މިއަދުވެސް މޫސުން ގޯސް؛ އުތުރާއި މެދުރާއްޖެތެރޭގެ ކަނޑުތައް ގަދަވާނެ!

އުތުރާއި މެދުރާއްޖެތެރޭގެ ކަނޑުތައް ގަދަވާނެކަމަށް މޫސުމާއި ބެހޭ އިދާރާ(މެޓް އޮފީސް) އިން ލަފާކޮށްފިއެވެ.

މެޓް އޮފީހުން މޫސުން ގޯސްވާނެކަމަށް ލަފާކޮށް، ހއ އަތޮޅުން ފެށިގެން ވ އަތޮޅަށް ހުދު ސަމާލުވެސް ވަނީ ނެރެފައެވެ.

މިގޮތުން މިއަދު ހެނދުނު 11:00 އިން ހަވީރު 17:00 އާއި ހަމައަށް ހުދު ސަމާލުނެރެފައިވާއިރު، އެ އިދާރާއިން ބުނީ، ގަޑިއަކު 19 މޭލާއި 24  މޭލާއި ދެމެދުގެ ބާރުމިނުގައި ވައިޖެހޭނެކަމަށާއި، ކަނޑުތައް ގަދަވާނެކަމަށް ލަފާކުރާ ކަމަށެވެ.

މެޓް އޮފީހުން މިއަދު ހަވީރު 18:00 އާއި ހަމައަށް މޫސުން ލަފާކުރާ ގޮތަށް ބަލާއިރު، އެ އިދާރާއިން ވަނީ އުތުރުގެ ބައެއް އަތޮޅުތަކަށް ވިއްސާރަކުރުމާއިއެކު ގުގުރުން އެކަށީގެންވާކަމަށާއި، ދެކުނުގެ ބައެއް ރަށްތަކަށް ކެރީގެ އަސަރު ފޯރާނެކަމަށް ލަފާކޮށްފައެވެ.

އެއިދާރާއިން ބުނީ، ދެކުނުގެ އަތޮޅުތަކަށް ހުޅަނގުދެކުނާއި ދެކުނުން ގަޑިއަކު 5 މޭލާއި 15 މޭލާއި ދެމެދުގެ ބާރުމިނުގައި އަދި އެހެން ހިސާބުތަކަށް ގަޑިއަކު 13 މޭލާއި 23 މޭލާއި ދެމެދުގެ ބާރުމިނުގައި ވައިޖެހޭނެކަމަށެވެ. ހަމައެއެއާއިއެކު، ވިލާގަނޑުގައި ގަޑިއަކު ގާތްގަނޑަކަށް 35 މޭލު ބާރުމިނަށް ވައިގަދަވުން އެކަށީގެންވާކަމަށް މެޓް އޮފީހުން ލަފާކުރެއެވެ.

މެދުރާއްޖެތެރެއާއި އުތުރުގެ އަތޮޅުތަކުގެ ކަނޑުތައް ގަދަވި ނަމަވެސް، ދެކުނުގެ ކަނޑުތައް އާދައިގެވަރަކަށް މަޑުވާނެކަމަށް ލަފާކޮށް އެއިދާރާއިން ބުނީ، މެދުރާއްޖެތެރެ އާއި އުތުރުގެ ކަނޑުތަކގެ ރާޅުގެ އުސްމިނުގައި 3 ފޫޓާއި 6 ފޫޓު ހުންނާނެކަމަށާއި، ދެކުނުގެ ކަނޑުތަކުގެ ރާޅުގެ އުސްމިނުގައި 2 ފޫޓާއި 4 ފޫޓު ހުންނާނެ ކަމަށެވެ.