ދެވަނަ ކުއާޓަރުގައި، ސާފްފައިދާގެ ގޮތުގައި ބީއެމްއެލަށް 558 މިލިއަން ރުފިޔާ

މިއަހަރުގެ ދެވަނަ ކުއާޓަރުގައި ބޭންކް އޮފް މޯލްޑިވްސްއަށް ސާފްފައިދާގެ ގޮތުގައި 558.1 މިލިއަން ރުފިޔާ ލިބިއްޖެއެވެ.

ޤައުމީ ބޭންކުން ނެރެފައިވާ މިއަހަރުގެ ދެވަނަ ކުއާޓަރުގެ މާލީބަޔާނަށް ބަލާއިރު، މި ކުއާޓަރުގައި ބީއެމްއެލަށް އާމްދަނީގެ ގޮތުގައި ވަނީ، 1.3 ބިލިއަން ރުފިޔާ ލިބިފައެވެ. ދެވަނަ ކުއާޓަރުގައި ބޭންކް ހިންގުމުގެ ފައިދާގެ ގޮތުގައި 790 މިލިއަން ރުފިޔާ ލިބުނުއިރު، ސާފްފައިދާގެ ގޮތުގައި ވަނީ 558.1 މިލިއަން ރުފިޔާ ލިބިފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 24 އިންސައްތަ އިތުރު އަދަދެކެވެ.

މިއަހަރުގެ ފުރަތަމަ ހަމަސްދުވަހު ޓެކުހަށް ކެނޑުމަށްފަހު ސާފްފައިދާގެ ގޮތުގައި ބީއެމްއެލަށް 1.05 ބިލިއަން ރުފިޔާ ވަނީ ލިބިފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 12 އިންސައްތައިގެ ކުރިއެރުމެކެވެ. ފުރަތަމަ ހަމަސްދުވަހު ބޭންކު ހިންގުމުގެ ފައިދާގެ ގޮތުގައި ވަނީ 1.04 ބިލިއަން ރުފިޔާ ލިބިފައެވެ.

ބީއެމްއެލްގެ ބެލެންޝީޓަށް ބަލާއިރު، ދެވަނަ ކުއާޓަރު ނިމުނުއިރު ބޭންކުން ދޫކުރި ލޯނުގެ އަދަދު 21.3 ބިލިއަން ރުފިޔާއަށް އަރާއިރު، 33.6 ބިލިއަން ރުފިޔާގެ ޑިޕޮސިޓާއެކު، ޖުމްލަ އެސެޓް ހުރީ 51 ބިލިއަން ރުފިޔާގައެވެ.

ބޭންކް އޮފް މޯލްޑިވްސްއަށް ދެވަނަ ކުއާޓަރުގައި ލިބުނު ފައިދާއާ ގުޅޭގޮތުން އެ ބޭންކްގެ ސީއީއޯ އަދި މެނޭޖިންގ ޑިރެކްޓަރު މުހައްމަދު ޝަރީފް ވިދާޅުވީ، މި ކުއާޓަރުގައި ބޭންކުން ހޯދި ނަތީޖާ ދައްކުވައިދެނީ ބޭންކްގެ މުއައްޒަފުންގެ މަސައްކަތްތަކާއި، އެ ބޭންކްގެ ސްޓްރެޓެޖީގެ ހަރުދަނާކަން ކަމަށެވެ.

ބީއެމްއެލުން ވަނީ މިދިޔަ އަހަރު އެ ބޭންކަށް ލިބުނު ސާފްފައިދާއިން ހިއްސާއަކަށް 55 ރުފިޔާގެ މަގުން ޖުމްލަ 296 މިލިއަން ރުފިޔާ ހިއްސާދާރުންނަށް ބެހުމަށް ނިންމާފައެވެ.