ބަންކަރިން ޚިދުމަތުން 192 މިލިއަން ރުފިޔާ ލިބިއްޖެ: ސައީދު
މިދިޔަ އަހަރު އިހަވަންދިއްޕޮޅުގައި ފެށި ބަންކަރިން ޚިދުމަތުން މިހާތަނަށް 192 މިލިއަނަށްވުރެ ގިނަ ރުފިޔާ ލިބިފައިވާ ކަމަށް އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުހައްމަދު ސަޢީދު ވިދާޅުވެއްޖެއެވެ.
މިދިޔަ އަހަރުގެ ސެޕްޓެމްބަރު މަހު ފެށި މި ޚިދުމަތާއި ގުޅޭ ގޮތުން މިއަދުގެ މަޖިލީހުގެ ޖަލްސާގައި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ކުރެއްވި ސުވާލުތަކަށް ޖަވާބު ދެއްވަމުން ވަޒީރު ވިދާޅުވީ، އެ ޚިދުމަތް މިހާރު ވެސް ނުހުއްޓި ކުރިއަށް ދާ ކަމަށެވެ.
އެގޮތުން ޚިދުމަތް ފެށިތާ އަހަރެއްގެ ތެރޭގައި އެ ހިދުމަތުން ދައުލަތަށް ބޮޑު ފައިދާއެއް ލިބިފައިވާ ކަމަށާއި އެސްޓީއޯގެ ތަފާސްހިސާބުތަކަށް ބަލާއިރު މި ހިދުމަތުން 192.14 މިލިޔަން ރުފިޔާގެ އާމްދަނީއެއް ލިބިފައިވާއިރު، ޓެކުހުގެ ގޮތުގައި ވެސް 17 މިލިޔަނަށްވުރެ ގިނައިން ލިބިފައިވާ ކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ ބަންކަރިންގެ އާމްދަނީގެ ތެރެއިން 80 އިންސައްތައަކީ ލޯސަލްފާ ފިއުލްއިން ލިބުނު ޓެކްސްކަމަށާއި، އެ ބާވަތުގެ ތެލަކީ މީގެ ކުރިން ރާއްޖެއަށް ގެނެސް ވިއްކި ބާވަތެއް ނޫން ކަމަށެވެ.
އަހަރަކު 400 މިލިއަން ޑޮލަރު އިގްތިސާދަށް ވަންނާނެ ކަމަށް އަންދާޒާކުރި މި ޚިދުމަތަކީ ނެދަލޭންޑްސްގެ "ވިޓޯލް" ކުންފުންޏާއި އެސްޓީއޯއައި ގުޅިގެން ދެމުން އަންނަ ޚިދުމަތެކެވެ. މަތަށް ޙާއްސަކޮށްގެން "އުތުރު އުލިގަމު އިންޓަނޭޝަނަލް ޝިޕް އެންޑް ޕޯޓް ސެކިއުރިޓީ ގޭޓް" ގެ ނަމުގައި އައު އިމާރާތެއް ޤާއިމްކޮށްފައިވާއިރު، އެ ޚިދުމަތް ދިނުމަށް އެސްޓީއޯ އާއި ވިޓޯލުގެ އެއްބަސްވުމެއްގައި ސޮއިކުރީ މިދިޔަ އަހަރުގެ މާރިޗު މަހުގެ ތެރޭގައެވެ.
މި ޙިދުމަތް ދިނުމަށް އެސްޓީއޯއިން އަންނަނީ ތިން ބޯޓެއް ބޭނުންކުރަމުންނެވެ. އޭގެ ތެރޭގައި އެ ކުންފުނީގެ ސަބްސިޑަރީ ކުންފުނި، އެމްއެސްއެސް އިން އޮޕަރޭޓްކުރަމުން އަންނަ "ވައިސީ ބެރިއާ" ނަމަކަށް ކިޔާ އުޅަނދު ހިމެނޭއިރު، އެ އުޅަނދަކީ މަހެއްގެ މައްޗަށް 200 ޓަނުގެ ތެޔޮ އުފުލޭ ބޯޓަކެވެ.
މީގެ އިތުރަށް އެސްޓީއޯ އިން ވަނީ ބަންކަރިންގެ ޙިދުމަތަށް 4،000 މެޓްރިކް ޓަނުގެ ތެޔޮ އުފުލޭ ބޯޓަކާއި އަދި 3200 މެޓްރިކް ޓަނުގެ ތެޔޮ އުފުލޭ ބޯޓެއް ވެސް ގެނެސްފައެވެ.
ރާއްޖޭގައި މި ޚިދުމަތް ޤާއިމްކުރުމުގެ ކުރިން ރާއްޖެ އޮންނަ "ސަބް އިންޑިޔަން ކޮންޓިނެންޓް"ގައި އެ ޚިދުމަތް ފޯރުކޮށްދެނީ ކޮލޮމްބޯގެ ބަނދަރު އަދި އިންޑިޔާގެ ބަނދަރުތަކުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
