"ސީފުޑް ވޮޗް" އިން ކަނޑުމަހުގެ މަސްވެރިކަމަށް ދިން ފުރަތަމަ ރޭޓިންގް ރާއްޖެއަށް

އެމެރިކާގެ "މޮންޓަރ ބޭ އެކުއޭރިއަމް" ގެ ސީފުޑް ވޮޗް ޕްރޮގްރާމުން އާންމުކުރި އެންމެ ފަހުގެ ރޭޓިންގްގައި، ދިވެހިރާއްޖޭގެ ކަނޑުމަހުގެ މަސްވެރިކަމަށް ޚާއްޞަ ރޭޓިންގްއެއް ކަނޑައަޅައިފިއެވެ.

މިއީ ސީފުޑް ވޮޗްގެ ތާރީޚުގައި ވެސް ވަކި ޤައުމަކަށް ޚާއްޞަކޮށްގެން ކަނޑުމަހުގެ މަސްވެރިކަމަށް ރޭޓިންގްއެއް ދިން ފުރަތަމަ ފަހަރެވެ. މި ނިންމުމަކީ ދިވެހިރާއްޖެއަށާއި، ދުނިޔޭގެ ފެންވަރުގައި ދެމެހެއްޓެނިވި މަސްވެރިކަން ވަޒަންކުރުމުގައި ލިބުނު ތާރީޚީ ކުރިއެރުމެކެވެ. ސީފުޑް ވޮޗް އަކީ އެމެރިކާގެ މަސްވިއްކާ ކުންފުނިތަކާއި ކާބޯތަކެތީގެ ޚިދުމަތްދޭ ފަރާތްތަކުން މަސް ގަތުމުގައި އެންމެ ބޮޑަށް ރިޢާޔަތްކުރާ އެއް މިންގަނޑެވެ.

އަލަށް އާންމުކުރި އިރުޝާދުތަކުގައި، ރާއްޖޭގައި ކުރާ ކަނޑުމަހުގެ މަސްވެރިކަމަކީ ދެމެހެއްޓެނިވި މަސްވެރިކަމެއްގެ ގޮތުގައި ވަނީ ކަނޑައަޅާފައެވެ. އިންޑިއާ ކަނޑުގެ އެކި ސަރަޙައްދުތަކުގައި ކުރާ ކަނޑުމަހުގެ މަސްވެރިކަމުގެ ދެމެހެއްޓެނިވިކަމާ ގުޅޭ ކަންބޮޑުވުންތަކެއް ހުރި ނަމަވެސް، މުޅި ސަރަޙައްދުންވެސް ކަނޑުމަހުގެ ވިޔަފާރީގައި އިޚްތިޔާރުކުރަން އެންމެ ރަނގަޅު ނުވަތަ "ބެސްޓް ޗޮއިސް"ގެ ގޮތުގައި ރޭޓްކޮށްފައިވަނީ ރާއްޖޭގެ މަސްވެރިކަމެވެ.

މިއީ ދިވެހި މަސްވެރިންނާއި، މަސް ގަނެ ޕްރޮސެސްކުރާ ފަރާތްތަކުގެ އިތުރުން ސަރުކާރުން ގިނަ އަހަރުތަކެއް ވަންދެން ކުރަމުން އަންނަ ބުރަ މަސައްކަތުގެ ނަތީޖާއެވެ.

މި ކާމިޔާބީއާ ގުޅިގެން ފިޝަރީޒް މިނިސްޓަރު އަޙްމަދު ޝިޔާމް ވިދާޅުވީ، މިއީ ދިވެހިރާއްޖެއަށް ފަޚުރުވެރި ވަގުތުކޮޅެއް ކަމަށެވެ. ސީފުޑް ވޮޗް އިން ވަކި ޤައުމަކަށް ޚާއްޞަކޮށް ދޭ ރޭޓިންގްއެއް ފުރަތަމަ ފަހަރަށް ރާއްޖެއަށް ލިބުމަކީ، ދެމެހެއްޓެނިވިކަމާއި ޒިންމާދާރުކަމުގެ މައްޗަށް ބިނާވެފައިވާ ރާއްޖޭގެ މަސްވެރިކަމުގެ މޮޑެލް ބައިނަލްއަޤްވާމީ ފެންވަރުގައި ބަލައިގަނެފައިވާކަމުގެ ހެއްކެއް ކަމަށް ވަޒީރު ފާހަގަކުރެއްވިއެވެ.

އަދި މިއީ އިޤްތިސާދު ބިނާކުރުމާއި ކަނޑުފަޅުތައް ރައްކާތެރިކުރުމުގައި ދިވެހި މަސްވެރިން ކުރާ މަސައްކަތުގެ ފޮނި ނަތީޖާކަމަށް ވެސް ވިދާޅުވިއެވެ.

މި ކުރިއެރުމުގެ ސަބަބުން، ދެމެހެއްޓެނިވި ގޮތެއްގައި އުފައްދާ ކަނޑުމަހުގެ ބާވަތްތަކަށް ދުނިޔޭގެ އެންމެ ބޮޑު އެއް މާކެޓް ކަމަށްވާ އުތުރު އެމެރިކާގެ މާކެޓަށް ވަނުމަށް ދިވެހި އެކްސްޕޯޓަރުންނަށް ބޮޑެތި ފުރުސަތުތަކެއް ހުޅުވިގެންދާނެ ކަމަށް ސަރުކާރުން ބުނެއެވެ.

މީގެ އިތުރުން، ދުނިޔޭގެ ބާޒާރުގައި ދިވެހި މަހަށް ރަނގަޅު އަގު ހޯދުމަށާއި ބައިނަލްއަޤްވާމީ ވާދަވެރިކަމުގައި ކުރިހޯދުމަށް މި ރޭޓިންގްގެ ސަބަބުން މަގުފަހިވާނެއެވެ.

މިދިޔަ މަހު ވަނީ ރާއްޖޭގެ ކަންނެލީގެ އަތުނަނުގެ މަސްވެރިކަމަށް "މެރިން ސްޓިވަރޑްޝިޕް ކައުންސިލް" ސެޓިފިކޭޝަން ވެސް ލިބިފައެވެ.