އެމްޑީޕީގެ އެއްވެސް ވެރިކަމެއްގައި ތަންތަން، މަރާމާތުކޮށް، ކުރިއަރުވަން، މަސައްކަތެއް ނުކުރޭ: ޑރ. ޚަލީލް

އިދިކޮޅު މައި ޕާޓީ، އެމްޑީޕީގެ އެއްވެސް ވެރިކަމެއްގައި ދައުރު ނިންމައި، ވެރިކަން ނިމިގެންދާއިރު، ދައުލަތުގެ ތަންތަނާއި، ތަކެތި އެއްވެސް ވަރަކަށް މަރާމާތު ނުކުރާ ކަމަށް ސިއްހަތާއި ބެހޭ ވުޒާރާގެ ވަޒީރު ޑރ އަބްދުالله ޚަލީލް ވިދާޅުވެއްޖެ އެވެ.

ރައީސުލްޖުމްހޫރިއްޔާ ދ އަތޮޅަށް ކުރައްވަމުންދާ ދަތުރުފުޅުގެ ތެރެއިން މީދޫ އަށް ވަޑައިގެން އެ ރަށު ރޭ މީދޫގައި ބޭއްވި ޖަލްސާގައި ވާހަކަ ދައްކަވަމުން ޚަލީލް ވަނީ، ކުރީގެ ރައީސް އިބްރާހިމް މުހައްމަދު ޞާލިހު އެމްޑީޕީގެ މަޖިލިސް ކެންޕެއިނަށް ރަށްރަށަށް ކުރައްވަމުންދާ ދަތުރުފުޅުގެ ތެރެއިން ކެނދިކުޅުދޫ ހޮސްޕިޓަލާއި ގުޅިގެން ދެއްކެވި ވާހަކަތަކަށް ރައްދު ދެއްވަމުން އެމަނިކުފާނަށާއި އެމްޑީޕީ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.

އެގޮތުން ޚަލީލް ވިދާޅުވީ، ކުރީ ސަރުކާރުން ކެނދިކުޅުދޫ ގައި ހޮސްޕިޓަލެއް އަޅަން ކޮންޓްރެކްޓަރ އަކާއި ހަވާލުކުރި ކަމަށާ، ފައިނޭންސް ވެސް ހަމަޖެއްސެވި ކަމަށް ރައީސް ޞާލިހް ވިދާޅުވި ނަމަވެސް، އެއީ އިތުރުފުޅެއް ކަމަށާ، ކޮންޓްރެކްޓް ގައި ސޮއި ކުރި ނަމަވެސް އޭރު ފައިނޭންސްގެ ކަންތައް ހަމަނުޖައްސާ ކަމަށެވެ. އަދި އެކަމަށް ބޭނުންވާ ފައިނޭންސް ހަމަޖައްސައިދިނީ މި ސަރުކާރުން ކަމަށްވެސް ޑރ. ޚަލީލް ވިދާޅުވިއެވެ.

މިއާއެކު ޚަލީލް ވިދާޅުވީ، ފާއިތުވި ފަސް އަހަރުގައި ސިއްހީ ނިޒާމަށް އަޅާނުލެވި ހުރި ހުރުމުގެ ސަބަބުން، މުޅި ނިޒާމްވެސް ވަނީ ވީރާނާ ވެފައި ކަމަށެވެ.

"ކޮންމެ ތަނަކަށް ވަނަސް އިވޭ އަޑަކީ ޑޮކްޓަރުން ނެތޭ، ނަރުހުންނެތޭ، ނޫނީ އެވެނި ކަމެއް މިވެނި ގޮތަށޭ ހުރީ، އެހެންވީމާ މިކަންކަން ހައްލު ކޮށްދޭށޭ. ކީއްވެތޯ ފަސް އަހަރު ނިމިގެންދާއިރު، މި ހާލަތުގައި ސިއްހީ ނިޒާމް އޮންނަންވީ. ކީއްވެގެންބާ ޑޮކްޓަރ ބަލާ ކަށިގަނޑުގައި ދަބަރު ޖަހާފައި ހުންނަންވީ، ބޭސް އަޅާ ކަތުރުގައި ދަބަރު ޖަހާފައި ހުންނަންވީ، 5 އަހަރު ނިމިގެންދާއިރު."

އެބައިމީހުން (އެމްޑީޕީ) ވެރިކަންކުރި އެއްވެސް އިރެއްގައި، ފަސް އަހަރުގެ ދައުރެއް ނިމޭ އިރުގައި، މަރާމާތަކީ، އެތަނެއް ކުރިއަރުވަން ކުރާ މަސައްކަތަކީ އެއްވެސް ގޮތަކަށް ކޮށްފައި އޮތް ކަމެއް ނޫން. ލޯންޗެއް އޮވެއްޖެއްޔާ، އެ ލޯންޗު އޮންނާނީ ފަރަށް އަރާފައި ނޫނީ އެއްގަމުގައި ބާއްވާފައި.

ސިއްހީ ވުޒާރާގެ ވަޒީރު ޑރ ޚަލީލް

ޚަލީލް އިތުރަށް ވިދާޅުވީ، މި ސަރުކާރު ވެރިކަމާއި ހަވާލުވުމަށްފަހު އެންމެ ފުރަތަމަ ކުރަންޖެހުނު ކަމަކީ، ރަށް ރަށުގައި ނެތް ޑޮކްޓަރުން ހޯދުމުގެ މަސައްކަތް ކަމަށެވެ. އެގޮތުން މިހާރުވެސް 35 ޑޮކްޓަރުން ގެނައުމުގެ މަސައްކަތް ކުރައްވަމުންދާއިރު، އޭގެ ތެރެއިން ބައެއް ޑޮކްޓަރުން މިހާރުވެސް ރާއްޖެ ވަޑައިގެންފައިވާ ކަމަށް ޚަލީލް ވިދާޅުވިއެވެ.