފޭސްބުކް އެކައުންޓްތައް ބްލޮކް ކޮށްލައިފި
އިސްލާމްދީނަށް ފުރައްސާރަކުރާ ފޭސްބުކްޕޭޖްތައް ބްލޮކް ނުކޮށް ދިވެހި ބައެއް ޝެއިޚުންގެ އެކައުންޓް ތައް ފޭސްބުކުއިން ބްލޮކް ކޮށްލައިފިއެވެ.
އިސްލާމް ދީނަށް ފުރައްސާރާ ފޭސްބުކު ޕޭޖްތައް ދިވެހިން ހިންގާކަން އެތައް ފަހަރެއްގެ މަތިން ފުލުހުންގެ ސަމާލުކަމަށް ވަނީ ގެނެވިފައެވެ. ނަމަވެސް ފުލުހުންގެ ޖަވާބަކީ އެމަސައްލަތައް ބަލާ ކަމަށާއި، އެފަދަ ޕޭޖްތައް ދެނެގަތުމަށް މަސައްކަތް ކުރަމުން އަންނަަ ކަމަށެވެ. ނަމަވެސް މިއަދާ ހަމަޔަށް ވެސް އެފަދަ އެކައުންޓެއް ބްލޮކް ކޮށްފައި ނުވާކަމަށް ގިނަ ބަޔަކު އަންނަނީ ބުނަމުންނެެވެ. ކީރިތީ ރަސޫލާއަށް ފުރައްސާރަކޮށް މާތްﷲ އަށް ޝަރީކަކުރާ ޕޭޖްތައް މިހާރުވެސް ހިންގަމުން އަންނަ އިރު އެފަދަ ޕޭޖްތައް ހުރި ގޮތަށް ބެހެއްޓުމަށްފަހު ދާދި ފަހުން މިވަނީ ބައެއް ޝެއިޚުންގެ ފޭސްބުކު އެކައުންޓްތައް ބްލޮކް ކޮށްފައެވެ. އެކަމާއި ގުޅިގެން ގިނަބައެއްގެ ފާޑުކިއުން އަމާޒުވެފައިވާއިރު، އެއީ އިސްލާމްދީނާއި ދެކޮޅު ބަޔަކު އަޑީގައި ތިބެގެން ކޮށްފައިވާ ކަމެއް ކަމަށް ގިނަ ބަޔަކު އަންނަނީ ބުނަމުންނެވެ.
ބައެއް ޝެއިޚުންގެ ފޭސްބުކު އެކަައުންޓްތައް ފޭސްބުކުން ބްލޮކް ކޮށްލާފައިވާއިރު އިސްލާމްދީނާއި ދެކޮޅަށް ރާއްޖޭގައި ވާހަކަދައްކާތީ އެކަމާއި ދެކޮޅަށް އަޑު ފަތުރަމުން ދިޔަ ފޭސްބުކުގެ ގުރޫޕެއްވެސް ދާދި ފަހުން ވަނީ ބްލޮކް ކޮށްލާފައެވެ. އެފަދަ ގޮތަކަށް ޕޭޖްތަކާއި ޝެއިޚުންގެ އެކައުންޓްތައް ބްލޮކް ކުރި ނަމަވެސް އިސްލާމްދީނާއި ދެކޮޅަށް ވާހަކަދައްކާ މީހުންނާއި ދެކޮޅަށް އަޑު އުފުލާނެ ކަމަށް އެފަރާތްތަކުން އަންނަނީ ބުނަމުންނެވެ. އަދި އެފަދަ އަމަލުތަކުން އިސްލާމްދީން ބަލިކަށި ނުކުރެވޭެ ކަމަށާއި، އިސްލާމްދީން ފެތުރުން ނުހުއްޓުވޭނެ ކަމަށްވެސް އެ ފަރާތްތަކުން އަންނަނީ ބުނަމުންނެވެ.
އެއްބަޔަކު މިގައުމުގެ އިސްލާމީ ވަހުދަތު ހިމާޔަތް ކުރުމަށް މަސައްކަތް ކުރާއިރު، ފަހަކަށް އައިސް ރާއްޖޭގައި އިސްލާމްދީނާ، އެދީނުގެ ހުކުމްތަކާއި ދެކޮޅަށް އަޑު އުފުލާ މިންވަރު ވަނީ އިތުރުވެފައެވެ. އަދި އެފަދަ މީހުންނާއި ދޭތެރޭގައި ކަމާއި ބެހޭ ފަރާތްތަކުން އެދެވޭ ފިޔަވަޅު ނާޅާ ކަމަށް ގިނަ ބަޔަކު އަންނަނީ ބުނަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
