ޤާނޫނު އަސާސީ ބަދަލުކޮށްގެން ގެންނަންޖެހޭ އިސްލާޙެއް ދެން ނުގެންނާނަން: ރައީސް މުޢިއްޒު

ޤާނޫނު އަސާސީ ބަދަލުކުރުމަކީ ރައްޔިތުން ބޭނުންވާ ކަމެއް ނޫންކަން އެނގިގެންގޮސްފައިވާ ކަމަށާ، އެހެންކަމުން ގާަނޫނު އަސާސީއަށް ދެން އިސްލާޙު ނުގެންނަވާނެ ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ވަނީ، ޖުޑީޝަރީ އިސްލާހް ކުރުމަށް ގާނޫނަށް ބައެއް ބަދަލުތައް ގެންނަވަން ނިންމަވާފައިވާ ކަމަށް ވިދާޅުވެފައެވެ. އެގޮތުން ޖުޑީޝަރީގެ ގާނޫނު އުފެދިގެން އައިއިރު އޮތް ޖުޑީޝަލް ކައުންސިލް އުފެއްދުމަށް ގާނޫނަށް ގެންނަންޖެހޭ އިސްލާހްތައް ގެންނަވާނެ ކަމަށް ވިދާޅުވިއެވެ.

މިއާއެކު އެމަނިކުފާނު ވިދާޅުވީ، މަޖިލީހަށާއި ޖުޑިޝަރީއަށްވެސް މި ސަރުކާރުން ގެންނަ ބަދަލުތައް ގެންނަވާނީ ގާނޫނު އަސާސީ ބަދަލުގެނެސްގެން ނޫން ކަމަށާ، އެކަމަކީ ރައްޔިތުން ހިތްހަމަޖެހޭ ކަމެއް ނޫންކަން ހާމަވެފައިވާ ކަމަށެވެ.

ފެންނަ ނުފެންނަ ވޯޓުން ވަރަށް ބޮޑު މެސެޖެއް ރައްޔިތުން ދެއްވާފައި މިވަނީ. އެއީ ގާނޫނު އަސާސީއަށް ބަދަލުތައް ގެނައުމަކީ އެހާބޮޑަށް ރައްޔިތުން ގަބޫލުކުރާކަމެއް ނޫނީ އެހާބޮޑަށް ފޭވާ ކުރާކަމެއް ނޫންކަން. އެހެންވީމާ އަސާސީ ބަދަލުކޮށްގެންނަންޖެހޭ ކަހަލަ އިސްލާހެއް ކުރިއަށް އޮތްތާނގައި ގެންނާކަށް އަޅުގަނޑުމެން ގަސްތެއްނުކުރަން ދެނެއް

ރައީސް ޑރ. މުޙައްމަދު މުޢިއްޒު

ރައީސް މުޢިއްޒު މިފަދައިން ވިދާޅުވެފައިވާއިރު، މިމަހު 4 ވަނަ ދުވަހު، ބޭއްވުނު އިންތިޚާބު ތަކުގެތެރެއިން، ރިޔާސީ އިންތިޚާބާއި މަޖިލިސް އިންތިޚާބު އެއްދުވަހެއްގައި ބޭއްވުމަށް، ގާނޫނު އަސާސީއަށް ބަދަލުގެނައުމަށް، ނެގުނު ފެންނަ ނުފެންނަ ވޯޓުގައި، 68 އިންސައްތައަށްވުރެ ގިނަ މީހުން ވަނީ އެކަން އެގޮތަށް ކުރަން ނުފެންނަ ކަމަށް ވޯޓު ދީފައެވެ.

އެއާއެކު ރައީސް ވަނީ، ރައްޔިތުންގެ ނިންމުން ބަލައިގަންނަވާކަން އިއުލާންކުރައްވައި، އެކަން އެގޮތަށް ނުކުރައްވާނެ ކަމަށް ވިދާޅުވެފައެވެ.