އެމެރިކާގެ އިސްވެރިން އިންޑިއާއަށް!

ކުރިއަށް އޮތް ހަފްތާތަކުގެ ތެރޭގައި އެމެރިކާގެ އެންމެ އިސް ފަންތީގެ ގިނަ ބޭފުޅުންތަކެއް އިންޑިއާއަށް ޒިޔާރަތްކުރައްވާ ގޮތަށް ހަމަޖެހިއްޖެއެވެ.

އެމެރިކާގެ ނައިބު ރައީސް ޖޭ.ޑީ. ވޭންސް ވަރަށް އަވަހަށް އިންޑިއާއަށް ވަޑައިގަންނަވާނެއެވެ. އަދި ހަމަ އެދުވަސްވަރާ ދިމާކޮށް އެމެރިކާގެ ޤައުމީ ސަލާމަތާ ބެހޭ މުޝީރު މައިކަލް ވޯލްޓްޒްވެސް އިންޑިއާއަށް ވަޑައިގަންނަވާނެއެވެ. ޖޭ.ޑި ވޭންސް އާއި މައިކް ވޯލްޓްޒް އަންނަ މަހުގެ މެދުތެރޭގައި އިންޑިއާއަށް ވަޑައިގަންނަވާއިރު، އަންނަ މެއި ނުވަތަ ޖޫން މަހު އެމެރިކާގެ ދިފާޢީ ވަޒީރު ޕީޓަރ ހެގްސެތުވެސް އިންޑިއާއަށް ވަޑައިގަންނަވާނެއެވެ. ހެގްސެތުގެ ދަތުރުފުޅުގައި އެމެރިކާއާއި އިންޑިއާއާ ދެމެދު ދިފާޢީ ކަންކަމުގައި އެއްބާރުލުން ދިނުމާއި ބެހޭ އާ ފްރޭމްވޯކެއް އެކުލަވާލުމާ ބެހޭ މަޝްވަރާތައް ކުރައްވާނެއެވެ.

އަންނަ ހަފްތާތެރޭ އެމެރިކާގެ ވިޔަފާރިއާއި ބެހޭ ޚާއްސަ މަންދޫބުގެ ނައިބު ބްރެންޑަން ލިންޗްވެސް އިންޑިއާއަށް ވަޑައިގަންނަވާނެއެވެ. ލިންޗްގެ ދަތުރުގައި އެމެރިކާއާއި އިންޑިއާއާ ދެމެދު މިހާރު ކުރިއަށްދާ ވިޔަފާރީގެ މަޝްވަރާތަކުގެ މުހިއްމު ބައިތަކެއް ކުރިއަށްދާނެކަމަށް ލަފާކުރެވެއެވެ. މީގެ އިތުރުން އެމެރިކާގެ ހަކަތަޔާއި ބެހޭ ވަފުދެއްވެސް އަންނަ ހަފްތާގައި އިންޑިއާއަށް ވަޑައިގަންނަވާނެއެވެ.

އެމެރިކާގެ ރައީސްކަމާ ޑޮނަލްޑް ޓްރަމްޕް ދެވަނަ ދައުރަކަށް ހަވާލުވެވަޑައިގަތުމުގެ ކުރިން އިންތިގާލީ މަރުހަލާގައިވެސް އިންޑިއާއިން ދިޔައީ އައު ސަރުކާރުގެ މަގާމުތަކަށް ވަޑައިންނަވާ ބޭފުޅުންނާއެކު މަޝްވަރާތައް ބާއްވަމުންނެވެ. ވިޔަފާރީގެ ބޮޑު ވާދަވެރިކަމެއް އުފެދި، ކޮންމެވެސް ވަރެއްގެ ނުތަނަވަސްކަމެއް އޮތްނަމަވެސް، އެމެރިކާގެ ރައީސް ޑޮނަލްޑް ޓްރަމްޕް އާއި އިންޑިއާގެ ބޮޑުވަޒީރު ނަރެންދްރަ މޯދީއާ ދެ ބޭފުޅުންނަކީ އެއް ބޭފުޅަކު އަނެއް ބޭފުޅަކަށް ވަރަށް ތައުރީފުކުރައްވާ ދެބޭފުޅުންނެވެ.